ទាហានអ៊ីស្រាអែលបានវាយបកចំពោះការបាញ់ផ្លោងគ្រាប់រ៉ូកែតពីក្រុមជីហាតប៉ាឡេស្ទីន
នៅតំបន់ដើមបូព៌ា ភាពតានតឹងបានផ្ទុះឡើងមួយប្រាវរវាងអ៊ីស្រាអែល និងប៉ាឡេស្ទីន។ នៅយប់ថ្ងៃពុធ ទី១២ មីនា ទាហានអ៊ីស្រាអែលបានធ្វើការទម្លាក់គ្រាប់បែកលើទីតំាងមួយចំនួនរបស់ក្រុមជីហាតប៉ាឡេស្ទីនក្នុងតំបន់ហ្គាហ្សា ប៉ុន្មានម៉ោងបន្ទាប់ពីក្រុមជីហាតប៉ាឡេស្ទីនបានបាញ់ផ្លោងគ្រាប់រ៉ូកែតលើទឹកដីអ៊ីស្រាអែលប៉ែកខាងត្បូង។ នៅថ្ងៃព្រហស្សតិ៍ ទី១៣ មីនានេះ លោកប្រធានរដ្ឋអំណាចប៉ាឡេស្ទីនអាបាស់បានអំពាវនាវឲ្យអ៊ីស្រាអែលបញ្ឈប់ការវាយប្រហារលើទឹកដីប៉ាឡេស្ទីន។
ចុះផ្សាយនៅថ្ងៃ៖
ស្តាប់ - ០១:៤៨
បន្ទាប់ពីស្ថានការណ៍បានឡើងតានតឹងខ្លំាងកាលពីអធ្រាត្រយប់ថ្ងៃពុធ ទី១២ ឆ្លងចូលថ្ងៃព្រហស្បតិ៍ ទី១៣ មីនានេះមក អ្វីៗហាក់ដូចជាបានស្ងប់ស្ងាត់បន្តិចវិញហើយនៅព្រឹកថ្ងៃព្រហស្បតិ៍នេះ។ កងទ័ពអ៊ីស្រាអែលបានបើកអន្តរាគមន៍លើតំបន់ហ្គាហ្សាក្នុងដែនដីប៉ាឡេស្ទីន ដោយដំបូង បានធ្វើការបាញ់ផ្លោងគ្រាប់កំាភ្លើងត្បាល់ និងបន្ទាប់មក បានបើកប្រតិបត្តិការវាយប្រហារតាមផ្លូវអាកាស ដោយធ្វើការទម្លាក់គ្រាប់បែកលើទីតំាងផ្ទំាងស៊ីបប្រមាណជា ៣០កន្លែងដែលជាមូលដ្ឋានរបស់ក្រុមជីហាតអ៊ីស្លាម ព្រមទំាងទីតំាងរបស់ Brigades al-Qassam ដែលជាសាខាយោធារបស់ចលនាអ៊ីស្លាមហាម៉ាស់។
ការបើកអន្តរាគមន៍តាមផ្លូវយោធារបស់អ៊ីស្រាអែលលើតំបន់ហ្គាហ្សាក្នុងទឹកដីប៉ាឡេស្ទីនបានធ្វើឡើង ប៉ុន្មានម៉ោង ក្រោយពីក្រុមជីហាតប៉ាឡេស្ទីនបានបាញ់ផ្លោងគ្រាប់រ៉ូកែតប្រមាណជា ១០គ្រាប់លើទឹកដីអ៊ីស្រាអែលប៉ែកខាងត្បូង។ គ្រាប់រ៉ូកែតទំាងនោះបានធ្លាក់លើស្រុក ភូមិមួយចំនួនរបស់អ៊ីស្រាអែល តែមិនបានបណ្តាលឲ្យមានការខូចខាតទ្រព្យសម្បត្តិអ្វីធំដុំទេ។ រីឯប្រជាជនអ៊ីស្រាអែលទៀតសោតក៏ត្រូវបានរត់ចូលជ្រកកន្លែងសុវត្ថិភាពរួចជាស្រេច បន្ទាប់ពីបានឮស្នូរសម្លេងស៊ីរ៉ែនប្រាប់ជាមុនមក។ នៅខាងប៉ាឡេស្ទីនឯណោះ ការទម្លាក់គ្រាប់បែករបស់ទាហានអ៊ីស្រាអែលក៏មិនបានបណ្តាលឲ្យមានជនរងគ្រោះដែរ។
យ៉ាងណាក៏ដោយ ក្រុមជីហាតប៉ាឡេស្ទីនបានប្រកាសទទួលស្គាល់ជាផ្លូវការថា ជាស្នាដៃរបស់ខ្លួនដើម្បីសងសឹកនឹងការស្លាប់គ្នីគ្នាគេម្នាក់កាលពីថ្ងៃអង្គារ ទី១១ មីនានៅក្នុងការប៉ះទង្គិចគ្នាជាមួយកម្លំាងទាហានអ៊ីស្រាអែល។ រីឯចលនាហាម៉ាស់ដែលកំពុងកាន់អំណាចនៅក្នុងតំបន់ហា្គហ្សា និងរដ្ឋាភិបាលអ៊ីស្រាអែលបានទម្លាក់កំហុសដាក់គ្នាទៅវិញ ទៅមក។ តែចលនាហាម៉ាស់បានអះអាងនៅថ្ងៃនេះថា ខ្លួនមិនមានជាប់ពាក់ព័ន្ធនៅក្នុងព្រឹតិ្តការណ៍នោះទេ។ ទន្ទឹមគ្នានេះ លោកប្រធានរដ្ឋអំណាចប៉ាឡេស្ទីនអាបាស់បានអំពាវនាវឲ្យអ៊ីស្រាអែលបញ្ឈប់ការវាយប្រហារលើទឹកដីប៉ាឡេស្ទីនជាបន្ទាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ