អង្គការសហប្រជាជាតិប្រកាសបើកចរចាលើសន្ធិសញ្ញាជួញដូរសព្វាវុធជាថ្មី
នៅថ្ងៃចន្ទទី ២៤ ធ្នូ ម្សិលមិញ អង្គការសហប្រជាជាតិបានអនុម័តយល់ព្រមឱ្យបើកការចរចាឡើងវិញ ដើម្បីឈានដល់ការបង្កើតសន្ធិសញ្ញាគ្រប់គ្រងការជួញដូរសព្វាវុធអន្តរជាតិ ជាលើកទីមួយ។ សន្ធិសញ្ញាអន្តរជាតិ ដែលសមាគមន៍អាមេរិកគាំទ្រការប្រើប្រាស់អាវុធ ដ៏មានឥទ្ធិពល ប្រឆាំងយ៉ាងខ្លាំង ព្រោះខ្លាចប៉ះពាល់ដល់សិទ្ធិប្រជាពលរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:០១
ក្នុងចំណោមសមាជិកទាំង១៩៣ របស់អង្គការសហប្រជាជាតិ ១៣៣ប្រទេសបានយល់ព្រម បើកការចរចាជាថ្មី ចាប់ពីថ្ងៃទី ១៨ ដល់ថ្ងៃទី២៨ មីនា ឆ្នាំ២០១៣ នៅទីក្រុងញូវយ៉ក។ មានតែ១៧ប្រទេសប៉ុណ្ណោះដែលបានបោះឆ្នោតអនុប្បវាទ។ នេះសបញ្ជាក់ឱ្យឃើញថា ប្រទេសជាសមាជិកអង្គការសហប្រជាជាតិភាគច្រើន គាំទ្រគំនិតបង្កើតសន្ធិសញ្ញា ដែលមានបទដ្ឋានអន្តរជាតិ មានតម្លាភាព និងការទទួលខុសត្រូវ ដើម្បីគ្រប់គ្រងការនាំចេញនាំចូលគ្រឿងសព្វាវុធ។ គ្មានព័ត៌មានលម្អិតទាក់ទងនឹងមហាសន្និបាត អ.ស.ប.យប់មិញទេ ប៉ុន្តែបើតាមអ្នកការទូត អាមេរិកក៏ទំនងបានបោះឆ្នោតយល់ព្រមដែរ។ នេះបើតាមការអបអររបស់ប្រទេសអ្នកផ្តួចផ្តើមធ្វើពង្រាងសន្ធិសញ្ញា។
សូមរំលឹកជូនថា កាលពីខែកក្កដា ឆ្នាំ២០១២ ការចរចារបស់អ.ស.ប. លើសន្ធិសញ្ញានេះ ត្រូវជួបនឹងបរាជ័យ ព្រោះកាលណោះ សហរដ្ឋអាមេរិក បានសុំពេលវេលាពិចារណាសិន និងមិនព្រមចុះហត្ថលេខាលើសេចក្តីព្រាងសន្ធិសញ្ញាទេ។ អ្នកការទូតជាច្រើននៅអង្គការសហប្រជាជាតិ យល់ថាពេលនោះ ប្រធានាធិបតីអាមេរិក បារ៉ាក់ អូបាម៉ា ខ្លាចរងការវាយប្រហារពីសំណាក់គូប្រជែងបក្សសាធារណរដ្ឋ ព្រោះជាពេលវេលាកំពុងឃោសនាបោះឆ្នោត។
ប៉ុន្តែពេលនេះ និងជាពិសេស ក្រោយមានហេតុការណ៍បាញ់សម្លាប់កុមារនិងគ្រូបង្រៀនអស់២៦នាក់ នៅសាលាបឋមសិក្សាមួយ ក្នុងរដ្ឋ Connecticut សមាគមអ្នកការពារការកាន់អាវុធអាមេរិក NRA (National Rifle Association) ឬក្រុម Lobby ដែលប្រឆាំង យ៉ាងខ្លាំងនឹងសន្ធិសញ្ញាគ្រប់គ្រងការជួញដូរអាវុធអន្តរជាតិ បានទទួលរងការរិះគន់យ៉ាងខ្លាំង។ ហេតុការណ៍បាញ់សម្លាប់មនុស្ស បានកើតបន្តបន្ទាប់គ្នាឥតឈប់។ ម្សិលម្ងៃមានខ្មាន់កាំភ្លើងម្នាក់ទៀត បានបាញ់សម្លាប់អ្នកពន្លត់អគ្គិភ័យពីរនាក់ នៅភាគឦសានសហរដ្ឋ។ ម្យ៉ាងទៀត លោក បារ៉ាក់ អូបាម៉ា ដែលទើបជាប់ឆ្នោតប្រធានាធិបតី បានបង្ហាញ ដោយចំហ ចេតនាចង់ចរចាសម្រេចសន្ធិសញ្ញាអន្តរជាតិនេះឡើងវិញដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ