ចៅហ្វាយក្រុងJakarta ឈ្នះឆ្នោតប្រធានាធិបតីឥណ្ឌូណេស៊ីជាមួយសម្លេងឆ្នោត៥៣ភាគរយ
នៅថ្ងៃអង្គារនេះ យោងតាមគណៈកម្មការបោះឆ្នោតឥណ្ឌូណេស៊ី ចៅហ្វាយក្រុងចាកាតា គឺលោកចូកូ វីដូដូ បានទទួលជោគជ័យក្នុងការបោះឆ្នោតប្រធានាធិបតី កាលពីថ្ងៃ៩កក្កដា ជាមួយសម្លេងឆ្នោត ៥៣ភាគរយ ឈ្នះលើអតីតមេទាហាន ប្រាបូវ៉ូ ស៊ូបៀនតូ ជាគូប្រជែងមកពីគណបក្សហ្សឺរីនដា។ លោកស៊ូបៀនតូ បានទាត់ចោលលទ្ធផលបោះឆ្នោត ហើយនឹងដាក់ពាក្យប្តឹងទៅក្រុមប្រឹក្សាធម្មនុញ្ញ។ គ្រាន់តែថ្ងៃប្រកាសលទ្ធផលបោះឆ្នោត ប៉ូលិសជាង២សែន៥ម៉ឺននាក់ ត្រូវបានដាក់ពង្រាយការពារសន្តិសុខ ទូទាំងប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
ចៅហ្វាយក្រុងចាកាតា លោក ចូកូ វីដូដូ ដែលគេតែងហៅថា ចូកូវី នោះ បានទទួលជោគជ័យក្នុងការបោះឆ្នោតប្រធានាធិបតីឥណ្ឌូណេស៊ី ថ្ងៃ៩កក្កដា ជាមួយសម្លេង ៥៣ភាគរយ ឈ្នះលើដៃគូប្រជែងលោក គឺលោក ប្រាបូវ៉ូ ស៊ូបៀនតូ។ នេះជាលទ្ធផលបោះឆ្នោតប្រកាសដោយគណៈកម្មការបោះឆ្នោតឥណ្ឌូណេស៊ី នៅថ្ងៃអង្គារនេះ។
ចៅហ្វាយក្រុងចាកាតា ចូកូវី អាយុ៥៣ឆ្នាំ មានប្រជាប្រិយភាព អាចទទួលជោគជ័យបានបែបនេះ ក៏ដោយសារលោកមិនធ្លាប់ធ្វើនយោបាយកាលពីមុន ដូច្នេះលោកមានឈ្មោះស្អាតស្អំ មិនប្រឡាក់ប្រឡូសនឹងអំពើពុករលួយ ខុសពីអ្នកនយោបាយមួយចំនួនក្នុងជួររដ្ឋាភិបាល បច្ចុប្បន្ន។ រីឯគូប្រជែងលោកចូកូវី គឺលោកស៊ូបៀនតូ អាយុ ៦២ ឆ្នាំ ជាអតីតមេទាហាន ជាកូនប្រសាររបស់មេដឹកនាំស៊ូហាតូ មិនសូវមានប្រជាប្រិយភាព ដោយសារតែលោកស៊ូបៀនតូ ធ្លាប់បង្ក្រាបចលនានិស្សិតទាមទារប្រជាធិបតេយ្យ កាលពីឆ្នាំ១៩៩៨។ ដោយសារភាពស្អាតស្អំក្នុងនយោបាយ ចៅហ្វាយក្រុងចាកាតា ចូកូវី នឹងក្លាយជាមេដឹកនាំជំនាន់ថ្មី នៅឥណ្ឌូណេស៊ី។
ប៉ុន្តែ លោកចូកូវី ត្រូវប្រឈមនឹងលោកស៊ូបៀនតូ ដែលមិនទទួលយកលទ្ធផលបោះឆ្នោត។ អតីតមេទាហាន ស៊ូបៀនតូ នឹងតវ៉ាលទ្ធផលនេះ។ លោកស៊ូបៀនតូ ចោទថា មានការបន្លំសន្លឹកឆ្នោតសន្ធឹកសន្ធាប់ ក្នុងថ្ងៃបោះឆ្នោត៩កក្កដា កន្លងទៅ។ តាំងពីថ្ងៃបិទទ្វារការិយាល័យបោះឆ្នោត ថ្ងៃ៩កក្កដាម្ល៉េះ ទាំងលោកចូកូវី ទាំងលោកស៊ូបៀនតូ សុទ្ធតែធ្លាប់ប្រកាសជោគជ័យបោះឆ្នោតតែរៀងខ្លួន។
តុលាការឥណ្ឌូណេស៊ី មានពេលរហូតដល់ចុងខែសីហា ដើម្បីសម្រេចចិត្តលើការប្តឹងផ្តល់នេះ។ ទោះយ៉ាងនេះក្តី ប្រធានាធិបតីថ្មី ត្រូវឡើងកាន់តំណែង ក្នុងខែតុលា ក្រោយលោក ស៊ុយស៊ីឡូ យូដូយ៉ូណូ បញ្ចប់អាណត្តិដឹកនាំ។ ឥណ្ឌូណេស៊ី ជាប្រទេសនាំមុខសេដ្ឋកិច្ច នៅអាស៊ីអាគ្នេយ៍ និងជាប្រទេសកាន់សាសនាអ៊ីស្លាមធំបំផុតក្នុងពិភពលោក។ ប្រធានាធិបតីឥណ្ឌូណេស៊ីថ្មី ត្រូវធ្វើកំណែទម្រង់ដោះស្រាយបញ្ហាមួយចំនួន បែបយ៉ាងការធ្លាក់ចុះនៃការផលិតក្នុងស្រុក រឺក៏កាត់បន្ថយការផ្តល់ជំនួយប្រេងសាំងជាដើមព្រោះថា ប្រេងសាំងនៅឥណ្ឌូណេស៊ី មានតម្លៃទាបជាងគេបំផុតទៅហើយ ក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ