ក្រុមអវកាសយានិកអន្តរជាតិមួយលើកថ្មីទៀតបានត្រឡប់មកដល់ផែនដីវិញ
ក្រុមអវកាសយានិកអន្តរជាតិនេះមានគ្នា៣នាក់ដែលជាក្រុមទី៣២ បន្ទាប់ពីបានស្នាក់ធ្វើការស្រាវជ្រាវក្នុងស្ថានីយអវកាសអន្តរជាតិ SSI អស់ជាង៤ខែ និយាយឲ្យចំ គឺអស់១២៧ថ្ងៃ នៅវេលាម៉ោង ៥ និង៥៣នាទីព្រឹកមិញ បានហោះត្រឡប់មកដល់ផែនដីវិញ តាមរយៈយានអវកាសរុស្ស៊ីធុន Soyuz TMA-05M។
ចុះផ្សាយនៅថ្ងៃ៖
ស្តាប់ - ០២:២២
អ្នកអវកាស៣នាក់នោះ គឺជាតិរុស្ស៊ីលោក Yuri Malenchenko ជាតិអាមេរិកាំងលោកស្រី Sunita Williams និងជាតិជប៉ុនលោក Akihiko Hachide បានត្រឡប់មកដល់ដីវិញ ប្រកបដោយសុវត្ថិភាព។ យានអវកាសដែលបានផ្ទុកគេមក បានចុះចតនៅឯវាលស្មៅនៃសាធារណរដ្ឋកាហ្សាក់ស្ថាន។ មជ្ឍមណ្ឌលខាងបញ្ជាលើការហោះហើររបស់គេដែលស្ថិតនៅលើដីបានតាមដានជាប់ជានិច្ច អំពីការហោះចុះនៃយានអវកាសនោះ តាំងពីវាផ្តាច់ខ្លួនចេញពីស្ថានីយអវកាសអន្តរជាតិ SSI នៅកំពស់ ៤១២គ.ម.រហូតមកនៅកំពស់ ១៣៩គ.ម.កាលដែល Capsule ជាទីដែលមានអ្នកអវកាសទាំង៣នាក់ស្ថិតនៅខាងក្នុង ផ្តាច់ខ្លួនចេញពីយានអវកាស Soyuz ផ្ទាល់ ហើយកាលដែលនៅសល់តែ ១០,៨គ.ម. ដល់ផ្ទៃផែនដីផ្ទាល់ ឆ័ត្រយោងរបស់ Capsule នោះបានដម្លោះទប់ល្បឿនវា ឲ្យធ្លាក់ចុះដោយសន្សឹមៗលុះមកដល់ដីផ្ទាល់តែម្តង។
ប្រតិបត្តិការខាងតាមដានយានដែលផ្ទុកអ្នកអវកាសទាំងនោះឲ្យចុះចតប្រកបដោយសុវត្ថិភាពមកដល់ដី គឺត្រូវបានធានាដោយយន្តហោះ ៣គ្រឿង ឧទ្ធម្ភាគចក្រ ១២គ្រឿង និងរថយន្តពិសេស ៦គ្រឿងខាងស្វែងរកទីកន្លែងចុះចតដែលមានស្មៅដុះស៊ុបទ្រុបលើដែនដីកាហ្សាក់ស្ថាន។
ក្នុងអំឡុងពេល ១២៧ថ្ងៃ ដែលគេបានស្នាក់ធ្វើការស្រាវជ្រាវក្នុងស្ថានីយអវកាសអន្តរជាតិ SSI ដែលជាមន្ទីរពិសោធន៍អន្តរជាតិប្រចាំនៅអវកាសតាំងពីឆ្នាំ២០០០មក ក្រុមអវកាសយានិករុស្ស៊ី អាមេរិកាំង ជប៉ុនចេះបំពេញបានការពិសោធន៍វិទ្យាសាស្ត្រចំនួន៤០ បានចេញទៅធ្វើការនៅឯភាគខាងក្រៅនៃស្ថានីយនេះ គឺក្នុងលំហល្ហល្ហេវនៃអវកាសផ្ទាល់អស់ប៉ុន្មានលើកបានបំពេញអស់ប៉ុន្មានលើកដែរ ប្រតិបត្តិការខាងទទួលយានអវកាសរុស្ស៊ីធុន Progress ដែលផ្ទុកស្បៀងពីផែនដីទៅផ្គត់ផ្គង់ឧបត្ថម្ភដល់តម្រូវការគេមួយលើកៗទម្ងន់២តោន ក្នុងនោះ មានគ្រឿងបរិភោគ ទឹកហូប ខ្យល់អុកស៊ីហ្ស៊ែនសម្រាប់ដកដង្ហើម និងរបស់ប្រើប្រាស់ផ្សេងៗ។ ឥឡូវនៅបន្តបេសកកម្មក្នុងស្ថានីយអវកាសអន្តរជាតិ SSI មានអវកាសយនិកអន្តរជាតិមួយក្រុមផ្សេង មានគ្នា៣នាក់ដែរ តាមលេខរៀងជាក្រុមទី ៣៣ ក្នុងនោះគឺជាតិរុស្ស៊ី ២នាក់ និងជាតិអាមេរិកាំង ១នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ