ឧបករណ៍ស្ទង់ទិន្ន័យអវកាសJuno បានទៅដល់ខ្សែវ័នភពJupiter
ថ្ងៃទី៤កក្កដា ថ្ងៃបុណ្យឯករាជ្យជាតិរបស់សហរដ្ឋអាមេរិកឆ្នាំនេះ មានការអបអរមួយពិសេសបន្ថែមទៀត គឺដោយក្រុមអ្នកវិទ្យាសាស្ត្រនៅស្ថានីយ៍អវកាសNasa ទើបទទួលបានដំណឹងថា ឧបករណ៍ស្ទង់ទិន្ន័យអវកាសឈ្មោះ Juno បានទៅដល់ខែ្សវ័ន នៃភពជូពីទឺ ដោយជោគជ័យហើយ។ ឧបករណ៍ស្ទង់ទិន្ន័យអវកាសនេះ មានបេសកកម្មប្រមូលយកទិន្ន័យ ទាក់ទងទៅនឹងធាតុផ្សំទាំងក្នុងមាឌ ទាំងក្នុងបរិយាកាសជុំវិញភពជូពីទឺ ដែលជាភពដ៏ធំជាងគេនៃប្រព័ន្ធព្រះអាទិត្យ។
ចុះផ្សាយនៅថ្ងៃ៖ កែប្រែថ្ងៃទី៖
ឧបករណ៍ស្ទង់ទិន្ន័យអវកាសឈ្មោះ Juno បានទៅដល់ក្នុងខ្សែវ័ននៃភពJupiter ហើយ បន្ទាប់ពីបានធ្វើដំណើរអស់រយៈចំងាយចំនួន ២៧០០លានគីឡូម៉េត្រ។ ដោយសារតែភពJupiter ស្ថិតនៅចំងាយ៨៦៩លានគីឡូម៉ែត្រពីភពផែនដី ទើបរលកសញ្ញាស្តីពីជោគជ័យរបស់ឧបករណ៍Juno ត្រូវការពេលចំនួន ៤៨នាទី ដើម្បីមកដល់ផែនដី។ ឧបករណ៍Juno នេះ មានទំងន់៣,៦តោន ដែលដើរដោយពន្លឺព្រះអាទិត្យ។ បេសកកម្មនេះបានចាប់ផ្តើមនៅខែសីហា ឆ្នាំ២០១១ ដោយបានចំណាយប្រាក់ចំនួន១១០០លានដុល្លារ។
សម្លេងកងរំពងទះដៃអបអរបានបន្លឺឡើងកាន់តែខ្លាំង នៅពេលដែលឧបករណ៍Juno នេះ បានបញ្ជូនរលកសញ្ញា ប្រាប់ថាវាបានបែរមុខទៅរកពន្លឺព្រះអាទិត្យ បានដោយជោគជ័យបន្ថែមទៀត ដើម្បីបន្តស្រូបយកថាមពលពីពន្លឺព្រះអាទិត្យ។ បច្ចុប្បន្ន ឧបករណ៍Juno កំពុងស្ថិតនៅលើខ្សែវ័ន រឺខ្សែអរប៊ីដតំបន់ប៉ូលនៃភពJupiter ក្នុងចំងាយ៥៣,៥ថ្ងៃ។ ហើយនៅរវាងខែតុលា Juno នឹងរំកិលខ្លួនទៅក្នុងចំងាយ១៤ថ្ងៃ ដោយត្រូវស្ថិតនៅក្រោមផ្សែងឧស្ម័នដ៏ក្រាសឃ្មឹក ដែលនៅជុំវិញភពJupiter។
ក្នុងបេសកកម្មដែលមានរយៈពេល២០ខែ ឧបករណ៍Juno នេះ ត្រូវហោះឆ្លងកាត់ភពJupiter ចំនួន៣៧ដង នៅរយៈចំងាយចន្លោះពី ៤៦៦៧ ទៅ ១ម៉ឺន គីឡូម៉ែត្រពីភពនេះ។ នេះជាលើកទីមួយហើយ ដែលយានមួយអាចហោះទៅកៀកខ្លាំង នឹងភព Jupiter ព្រោះកាលពីឆ្នាំ១៩៧៤ ឧបករណ៍Pionner 11 បានហោះទៅជិត តែក្នុងចំងាយ៤៣ម៉ឺនគីឡូម៉ែត្រ។
បេសកកម្មរបស់ឧបករណ៍ស្ទង់ទិន្ន័យJuno គឺដើម្បីពិនិត្យរាល់ធាតុផ្សំទាំងឡាយណា ដែលលាយឡំនៅក្នុងលំហរអាកាស ជុំវិញភព Jupiter ព្រមទាំងស្រង់ទិន្ន័យស្តីពីកម្លាំងទំនាញនៃភពនេះ។ ទិន្ន័យនៃកម្លាំងទំនាញ អាចឲ្យអ្នកវិទ្យាសាស្ត្រសន្និដ្ឋានបាន អំពីធាតុផ្សំនៃម៉ាសមាឌរបស់ភពនេះ។ យ៉ាងណាក៏ដោយ អ្នកវិទ្យាសាស្ត្រNasa បានសម្តែងការព្រួយបារម្ភ ពីគ្រោះថ្នាក់ ដែលអាចកើតមាន ក្នុងករណីដែលឧករណ៍Juno ខិតចូលទៅជិតនឹងភពនេះពេក ព្រោះសំពាធនៃស្រទាប់អ៊ីដ្រូហ្សែន បូកផ្សំជាមួយនឹងទំនាញវិលជុំដ៏ខ្លាំង គឺវាអាចបង្កើតជាដែនម៉ាញ៉េទិក ដែលអាចបំផ្លាញដំណើរការរបស់ឧបករណ៍ Junoបាន។ មួយវិញទៀត ឧបករណ៍នេះ ត្រូវឆ្លងកាត់ខ្សែស្រទាប់ នៃបំណែកអាច់ផ្កាយ មុននឹងអាចឈានចូលទៅជិតភព Jupiter។
សូមបញ្ជាក់ថា ភពJupiter គឺជាភពទីប្រាំនៃប្រព័ន្ធព្រះអាទិត្យ ហើយជាភពដែលមានទំហំធំជាងគេ ពោលគឺប្រមាណជា៣១៨ដង ធំជាងភពផែនដីយើង។ រហូតមកទល់ពេលនេះ នៅមិនទាន់មានការសិក្សាស្រាវជ្រាវណាមួយ បង្ហាញពីចរិកលក្ខណៈ និងធាតុផ្សំរបស់ភពនេះទេ។ ហើយគេនៅមិនទាន់ដឹងថា តើភពJupiter នេះ មានស្នូលកណ្តាលដែររឺក៏អត់ទេ។ អ្វីដែលអ្នកវិទ្យាសាស្ត្រចង់ដឹងមួយទៀត គឺថាតើមានអ្វីខ្លះ នៅក្នុងផ្សែងឧស្ម័ន ដ៏សែនក្រាសមានលាយពណ៌ស និងពណ៌ក្រហម ដែលហោះអណ្តែតគួច យ៉ាងខ្លាំងនៅជុំវិញភពនេះ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ