ក្រុមមេធាវីថៃបរិហារការអនុវត្តច្បាប់អាជ្ញាសឹកលើស១០០ថ្ងៃ
ក្រុមមេធាវីថៃ បាននាំគ្នាបរិហារនៅថ្ងៃចន្ទទី ៨ កញ្ញានេះ ការបន្តអនុវត្តច្បាប់អាជ្ញាសឹក ក្នុងប្រទេស បើទោះបីជាហេតុការណ៍រដ្ឋប្រហារបានកន្លងទៅហួស១០០ថ្ងៃទៅក៏ដោយ។ សម្រាប់ក្រុមអ្នកច្បាប់ រដ្ឋាភិបាលយោធាថៃ បន្តរក្សាច្បាប់អាជ្ញាសឹក គឺដើម្បីទុកធ្វើជារនាំងបាំងបិទមិនឱ្យក្រុមអ្នកប្រឆាំងអាចប្រើប្រាស់ផ្លូវតុលាការបាន។
ចុះផ្សាយនៅថ្ងៃ៖
ស្តាប់ - ០១:៣៩
ច្បាប់អាជ្ញាសឹក ដែលរបបយោធាថៃបានដាក់បង្ខំ មុនពេលធ្វើរដ្ឋប្រហារបន្តិច គឺជាគ្រាន់តែជាលេសសម្រាប់បិទបាំងដំណើរការតុលាការ និងផ្តល់អំណាចទូលំទូលាយឱ្យដល់អាជ្ញាធរកាន់អំណាច ដោយគ្មានអ្នករារាំងបានតែប៉ុណ្ណោះ។ នេះជាខ្លឹមសារដែលក្រុមសមាគមមេធាវីថៃបានសរសរក្នុងរបាយការណ៍សិទ្ធិមនុស្សជូនទៅក្រសួងមហាផ្ទៃថៃនៅថ្ងៃចន្ទនេះ។
ការបញ្ចូលច្បាប់អាជ្ញាសឹកដើម្បីអាចចាប់ឃុំឃាំងមនុស្សម្នាក់បានលើសពី៧ថ្ងៃ គឺជាការល្មើសអំណាច។ នេះជាការរិះគន់របស់អង្គការក្រៅរដ្ឋាភិបាល ដែលបានប្រមូលបណ្តឹងជាង៨០ករណីពីបុគ្គលជាប់ទោសផ្ទាល់ ឬពីក្រុមសាច់ញាតិ ក្នុងចំណោមអ្នកជាប់ឃុំជាងមួយរយនាក់ ក្នុងជំរំយោធាសម្ងាត់ គ្មានទំនាក់ទំនងមកពិភពខាងក្រៅ តាំងពីថ្ងៃទី ២២ឧសភាមក។ ការកោះហៅ តាមកញ្ចក់ទូរទស្សន៍ រួចចាប់ផ្ទាល់ដល់កន្លែង ដែលដំបូងឡើយ មានជាប់ទាំងរូបលោកស្រីអតីតនាយករដ្ឋមន្ត្រី យីងឡាក់ផង។
ជាងបីខែក្រោយរដ្ឋប្រហារ កាត់ទោសដោយប្រើតុលាការយោធា មានកាន់តែច្រើនករណី។ មនុស្ស៥៧១នាក់ ភាគច្រើនជាអ្នកគាំទ្រអាវក្រហម ត្រូវបានកោះហៅយកទៅឃុំឃាំង និងមានយ៉ាងហោច៨៧នាក់ នឹងអាចរងការកាត់ទោសពីតុលាការ ៦៧នាក់ដោយតុលាការយោធា។ អតីតរដ្ឋមន្ត្រីក្រសួងអប់រំដែលមិនឆ្លើយតបនឹងការកោះហៅ អាចនឹងត្រូវជាប់ទោសជាច្រើនឆ្នាំ ពីបទអវត្តមានផង។
ដោយគ្មានបញ្ជាក់ថ្ងៃខែ អ្នកនាំពាក្យរដ្ឋាភិបាលយោធា បានលើកឡើងអំពីលទ្ធភាពនៃការដកច្បាប់អាជ្ញាសឹកចេញ ព្រោះក្រុមភ្នាក់ងារសន្តិសុខកំពុងសិក្សាហើយ ប៉ុន្តែបដិសេធការចោទប្រកាន់ ជុំវិញការធ្វើទារុណកម្មអ្នកទោស។ សមាគមមេធាវី ដោយរងសម្ពាធពីរដ្ឋាភិបាល លុបចោលរបាយការណ៍របស់ខ្លួន កាលពីសប្តាហ៍មុន ជាហេតុធ្វើឱ្យអង្គការសហប្រជាជាតិមានការព្រួយបារម្ភយ៉ាងខ្លាំងចំពោះស្ថានភាពនៅប្រទេសថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ