អាជ្ញាធរវៀតណាមចាប់ខ្លួនអ្នកទទួលខុសត្រូវផ្លូវដែក៤រូប ពីបទពុករលួយក្នុងគំរោងជំនួយជប៉ុន
សារព័ត៌មានផ្លូវការវៀតណាម បានចុះផ្សាយនៅថ្ងៃពុធនេះថា អ្នកទទួលខុសត្រូវវិស័យផ្លូវដែក៤រូប ត្រូវបានអាជ្ញាធរវៀតណាមចាប់ខ្លួនពីបទពុករលួយ ក្នុងគំរោងសាងសង់ផ្លូវដែកមួយ នៅហាណូយ។ ប៉ុន្តែ គេមិនដឹងថា តើជនទាំង៤រូបនេះ ត្រូវចាប់ខ្លួនតាំងពីពេលណានោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ក្នុងចំណោមអ្នកទទួលខុសត្រូវវិស័យផ្លូវដែកវៀតណាម ទាំង៤រូប ដែលអាជ្ញាធរ បានចាប់ខ្លួន ពីបទពុករលួយនោះ គេឃើញមានរូបលោក Tran Quoc Dong ប្រធានរងទូទៅវិស័យផ្លូវដែក ជាប់ចោទពីបទខ្វះកាតព្វកិច្ចទទួលខុសត្រូវ។ ជន៣រូបទៀត ជាប់ចោទពីបទបំពានអំណាចក្នុងការងារ។
រឿងអាស្រូវពុករលួយក្នុងគម្រោងសាងសង់ផ្លូវដែក នៅហាណូយ ដែលនាំទៅដល់ការចាប់ខ្លួនអ្នកទទួលខុសត្រូវផ្នែកផ្លូវដែក៤រូបនេះ គឺទាក់ទងនឹងប្រាក់កុំមីស្យុង ផ្តល់អោយដោយការិយាល័យប្រឹក្សាជប៉ុនមួយកន្លែង។ កាលពីខែមិនា ក្រុមហ៊ុនប្រឹក្សាផ្នែកដឹកជញ្ជូនជប៉ុន បានប្រាប់ថា បានបើកការស៊ើបអង្កេតផ្ទៃក្នុង ក្រោយពេលសារព័ត៌មានបានចុះផ្សាយថា តុលាការបានកោះហៅសួរអគ្គនាយកក្រុមហ៊ុន ក្នុងសំណុំរឿងនេះ។ សារព័ត៌មានចុះផ្សាយថា អគ្គនាយកក្រុមហ៊ុនរូបនោះគឺលោក កាគីនូម៉ា ប្រហែលជាបានទទួលស្គាល់ថា បានផ្តល់លុយកាក់អោយដល់មន្ត្រីរដ្ឋការនៅវៀតណាម ឥណ្ឌូណេស៊ី និងអ៊ូបេគីស្ថាន។ ប្រាក់ពុករលួយទាំងនេះមានប្រមាណជា១៣០លានយេន មិនដល់មួយលានអឺរ៉ូទេ។ មន្ត្រីរដ្ឋការផ្លូវដែកវៀតណាមអាចបានទទួល៨០លានយេន ដើម្បីផ្តោះប្តូរជាមួយការទាមទារគម្រោងសាងសង់នៅហាណូយ ដែលមានទឹកប្រាក់៤ពាន់២រយលានយេន។
វៀតណាមបានសន្យាសហការជាមួយអាជ្ញាធរជប៉ុនដើម្បីដាក់ទណ្ឌកម្មជនសង្ស័យ។ នៅ វៀតណាម ជប៉ុនជាប្រទេសផ្តល់ជំនួយចំបងទី១។ ក្នុងឆ្នាំ២០១៣កន្លងទៅ វៀតណាមបានទទួលជំនួយជប៉ុន សម្រាប់ការអភិវឌ្ឍន៍ ក្នុងទឹកប្រាក់២ពាន់៦រយលានដុល្លារ។ កាលពីឆ្នាំ២០០៨ ជប៉ុនធ្លាប់បានព្យួរជំនួយខ្លួន៤ខែ ដោយសាររឿងអាស្រូវពុករលួយដូចគ្នានេះដែរ។ តុលាការវៀតណាមបានកាត់ទោសប្រធានរងផ្នែកដឹកជញ្ជូន នៅហូជីមិញ អោយជាប់ពន្ធនាគារ២០ឆ្នាំ ជាប់ចោទពីបទទទួលប្រាក់សំណូកជាង២សែន៦ម៉ឺនអឺរ៉ូ ពីក្រុមហ៊ុនមួយនៅតូក្យូ សម្រាប់គំរោងសាងសង់ផ្លូវមួយ។ វៀតណាមស្ថិតក្នុងចំណោមប្រទេសរងអំពើពុករលួយខ្ពស់បំផុត ក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ