កិច្ចប្រជុំអង្គការអាកាសចរណ៍ស៊ីវិលអន្តរជាតិ ផ្តោតលើការកាត់បន្ថយការសាយភាយឧស្ម័នCO2
ប្រទេសទាំង១៩១នៃអង្គការអាកាសចរណ៍ស៊ីវិលអន្តរជាតិបានបើកកិច្ចពិភ្សាគ្នា ជាលើកទី ៣៩ នៅទីក្រុងម៉ុងរេអាល់ ដើម្បីដាក់ចេញយន្តការពិភពលោក កាត់បន្ថយការសាយភាយឧស្ម័នកាបូនិច ក្នុងទិសដៅ ចូលរួមទប់ស្កាត់ការកើនកំដៅផែនដី។ កិច្ចប្រជុំបើកធ្វើតាំងពីថ្ងៃអង្គារ ហើយត្រូវបញ្ចប់នៅថ្ងៃ៧តុលា។
ចុះផ្សាយនៅថ្ងៃ៖
ស្តាប់ - ០១:៤៤
យន្តការដែលអង្គការអាកាសចរណ៍ស៊ីវិលអន្តរជាតិចង់ដាក់ចេញនោះ មានឈ្មោះហៅកាត់ជាភាសាអង់គ្លេសថា Corsia មានទិសដៅកាត់បន្ថយការសាយភាយឧស្ម័នកាបូនិច បង្កឡើងដោយផ្នែកដឹកជញ្ជូនផ្លូវអាកាស។យន្តការនេះមិនទាក់ទងនឹងកិច្ចព្រមព្រៀងអាកាសធាតុក្រុងប៉ារីស Cop២១ទេ។
ក្នុងមួយថ្ងៃៗ អ្នកធ្វើដំណើរតាមយន្តហោះចេញទៅបរទេស មានចំនួនប្រហែល១០លាននាក់ ត្រូវនឹងការហោះហើរ១សែនជើងយន្តហោះ។ គិតទៅ ឧស្ម័នកាបូនិចដែលសាយភាយក្នុងបរិយាកាស មានប្រមាណ១,៣ភាគរយ នៃឧស្ម័នកាបូនិចដែលសាយភាយ ប្រចាំឆ្នាំ។ បើគិតទាំងការដឹកជញ្ជូនផ្លូវអាកាសក្នុងស្រុកទៀត ឧស្ម័ន CO2 ដែលសាយភាយចេញក្រៅ មានដល់ទៅ២ភាគរយ នៃបរិមាណប្រចាំឆ្នាំ។
យន្តការទប់ស្កាត់ការសាយភាយឧស្ម័នកាបូនិច ដែលអង្គការអាកាសចរណ៍ស៊ីវិលអន្តរជាតិចង់ដាក់ចេញ បើកាត់បន្ថយមិនបាន យ៉ាងហោចណាស់ក៏ត្រូវកំណត់ទិសដៅអោយបរិមាណឧស្ម័នពុលនេះ មានកម្រិតឋេរដដែល គឺមិនអោយកើនថែមទៀត។ អង្គការអាកាសចរណ៍ស៊ីវិលអន្តរជាតិ ចង់យ៉ាងហោចណាស់ ទប់ស្កាត់បរិមាណឧស្ម័ន CO2 ដែលសាយភាយ ក្នុងឆ្នាំ២០២០ខាងមុខ មិនអោយកើនលើសពីនោះដែរ។
យន្តការ Corsia បែងចែកជា២ដំណាក់កាល។ ដំណាក់កាលទី១ ជាដំណាក់កាលស្ម័គ្រចិត្ត ត្រូវអនុវត្តពីឆ្នាំ២០២១ ដល់ឆ្នាំ២០២៦។ បន្ទាប់មកទៀត ដំណាក់កាលទី២ ពីឆ្នាំ២០២៧ ដល់២០៣៥ ជាដំណាក់កាលត្រូវអនុវត្តដាច់ខាត។ ដំណាក់កាលទី២នេះ មិនបញ្ចូលប្រទេសក្រីក្រអោយធ្វើតាមទេ។
មិនដឹងថា តើគេអាចអនុវត្តយន្តការនេះកម្រិតណាទេ ព្រោះគេរំពឹងថា ការដឹកជញ្ជូនផ្លូវអាកាស និងអ្នកដំណើរ នឹងកើនចំនួនទ្វេដង ក្នុងពេលខាងមុខ។
ប្រទេស៥៩ មានកាណាដា សហរដ្ឋអាមេរិក អូស្ត្រាលី ចិន ជប៉ុន និងប្រទេសអឺរ៉ុប បានប្រកាសយល់ព្រមអនុវត្តដំណាក់កាលទី១នៃយន្តការ។ ដំណើរការផ្នែកដឹកជញ្ជូនអាកាសចរណ៍របស់ប្រទេសទាំង៥៩នេះ មាន ៨០ភាគរយ នៃដំណើរការហោះហើរក្នុងពិភពលោក។
ដោយឡែក រុស្ស៊ីនិងឥណ្ឌាជំទាស់ការអនុវត្តយន្តការនេះ។ ឥណ្ឌាលើកឡើងថា យន្តការនេះជាការដើរថយក្រោយ ហើយអាចប៉ះពាល់ផ្នែកដឹកជញ្ជូនផ្លូវអាកាសទៅវិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ