ព្យុះសង្ឃរានៅជប៉ុនបានសម្លាប់មនុស្ស៦នាក់ក្នុងនោះ៣នាក់ជាទាហានអាមេរិក
ព្យុះសង្ឃរាដ៏សែនសាហាវមួយ បានវាយប្រហារភាគកណ្តាលប្រទេសជប៉ុននៅព្រឹកថ្ងៃចន្ទ៦តុលានេះនិង បានឆ្លងកាត់ក្រុងតូក្យូមុននឹងវាយប្រហារបែរទៅទិសឥសាន្តប្រទេសវិញ ។ គ្រោះមហន្តរាយធម្មជាតិនេះដែលបានបណ្តាលមនុស្សស្លាប់និងបាត់ខ្លួន ជនចំនួន៦នាក់ក្នុងនោះក៏មានទាហានអាមេរិក៣នាក់។ មិនតែប៉ុណ្ណោះ ព្យុះសង្ឃរានេះក៏បានបណ្តាលឲ្យមានអ្នករងរបួសចំនួនជាង២០នាក់ ដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
អមជាមួយនឹងកម្លាំងខ្បល់បោកបក់ដ៏សែនសាហាវប្រកបដោយល្បឿន១៨០គមក្នុងមួយម៉ោងនិងការធ្លាក់ភ្លៀងទាំងមេៗ ព្យុះសង្ឃរាលើកទី១៨នេះ បានវាយប្រហារតាំងពីព្រឹកព្រលឹមក្នុងថ្ងៃចន្ទ៦តុលានេះ នៅលើកោះដ៏ចម្បងមួយរបស់ជប៉ុនឈ្មោះ ហុងស៊ូ(Honshu)ស្ថិតនៅចម្ងាយ២០០គមភាគនិរតីនៃរដ្ឋធានីតូក្យូ។
មហន្តរាយធម្មជាតិ បានជំរុញឲ្យមានភាពរអាក់រអួលយ៉ាងខ្លាំងនៅក្នុងការដឹកជញ្ជូនតាមផ្លូវអាកាស តាមផ្លូវអយស្ម័យាន្តនិងនៅតាមការដឹកជញ្ជូនផ្សេងៗទៀត។
ព្រមគ្នានេះ យន្តហោះចំនួន ៦០០គ្រឿង ត្រូវស្ថិតនៅស្កកស្កេកស្កះក្នុងព្រលានយន្តហោះ ដោយមានការលុបជើងហោះហើរចំនួន២១៦ ក្រោយពីមានជនរងគ្រោះស្លាប់និងបាត់ខ្លួន៦នាក់់។ ហើយក្នុងចំណោមជនរងគ្រោះ ក្នុងនោះ ៣នាក់ជាទាហានអាមេរិក។
ព្យុះសង្ឃរាដ៏សែនសាហាវនេះ ក៏បានបណ្តាលឲ្យមានអ្នករងរបួសប្រមាណជា២០នាក់ដែរនៅទូទាំងប្រទេស។គេសង្កេតឃើញមានការខូចខាតយ៉ាងសំបើមដែរ ទីលំនៅដ្ឋានរបស់ប្រជាជនជប៉ុននៅស៊ីបា (Chiba) ប៉ែកខាងកើតក្រុងតូក្យូ ជាពិសេស ដើមឈើជាច្រើនកន្លែងត្រូវបាក់ដួលរលំគ្មានសល់។
មហន្តរាយធម្មជាតិនេះ បានជះផលវិបាកខ្លាំងក្លាដែរទៅលើសកម្មភាពផលិតរថយន្តជប៉ុន ដូចជារោងចក្រ តូយូតា (Toyota) ត្រូវផ្អាកដំណើរការងាររបស់ខ្លួននៅតាមរោងចក្រចំនួន១២កន្លែងនៅព្រឹកមិញ។ ក៏ប៉ុន្តែ រោងចក្ររបស់ក្រុមហ៊ុនតូយូតាទាំងអស់នេះ ប្រហែលជាចាប់ដំណើរការងារឡើងវិញក្នុងពេលរសៀលនេះដែរ។
សូមបញ្ជាក់ថា នៅមុនពេលព្យុះសង្ឃរាបោកបក់មកដល់ ក្រសួងឧត្តុនិយមជប៉ុន បាន ប្រកាសសញ្ញាសន្នពិសេស ប្រាប់ប្រជាជនអំពីគ្រោះថ្នាក់នានាដែលអាចកើតឡើងដោយសារគ្រោះមហន្តរាយធម្មជាតិ។ រីឯ អាជ្ញាធរជប៉ុនវិញ បានអំពាវនាវ សុំឲ្យប្រជាជនខ្លួនប្រមាណ ៣០ ០០០០ជំលៀសចេញពីតំបន់រងគ្រោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ