បញ្ហាកម្មករចំណាកស្រុកវៀតណាមដែលបានធ្វើការដូចទាសាទាសីនៅរុស្ស៊ី
បញ្ហានេះ ត្រូវបានក្រុមអ្នកយកការណ៍របស់ BBC ទម្លាយឲ្យដឹងយប់ថ្ងៃ ២៣ សីហាម្សិលមិញ។ សាច់រឿងគឺអំពីកម្មករ កម្មការិនីវៀតណាម៧៥នាក់ ដែលបានធ្វើការដូចទាសាទាសី ក្នុងរោងចក្រកាត់ដេរមួយនៅជាយក្រុងម៉ូស្គូ ដែលមានជាតិវៀតណាមផ្ទាល់ជាថៅកែ។ ទោះបីស្ថានទូតវៀតណាមនៅរុស្ស៊ី ប្រកាសមិនលូកដៃចូលក្នុងទំនាស់នៅរោងចក្រនោះក្តី ក៏នៅទីបំផុត បានបង់ថ្លៃយន្តហោះ ឲ្យពួកគេភាគច្រើនបានត្រឡប់ទៅស្រុកវិញទៅ។
ចុះផ្សាយនៅថ្ងៃ៖
ស្តាប់ - ០២:៤៧
គឺតាំងពីដើមខែសីហាម៉្លេះ ដែលក្រុមអ្នកយកការណ៍របស់ BBC បានទៅតាមដាននៅផ្ទាល់កន្លែង អំពីដំណឹងដែលថា រោងចក្រកាត់ដេរនោះឈ្មោះ Vinastar បានប្រើពលកម្ម ជាទាសាទាសី តែម្តង។ កម្មករ កម្មការិនីវៀតណាម៧៥នាក់ នៃរោងចក្រនោះ តាមសំដីគេផ្ទាល់ គឺត្រូវថៅកែ បង្ខំឲ្យធ្វើការ ៧ថ្ងៃជាប់ក្នុង១សប្តាហ៏ ហើយ១ថ្ងៃៗ ធ្វើការដល់ទៅ១៨ម៉ោង។ ពួកគេ នាំគ្នាត្អូញត្អែរថា ហូបចុកមិនដែលឆ្អែតទេ ហើយត្រូវហាមឃាត់មិនឲ្យ ដើរចេញទៅក្រៅពី បរិវេណដែនដីរោងចក្រឡើយ។ ពីប្រាក់ខែប្រមាណ២៣០ដុល្លារ គេត្រូវបង់អស់១៨០ដុល្លារ សម្រាប់ថ្លៃបាយតែ២ដងក្នុង១ថ្ងៃ និងថ្លៃស្នាក់នៅទាំងប្រជ្រៀតគ្នា ក្នុងកូនបន្ទប់តែ៤សម្រាប់គ្នា៧៥នាក់នោះ។
តបនឹងសំណូមពរ BBC សមត្ថកិច្ចរុស្ស៊ី ក៏បានអន្តរាគមន៍ទៅពិនិត្យមើលសភាពការណ៍ នៅទីនោះ ហើយបានសង្កេតឃើញ មានសញ្ញានៃឧក្រិដ្ឋកម្ម តាមបទ”បានឆ្លងកាត់ព្រំដែនរដ្ឋរុស្ស៊ី ដោយខុសច្បាប់”។ តាមពួកមន្ត្រី នៃស្ថាប័នអន្តោប្រវេសន៍រុស្ស៊ី គឺអាចចងក្រង ជាសំណុំរឿង ព្រហ្មទណ្ឌ តាមបទ” ប្រើកម្លាំងពលកម្មជាទាសាទាសី” និង”បំបិទសេរីភាពបុគ្គលដោយ ខុសច្បាប់” ដែលអាចត្រូវកាត់ទោស ឲ្យជាប់ពន្ធនាគារដល់ ៥ឆ្នាំ ហើយប្រសិន ជាបណ្តាលឲ្យអ្នក រងគ្រោះធ្លាក់ខ្លួនដល់ស្លាប់ នោះគឺអាចត្រូវកាត់ទោស ឲ្យជាប់ពន្ធនាគារដល់១៨ឆ្នាំ។
ប៉ុន្តែ ប៉ូលីស ដែលប្រហែលជាត្រូវគ្នាជាមួយថៅកែរោងចក្រ បែរទៅជាថ្លែងថា ក្នុងរោងចក្រ នោះ គ្មានសញ្ញាអ្វីណា ដែលសឲ្យឃើញពី ការប្រើពលកម្មជាទាសាទាសី និងពីករណី បំពាន លើច្បាប់អន្តោប្រវេសន៍ឡើយ។
BBC ក៏រំលឹកថា កាលពីឧសភា ដោយទ្រាំមិនបាននឹងល័ក្ខខ័ណ្ឌធ្ងន់ធ្ងរនៃការងារ ជាងកាត់ដេរ ទាំងនោះ បាននាំគ្នាធ្វើកូដកម្ម។ ថៅកែរោងចក្រ បានអញ្ជើញតំណាងស្ថានទូតវៀតណាម នៅម៉ូស្គូឲ្យទៅជួបកម្មករទាំង៧៥នាក់នោះ។ អ្នកការទូតវៀតណាម បានរំលឹកប្រាប់កម្មករទាំងនោះថា គេបានចុះកុងត្រាជាផ្លូវការ ហើយគេត្រូវតែគោរពតាម។ លុះកូដកម្មនោះចប់ទៅ ពួកគេ ត្រូវបានថៅកែវៀតណាម វ៉ៃធ្វើបាបយ៉ាងចាស់ដៃ។ ប៉ុន្តែ ស្ថានទូតវៀតណាម ក្រោយមក បានថ្លែងបដិសេធ ទៅលើការចោទប្រកាន់ដែលថា ថៅកែបានប្រព្រឹត្តសកម្មភាពខុសច្បាប់អ្វីណាទៅលើកម្មករ។ លេខាទី១នៃស្ថានទូត បានថ្លែងទៅ BBC ថា កម្មករទាំងនោះដែលមក រុស្ស៊ី គឺដើម្បីធ្វើការមិនមែនដើម្បីបះបោរឡើយ។
តាមដំណឹងចុងក្រោយ រោងចក្រកាត់ដេរនោះ បិទទ្វារឈប់ដើរទៅហើយ រួចពីក្នុងចំណោម កម្មករ៧៥នាក់នោះ ២១នាក់ត្រូវបានឃាត់ខ្លួនឲ្យនៅរុស្ស៊ីសិន ចំពោះការចូលមកក្នុងប្រទេស រុស្ស៊ីដោយខុសច្បាប់ ចំណែក៥៤នាក់ទៀត ត្រូវបានស្ថានទូតវៀតណាមនៅរុស្ស៊ីបង់ថ្លៃសំបុត្រយន្តហោះ ឲ្យគេត្រឡប់ទៅស្រុកវិញទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ