ក្រុមឧទ្ទាមកុម្មុយនិស្តហ្វីលីពីនប្រកាសផ្អាកការប្រយុទ្ធ មុនកិច្ចពិភាក្សាសន្តិភាពនៅក្រុងអូស្លូ
ថ្ងៃសៅរ៍២០សីហានេះ ក្រុមឧទ្ទាមកុម្មុយនិស្តហ្វីលីពីនបានប្រកាសផ្អាកការប្រយុទ្ធ ១សប្តាហ៍ ហើយបានសុំអោយរដ្ឋាភិបាលក្រុងម៉ានីលផ្អាកការប្រយុទ្ធដូចគ្នា។ ពីថ្ងៃ២២ ដល់ថ្ងៃ២៧សីហា សប្តាហ៍ក្រោយនេះ ក្រុមឧទ្ទាមនិងរដ្ឋាភិបាលនឹងជួបចរចាគ្នាពីសន្តិភាពហ្វីលីពីន នៅក្រុងអូស្លូ ប្រទេសនរវែស។
ចុះផ្សាយនៅថ្ងៃ៖ កែប្រែថ្ងៃទី៖
ក្រុមឧទ្ទាមបក្សកុម្មុយនិស្តនៅហ្វីលីពីនបានសម្រេចផ្អាកការប្រយុទ្ធជាមួយកងទ័ព រយៈពេល៧ថ្ងៃ គិតចាប់ពីថ្ងៃអាទិត្យស្អែកនេះទៅ។ ក្រុមឧទ្ទាមបានសុំអោយរដ្ឋាភិបាលលោកឌុយទែរតេ ផ្អាកការប្រយុទ្ធដូចគ្នាដែរ ដើម្បីជំរុញកិច្ចពិភាក្សាសន្តិភាព ដែលត្រូវបើកធ្វើនៅក្រុងអូស្លូ ប្រទេសនរវែស ថ្ងៃច័ន្ទ២២សីហា សប្តាហ៍ក្រោយ។
ការសម្រេចផ្អាកការបាញ់គ្នា ធ្វើឡើងក្រោយរដ្ឋាភិបាលហ្វីលីពីនបានដោះលែងមេដឹកនាំក្រុមឧទ្ទាមកុម្មុយនិស្ត២រូប នៅថ្ងៃសុក្រម្សិលមិញ។ មេឧទ្ទាមទាំង២នោះ គឺបេនីតូ ទីយ៉ាំហ្សុង Benito Tiamzon ជាមេដឹកនាំកំពូល និងប្រពន្ធគាត់ ឈ្មោះវីលម៉ា Wilma។ ក្រុមឧទ្ទាមបានការសម្រេចរបស់រដ្ឋាភិបាលដែលបានដោះលែងសកម្មជនខ្លួន២២នាក់ បន្តបន្ទាប់គ្នា ដើម្បីអោយពួកគេបានចូលរួមកិច្ចពិភាក្សានៅក្រុងអូស្លូ។ ក្រុមឧទ្ទាមប្រកាសដែរថា នឹងផ្អាកការប្រយុទ្ធយូរជាងនេះ បើរដ្ឋាភិបាលហ្វីលីពីនដោះលែងគ្រប់អ្នកទោសនយោបាយ។
បក្សកុម្មុយនិស្តហ្វីលីពីនបានចាប់កំណើតឡើង ខែធ្នូ ឆ្នាំ១៩៦៨។ ក្រោយការកកើតបាន៣ខែ បក្សកុម្មុយនិស្តបានធ្វើចលនាបះបោរ ធ្វើអោយមានមនុស្សស្លាប់យ៉ាងតិច៣ម៉ឺននាក់។ ក្នុងទសវត្ស១៩៨០ ទាហានក្រុមឧទ្ទាមកុម្មុយនិស្តមាន២ម៉ឺន៦ពាន់នាក់ តែពេលនេះ នៅសល់តែ៤០០០នាក់ប៉ុណ្ណោះ។
កិច្ចពិភាក្សាសន្តិភាពនៅក្រុងអូស្លូ សប្តាហ៍ក្រោយមានទិសដៅបិទបញ្ចប់ការបះបោររបស់ក្រុមឧទ្ទាមកុម្មុយនិស្តហ្វីលីពីន ជាក្រុមឧទ្ទាមដ៏ចំណាស់មួយ នៅអាស៊ី។
រដ្ឋាភិបាលលោកអាគីណូអាណត្តិមុនបានចរចាសន្តិភាពជាមួយក្រុមឧទ្ទាមមួយនេះបាន៣ឆ្នាំ តែបានបោះបង់ការចរចាទៅវិញ ដោយចោទថាក្រុមឧទ្ទាមមិនសូវស្មោះត្រង់។ រដ្ឋាភិបាលថ្មីរបស់លោកឌុយទែរតូ ធ្លាប់ប្រកាសបទឈប់បាញ់ពហុភាគី តែអនុវត្តធ្វើបានតែ៥ថ្ងៃប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ