អាមេរិកចុះហត្ថលេខាលើសន្ធិសញ្ញាគ្រប់គ្រងការជួញដូរសព្វាវុធ
កាលពីថ្ងៃពុធ សហរដ្ឋអាមេរិកបានសុខចិត្តចុះហត្ថលេខាលើសន្ធិសញ្ញាគ្រប់គ្រងការជួញដូរគ្រឿងសព្វាវុធ ដែលបង្កើតឡើង ក្នុងក្របខ័ណ្ឌអ.ស.ប។ ហត្ថលេខារបស់សហរដ្ឋអាមេរិក មានអត្ថន័យសំខាន់ ពីព្រោះថា អាមេរិកជាប្រទេសនាំចេញគ្រឿងសព្វាវុធច្រើនជាងគេបំផុតលើពិភពលោក។
ចុះផ្សាយនៅថ្ងៃ៖
ស្តាប់ - ០២:០១
ការចុះហត្ថលេខាលើសន្ធិសញ្ញាគ្រប់គ្រងការជួញដូរគ្រឿងសព្វាវុធ ត្រូវបានធ្វើឡើង ដោយលោកចន ឃែរី រដ្ឋមន្រ្តីការបរទេសអាមេរិក នៅក្នុងពិធីចុះហត្ថលេខា ដែលរៀបចំធ្វើឡើង នៅក្នុងទីស្នាក់ការអ.ស.ប នាទីក្រុងញូវយ៉ក។
សន្ធិសញ្ញាគ្រប់គ្រងការជួញដូរគ្រឿងសព្វាវុធ ដែលត្រូវបានអនុម័តដោយសមាជិកអ.ស.ប កាលពីខែមេសាកន្លងទៅ មានគោលដៅបង្កើនតម្លាភាព ក្នុងចលនាផ្ទេរគ្រឿងសព្វាវុធ ដើម្បីធានាថា អាវុធដែលគេជួញដូរនៅក្នុងទីផ្សារអន្តរជាតិមិនធ្លាក់ទៅក្នុងដៃក្រុមភេរវជន ឬក្រុមឧក្រិដ្ឋជនអន្តរជាតិ ឬក៏ត្រូវគេយកទៅប្រើប្រាស់ក្នុងទង្វើរំលោភសិទ្ធិមនុស្ស ក្នុងការប្រព្រឹត្តិឧក្រិដ្ឋកម្មប្រឆាំងមនុស្សជាតិ ឬបទប្រល័យពូជសាសន៍។
ទម្រាំតែសន្ធិសញ្ញាគ្រប់គ្រងការជួញដូរគ្រឿងសព្វាវុធនេះអាចអនុម័តចេញរួច ការចរចាបានអូសបន្លាយពេលយ៉ាងយូរ ជួបនឹងភាពស្មុគស្មាញច្រើន និងត្រូវជាប់គាំងជាច្រើនលើក។
ការដែលរដ្ឋាភិបាលអាមេរិកយល់ព្រមចុះហត្ថលេខាលើសន្ធិសញ្ញាគ្រប់គ្រងការជួញដូរគ្រឿងសព្វាវុធ កាលពីថ្ងៃពុធនេះ វាគឺជាជំហានដ៏សំខាន់មួយ ពីព្រោះថា ម្យ៉ាង គេសង្កេតឃើញថា នៅអាមេរិក មានចលនាប្រឆាំងខ្លាំងក្លាទៅនឹងសន្ធិសញ្ញានេះ ដោយសារតែពួកគេខ្លាចថា វាអាចប៉ះពាល់ដល់សិទ្ធិកាន់កាប់អាវុធរបស់ពលរដ្ឋអាមេរិក នៅក្នុងទឹកដីអាមេរិកខ្លួនឯង។ ម្យ៉ាងទៀត អាមេរិក គឺជាប្រទេសលក់អាវុធទៅក្រៅប្រទេសច្រើនជាងគេបង្អស់នៅលើពិភពលោក។ ទីផ្សារគ្រឿងសព្វាវុធប្រមាណជា ៣០% នៅទូទាំងពិភពលោក គ្រប់គ្រងដោយសហរដ្ឋអាមេរិក។ ដូច្នេះ ប្រសិនបើគ្មានការចូលរួមពីសំណាក់សហរដ្ឋអាមេរិកទេនោះ សន្ធិសញ្ញាគ្រប់គ្រងការជួញដូរគ្រឿងសព្វាវុធក៏មិនសូវជាមានប្រសិទ្ធភាពប៉ុន្មានដែរ។
នៅពេលនេះ អាមេរិកបានសុខចិត្តចុះហត្ថលេខាលើសន្ធិសញ្ញានេះ ក៏ប៉ុន្តែ នៅសល់ជំហានមួយដ៏សំខាន់ទៀត គឺការផ្តល់សច្ចាប័នពីសំណាក់សភាអាមេរិក។ នៅពេលណា ដែលសន្ធិសញ្ញាគ្រប់គ្រងការជួញដូរគ្រឿងសព្វាវុធចូលជាធរមាន គ្រប់ប្រទេសជាសមាជិកទាំងអស់ ទាំងប្រទេសនាំចេញ និងប្រទេសនាំចូលគ្រឿងសព្វាវុធ ត្រូវមានកាតព្វកិច្ចផ្តល់ព័ត៌មានដល់អគ្គលេខាធិការដ្ឋានអ.ស.ប អំពីបញ្ជីនៃគ្រឿងសព្វាវុធដែលជាកម្មវត្ថុនៃការជួញដូរ រាប់ចាប់តាំងពីអាវុធធុនស្រាល រហូតដល់រថក្រោះ មីស៊ីល និងយន្តហោះចម្បាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ