បុណ្យអុំទូកថ្ងៃទីពីរនៅតែមានមនុស្សចូលរួមតិចតួច
ការប្រណាំងទូក នៅក្នុងថ្ងៃទីពីរ នៃព្រះរាជពិធីបុណ្យអុំទូក បានចាប់ផ្តើមនៅម៉ោង ១១ ព្រឹកថ្ងៃទី ០៦ វិច្ឆិកានេះ ដូចថ្ងៃទី១ដែរ។ ប៉ុន្តែ អ្នកចូលរួមនៅតែមានចំនួនតិចជាងរៀងរាល់ឆ្នាំ។ បើទោះបីជានៅភ្នំពេញមានការរៀបចំសន្តិសុខ សណ្តាប់ធ្នាប់ល្អក៏ដោយ ក៏ គ្រោះថ្នាក់ចរាចរណ៍តាមដងផ្លូវនានាទូទាំងប្រទេសនៅពីរថ្ងៃដំបូងនៃពិធីបុណ្យអុំទូកបានសម្លាប់មនុស្សដល់ទៅ២៥នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
ការប្រណាំងទូកង និងទូកចេវ នៅក្នុងថ្ងៃទីពីរ នៃពិធីបុណ្យអុំទូក បណ្តែតប្រទីប និងអកអំបុក សំពះព្រះខែ បានដំណើរការទៅជាធម្មតា។ នៅថ្ងៃទីពីរនេះមាន ការប្រណាំងទូកអុំបុរស និងនារីខ្នាតអន្តរជាតិ ទូកអុំបុរសគូពិសេស ទូកអុំបុរស ទូកចេវនារី និងទូកចែវបុរស។ ការប្រ ណាំងទូកអុំបុរស ខ្នាតអន្តរជាតិ ត្រូវបានចាប់ផ្តើមប្រណាំងមុនគេ។
ការប្រណាំងទូកនៅថ្ងៃទី២នេះ ក៏ប្រព្រឹត្តទៅដូចថ្ងៃទី១ដែរ ដោយមានចំងាយ ១៧០០ ម៉ែត្រ ហើយការប្រណាំងទូកចាប់ផ្តើមពីម៉ោង១១ និងបញ្ចប់នៅម៉ោង ៥ ល្ងាច ដោយប្រណាំងពីរជើងក្នុងមួយថ្ងៃ។ ចំណែកអ្នកចូលរួមក៏មានតិចតួចដែរ។
នៅក្នុងការប្រណាំងថ្ងៃទី ១ គេសង្កេតឃើញថា មិនសូវជាមានមនុស្សកុះករ ចូលរួមនៅក្នុងពិធីបុណ្យអុំទូក ដូចឆ្នាំមុនៗនោះទេ នៅក្នុងទីក្រុងភ្នំពេញ។ ប៉ុន្តែ គ្រាន់តែក្នុពីរថ្ងៃដំបូង មានមនុស្សស្លាប់ចំនួន ២៥នាក់ ក្នុងគ្រោះថ្នាក់ចរាចរណ៍ទូទាំងប្រទេស។ គ្រាន់តែថ្ងៃទី១គ្រោះថ្នាក់ចរាចរណ៍ទាំង ១២ លើក បានបង្កឲ្យខូចខាតយានយន្តសរុប ២២ គ្រឿង ក្នុងនោះមានម៉ូតូ ១៥គ្រឿង រថយន្តធុនតូច ៤គ្រឿង រថយន្តធុនធំ ១ គ្រឿង និងយានយន្តផ្សេងៗទៀតចំនួន ២គ្រឿង។ នេះបើយោងតាមរបាយការណ៍របស់ប៉ូលិស។
សូមបញ្ជាក់ថា ការរៀបចំសណ្តាប់ធ្នាប់ក្នុងពិធីបុណ្យអុំទូកនៅឆ្នាំនេះ ត្រូវបានរឹតបណ្តឹង និង ការពារសន្តិសុខយ៉ាងម៉ត់ចត់ជូនដល់ប្រជាពលរដ្ឋដែលបានមកចូលរួម បន្ទាប់ពីខកខានអស់រយៈពេល៣ឆ្នាំមក និងក្រោយពីកើតមានហេតុការណ៍ស្លាប់មនុស្សអស់ជាង ៣០០នាក់ ក្នុងថ្ងៃបុណ្យអុំទូកទី ៣ កាលពីឆ្នាំ ២០១០ បញ្ហាទឹកជំនន់ និង ពេលដែលព្រះមហាវីរក្សត្រ សម្តេច នរោត្តមសីហនុ យាងសោយទិវង្គត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ