វេន ជាប៉ាវ៖ អាស៊ីបូព៌ាកំពុងប្រឈមនឹងស្ថានភាពមួយដែលមិននឹងន និងមិនច្បាស់លាស់
នៅក្នុងជំនួបកំពូលសេដ្ឋកិច្ច រៀបចំ នៅថ្ងៃអាទិត្យទី១៣ ឧសភានេះ ក្នុងទីក្រុងប៉េកាំង ថ្នាក់ដឹកនាំរបស់ប្រទេសសេដ្ឋកិច្ចធំៗបី គឺ ចិន កូរ៉េខាងត្បូង និងជប៉ុនបានព្រមព្រៀងគ្នាក្នុងការបង្កើតឲ្យមានតំបន់ដោះដូរសេដ្ឋកិច្ចសេរីមួយ។ សំណុំរឿងនុយក្លេអ៊ែររបស់កូរ៉េខាងជើងក៏ត្រូវប្រទេសទាំងបីលើកទៅនិយាយដែរ។ នៅក្នុងសន្និសីទកាសែត លោកប្រធានាធិបតីកូរ៉េខាងត្បូង លី ម្យ៉ុងបាក់បានថ្លែងព្រមានកូរ៉េខាងជើងដែលប៉ុនប៉ងធ្វើការបាញ់សាកល្បងអាវុធនុយក្លេអ៊ែរជាលើកទីបី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:១៧
នៅក្រោយការពិភាក្សារបស់ថ្នាក់ដឹកនាំប្រទេសទាំងបីស្តីពីកម្មវិធីអាវុធនុយក្លេអ៊ែររបស់កូរ៉េខាងជើង ប្រធានាធិបតីកូរ៉េខាងត្បូងប្រកាសថា ចិន ជប៉ុន និងកូរ៉េខាងត្បូងបានយល់ស្របគ្នា ថា នឹងមិនអាចទទួលយកបានទេ នូវការបាញ់សាកល្បងអាវុធនុយក្លអ៊ែរជាថ្មី គឺជាលើកទីបី ឬក៏សកម្មភាពញុះញង់របស់កូរ៉េខាងជើង។
កូរ៉េខាងត្បូង និងជប៉ុនដែលជាសត្រូវសងសឹករបស់កូរ៉េខាងជើង នៅតែជឿថា របបកុម្មុយនិស្តកូរ៉េខាងជើងកំពុងត្រៀមរៀបចំបាញ់សាកល្បងអាវុធនុយក្លេអ៊ែរ។ ផ្កាយរណបអាមេរិក ធ្លាប់បានបង្ហាញឲ្យឃើញពីទីតាំងដែលគេសង្ស័យថា កូរ៉េខាងជើងកំពុងរៀបដំឡើងម៉ាស៊ីនដើម្បីបាញ់សាកល្បងអាវុធនុយក្លេអ៊ែរ នៅផ្នែកឦសានប្រទេស។ កូរ៉េខាងជើងទើបតែបរាជ័យ មិនអាចបាញ់បង្ហោះរ៉ុកកែតរបស់ខ្លួន កាលពីថ្ងៃទី ១៣មេសាកន្លងទេ។ គេជឿថា នៅរាល់ក្រោយការបាញ់មីស្ស៊ីល ឬរ៉ុកកែតតាមការអះអាងរបស់កូរ៉េខាងជើង កូរ៉េខាងជើង តែងតែបាញ់សាកល្បងនុយក្លេអ៊ែរ ដូចកាលពីឆ្នាំ ២០០៦ និង២០០៩ ដែលធ្វើឲ្យអង្គការសហប្រជាជាតិបានថ្កោលទោស ដាក់ទណ្ឌកម្ម។
នៅមុនជំនួបពិភាក្សាជាមួយប្រធានាធិបតីកូរ៉េខាងត្បូង និងនាយករដ្ឋមន្រ្តីជប៉ុន លោក នាយករដ្ឋមន្រ្តីចិន វេន ជាប៉ាវ ធ្លាប់បាននិយាយទុកជាមុនថា តំបន់អាស៊ីបូព៌ាកំពុងប្រឈមនឹងស្ថានភាពមួយដែលមិននឹងន និងមិនប្រាកដប្រជា ដែលគេពិបាកនឹងទស្សទាយដឹងមុន។
ក្នុងបរិបទបែបនេះ ថ្នាក់ដឹកនាំចិនបានអំពាវនាវឲ្យគ្រប់ភាគីទាំងអស់រួមទាំង ថ្នាក់ដឹកនាំកូរ៉េខាងត្បូង និងជប៉ុនប្រកាន់ខ្ជាប់ កាអត់ធ្មត់ និងផ្លាស់ប្តូរយោបល់គ្នាជាមួយចិន។ សម្រាប់ទីក្រុងប៉េកាំង ដើម្បីបន្ថយភាពតានតឹង មធ្យោបាយ និងរកច្រកចេញពីវិបត្តិនុយក្លេអ៊ែរកូរ៉េខាងជើង គឺមានតែការចរចាផ្នែកការទូតតែមួយមុខប៉ុណ្ណោះ។
ឈានទៅពិភាក្សាបង្កើតតំបន់ដោះដូរសេរីរួម
តំបន់ដោះដូរសេរី នឹងផ្តល់ប្រយោជន៍ដល់ប្រទេសសមាជិក ជាពិសេស នៅខណៈពេលសេដ្ឋកិច្ចនៅអឺរ៉ុប និងនៅអាមេរិកកំពុងដើរអូសជើង។ ចិនមហាអំណាចសេដ្ឋកិច្ចពិភពលោកទីពីរ ដែលមានអឺរ៉ុបជាទីផ្សារធំរបស់ខ្លួន កំពុងចង់កាត់បន្ថយការពឹងផ្អែករបស់ខ្លួនទៅលើទីផ្សាយ អឺរ៉ុប។ ចិនខំជំរុញ ការប្រើប្រាស់ក្នុងស្រុក និងងាកមកពង្រឹងចំណងសេដ្ឋកិច្ចជាមួយជប៉ុន និងកូរ៉េខាងត្បូង ដែលកំពុងមានសក្តានុពលសេដ្ឋកិច្ចខ្លាំង។
ថ្នាក់ដឹកនាំចិន និងកូរ៉េខាងត្បូងបាននិយាយ នៅថ្ងៃនេះ ហើយថា តំបន់ដោះដូរសេរីនេះត្រូវតែមាន ក្នុងកាលៈទេសៈ ដែលសេដ្ឋកិច្ចពិភពលោកបច្ចុប្បន្នទើបតែងើបពីវិបត្តិ និងក្នុងពេលដែលប្រទេសជាច្រើនកំពុងអនុវត្ត និងពង្រីកនយោបាយឧបត្ថម្ភនិយម (protectionisme) គឺការពារទីផ្សាររបស់ផលិតផលក្នុងស្រុក ដោយចាត់វិធានការនានាដើម្បីទប់ស្កាត់ការលុកលុយរបស់ផលិតផលពីបរទេស។ ដូច្នេះ បើចិន កូរ៉េខាងត្បូង និងជប៉ុនបានសម្រេច ក្នុងកាបង្កើតតំបន់ដោះដូរសេរីរួមគ្នាបាននោះ នោះ គេសង្ឃឹមថា ពន្ធនាំចូលទាំងប៉ុន្មាននឹងត្រូវលុបចោល ហើយវិធានការរបស់រដ្ឋដែលធ្លាប់តឹងតែងទៅលើផលិតផលបរទេស ក៏នឹងត្រូវគេបន្ធូរបន្ថយ ឬលុបចោលទាំងមូល។
ទីភ្នាក់ងារព័ត៌មានចិន ស៊ិនហួរវិញបានប៉ាន់ស្មានហើយ ថា តំបន់ដោះដូរសេរីនឹងជួយឲ្យផលិតផលក្នុងស្រុកសរុប ឬGDP របស់ចិន កើនឡើងជិត ជិត ៣ភាគរយ ចំណែកកូរ៉េខាងត្បូង ដែលជំនាញខាងនាំចេញផលិតផលអេឡិចត្រូនិក នឹងទទួលប្រយោជន៍ពីតំបន់ដោះដូរ ដោយផលិតផលក្នុងសរុបប្រទេសនេះ នឹងកើនឡើងជាង៣ភាគរយ ច្រើនជាងចិន។ លើកលែងតែជប៉ុន ដែលមានកំណើនGDPតិច គឺមិនដល់មួយភាគរយផង។
ចំណុចវិជ្ជមានចេះតែមាន ប៉ុន្តែ យ៉ាងណាក៏ដោយ ផ្លូវធ្វើដំណើរ ទៅបង្កើតឲ្យចេញជារូបរាង តំបន់ដោះដូរសេរីរវាងបីប្រទេស វា នៅវែងឆ្ងាយតទៅទៀត។ សូម្បីតែចិនផ្ទាល់ក៏ទទួលស្គាល់ដែរ ថា នឹងមានការលំបាកច្រើន ក្នុងការបង្កើតតំបន់ដោះដូរសេរី។ លំបាក និងនៅវែងឆ្ងាយ ព្រោះថា នៅក្នុងកាលៈទេសៈដែលនយោបាយតំបន់នៅមិនទាន់មានស្ថិរភាព ជំនឿទុកចិត្តរវាងប្រទេសទាំងបី ត្រូវតែមានចាំបាច់ ទាំងផ្នែកនយោបាយការទូត និងទំនាក់ទំនងសេដ្ឋកិច្ច។
គួរដឹងថា គម្រោងបង្កើតតំបន់ដោះដូរចិន ជប៉ុន និងកូរ៉េខាងត្បូង កើតមាននៅជួនពេលដែលតំបន់ដោះដូរសេរី មួយទៀត ឈ្មោះ ភាពជាដៃគូអន្តរប៉ាស៊ីហ្វិកកំពុងត្រូវគេចរចាត្រៀមរៀបចំបង្កើតឡើងដែរ។ ក្នុងផែនការបង្កើតតំបន់ដោះដូរសេរីអន្តរប៉ាស៊ីហ្វិក (TPP)មានជប៉ុន កំពុងចូលរួមដែរជាមួយអាមេរិក និងប្រទេសអាស៊ីដទៃ ទៀត ប៉ុន្តែ ចិន និងកូរ៉េខាងត្បូងមិនបានចូលរួមទេ។ ចិនដែលខំជំរុញឲ្យតំបន់ដោះដូរសេរីនៅអាស៊ីបូព៌ា កើតចេញឆាប់ៗ ព្រោះដើម្បីប្រជែងជាមួយអាមេរិក។ ចិនមហាអំណាចសេដ្ឋកិច្ចពិភពលោកលេខពីរ បន្ទាប់ពី អាមេរិក ពិតជាមិនពេញចិត្តទេដែលឃើញអាមេរិក ពង្រីកផ្នែកយោធា និងលូកដៃមកធ្វើពាណិជ្ជកម្មជាមួយប្រទេសនៅអាស៊ីប៉ាស៊ីហ្វិក។ ចិនតែង ចាត់ទុកនយោបាយអាមេរិក នៅអាស៊ី ធ្វើឲ្យប៉ះពាល់ដល់ប្រយោជន៍ភូមិសាស្រ្តនយោបាយ និងសេដ្ឋកិច្ចរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ