ជំនួយបន្ទាន់បញ្ជូនទៅកោះបាលី សម្រាប់ជនភៀសខ្លួនពីភ្នំភ្លើងសកម្ម
នៅឥណ្ឌូណេស៊ី ភ្នំភ្លើងAgung កាន់តែសកម្មគួរអោយបារម្ភ តែអាជ្ញាធរមិនដឺងថា វានឹងផ្ទុះពេលណាប្រាកដទេ។ រថយន្តកាំម្ញ៉ុងដឹកស្បៀងជំនួយបន្ទាន់ បានបញ្ជូនទៅកោះបាលី ដើម្បីជួយមនុស្សជាង៧ម៉ឺន៥ពាន់នាក់ដែលត្រូវបានជម្លៀសចេញពីតំបន់ក្បែរភ្នំភ្លើង។ ប្រធានាធិបតីឥណ្ឌូណេស៊ី ចូកូ វីដូដូ ត្រូវចុះសួរសុខទុក្ខប្រជាជនទាំងនេះ នៅបាលី រសៀលថ្ងៃអង្គារនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៤
ប្រជាជនកោះបាលី អង្គការអន្តរជាតិជាច្រើន និងអាជ្ញាធរក្នុងស្រុក បានរៀបចំដឹក ស្បៀងជំនួយបន្ទាន់ មានជាម្ហូបអាហារ ភួយកន្ទេល ម៉ាសមុខ និងថវិកាផ្សេងៗ សន្ធឹកសន្ធាប់ ដើម្បីជួយមនុស្សរាប់ម៉ឺននាក់ ដែលបានភៀសខ្លួនពីភ្នំភ្លើងសកម្ម Agung នៅឥណ្ឌូណេស៊ី។ អ្នកភៀសខ្លួនពីភ្នំភ្លើងសកម្មទាំងនេះ ត្រូវការអាហារអង្ករ មីឆុង ប្រេងនិងទឹកជាចាំបាច់។ ពួកគេបានភៀសទៅនៅតាមមជ្ឈមណ្ឌលរាប់រយកន្លែង នៅបាលី។ អ្នកខ្លះទៀត ទៅរស់នៅបណ្តោះអាសន្នជាមួយបងប្អូន។
Agung ចាប់ផ្តើមអង្រួនតាំងតែពីខែសីហាមក។ អាជ្ញាធរបានប្រកាសអាសន្នតាំងពីថ្ងៃសុក្រមក។ មនុស្សប្រមាណជា៦ម៉ឺន២ពាន់នាក់រស់នៅតំបន់គ្រោះថ្នាក់ និងអ្នកនៅមិនឆ្ងាយពីតំបន់នេះផងដែរ បាននាំគ្នាភៀសខ្លួន។ សត្វគោជិត២ពាន់ក្បាល នៅជុំវិញភ្នំភើ្លងសកម្មមួយនេះ ក៏ត្រូវបានជម្លៀសចេញដែរ។ ទោះយ៉ាងនេះក្តី អាជ្ញាធរបាលីប្រាប់ប្រជាជន កុំអោយស្លន់ស្លោ ប៉ុន្តែ ត្រូវត្រៀមជានិច្ច ករណីមានការផ្ទុះភ្នំភ្លើងនេះឡើង។
ឥណ្ឌូណេស៊ីមានទីតាំងភូមិសាស្ត្រចំលើក្រវ៉ាត់ភ្លើងតំបន់ប៉ាស៊ីហ្វិក ជាហេតុធ្វើអោយប្រទេសនេះងាយជួបគ្រោះរញ្ជួយដី និងភ្នំភ្លើងញឹកញាប់។ ភ្នំភ្លើងសកម្ម Agung ដែលធ្វើអោយគេបារម្ភពេលនេះ មានកម្ពស់ជាង៣០០០ម៉ែត្រ នៅប្រមាណជា៧៥គីឡូម៉េត្រ ពីក្រុងទេសចរគូតា។ Agung សំងំមកជាងកន្លះសតវត្សហើយ។ កាលពីឆ្នាំ១៩៦៣ ភ្នំភ្លើងមួយនេះ បានផ្ទុះឡើង បញ្ចេញផ្សែងរហូតដល់ក្រុងចាកាតា។ កាលនោះ មនុស្ស ជាងមួយពាន់នាក់បានបាត់បង់ជីវិតដោយគ្រោះភ្នំភ្លើងមួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ