ឥណ្ឌូណេស៊ី៖ តុលាការកាត់ទោសអតីតប្រធានរដ្ឋសភាអោយជាប់ពន្ធនាគា១៥ឆ្នាំ ពីបទអំពើពុករលួយ
នាថ្ងៃអង្គារទី២៤នេះ តុលាការប្រទេសឥណ្ឌូណេស៊ីបានធ្វើការកាត់ទោសអតីតប្រធានរដ្ឋសភា ដែលជាអ្នកនយោបាយមានឥទ្ធិពលមួយរូប អោយជាប់ពន្ធនាគារយៈពេល១៥ឆ្នាំ ពីបទអំពើពុករលួយនិងកេងប្រវ័ញ្ចថវិការាប់លានដុល្លាតាមរយៈគម្រោងអត្តសញ្ញាណប័ណ្ណអេឡិចត្រូនិចរបស់រដ្ឋាភិបាល។ អ្នកនយោបាយផ្សេងទៀត មន្រ្តីរដ្ឋាភិបាល និងអ្នកជំនួញមួយចំនួន ត្រូវបានរកឃើញថា មានជាប់ពាក់ព័ន្ធក្នុងសំណុំរឿងនេះដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
រដ្ឋាភិបាលឥណ្ឌូណេស៊ីបានបញ្ចេញកញ្ចប់ថរិកាចំណាយចំនួន៤៤០លានដុល្លា សម្រាប់គម្រោងបង្កើតអត្តសញ្ញាណប័ណ្ណអេឡិចត្រូនិច កាលពីឆ្នាំ២០១១និង២០១២។
តុលាការបានរកឃើញថា អតីតប្រធានរដ្ឋសភាឥណ្ឌូណេស៊ី វ័យ៦២ឆ្នាំ លោក Setya Novanto បានផ្សំគំនិតក្នុងសកម្មភាពកេងប្រវ័ញ្ចថវិកាចំនួន១៧០លានដុល្លាពីគម្រោងបង្កើតអត្តសញ្ញាណប័ណ្ណអេឡិចត្រូនិចនោះ ហើយរូបលោកផ្ទាល់ទទួលបានជាង៧លានដុល្លាក្នុងរឿងនេះ។
យោងតាមការរកឃើញនេះ តុលាការបានសំរេចកាត់ទោសលោក Novanto អោយជាប់ពន្ធនាគារយៈពេល១៥ឆ្នាំ បង់ប្រាក់ពិន័យចំនួន៣៦ពាន់ដុល្លា ព្រមទាំងហាមឃាត់ មិនអោយកាន់តំណែងក្នុងជួររដ្ឋាភិបាលក្នុងរយៈពេល៥ឆ្នាំ ក្រោយចេញពីពន្ធនាគាវិញ កាលពីថ្ងៃអង្គារទី២៤ឆ្នាំ២០១៨នេះ។
តុលាការក៏បានសំរេចអោយលោក Novanto សងត្រលប់ទៅវិញនូវប្រាក់ជាង៧លានដុល្លាដែលលោកទទួលបាន ហើយអតីតប្រធានរដ្ឋសភារូបនេះ នឹងត្រូវជាប់ពន្ធធនាគារ២ឆ្នាំបន្ថែមទៀត ប្រសិនបើទ្រព្យសម្បត្តិរបស់លោកពុំគ្រប់ចំនួនទឹកប្រាក់ដែលត្រូវសងត្រលប់ទៅវិញទេ។
លោក Novanto បាននិយាយថា លោកត្រូវការពេលវេលាដើម្បីពិចារណារឿងបដិសេធសេចក្តីសម្រេចនេះនិងប្តឹងទៅឧទ្ធរណ៍។
តាមការអោយដឹងរបស់ក្រុមរដ្ឋអាជ្ញា ក្រៅពីលោក Novanto នៅមានមន្ត្រីរដ្ឋាភិបាល សមាជិកសភា ព្រមទាំងក្រុមហ៊ុនឯកជន សរុបទាំងអស់ប្រមាណ៨០នាក់ទៀត ដែលត្រូវបានចោទប្រកាន់ថាបានចូលដៃក្នុងការលួចថវិការតាមរយៈគម្រោងអត្តសញ្ញាណប័ណ្ណអេឡិចត្រូនិចនេះ។
សូមរំលឹកថា កាលពីខែធ្នូឆ្នាំ២០១៧ បន្ទាប់ពីព្យាយាមគេចចេញពីការសាកសួរជាច្រើនលើករបស់ភ្នាក់ងារប្រឆាំងអំពើពុករលួយ លោក Novanto បានក្លែងបន្លំធ្វើជារបួសក្នុងគ្រោះថ្នាក់ចរាចរឡានមួយ ក្នុងគោលបំណងគេចខ្លួនចេញពីការហៅចូលបំភ្លឺក្តីរបស់តុលាការ។ តែលោកត្រូវបានមន្ត្រីប៉ូលីសចាប់ខ្លួននៅមន្ទីរពេទ្យ ហើយមេធាវីរបស់លោក រួមទាំងគ្រូពេទ្យដែលបានផ្សំគំនិតរឿងគ្រោះថ្នាក់ចរាចរណ៍ក្លែងក្លាយនេះ ក៏ត្រូវជាប់ទោសផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ