ប៉ូលិសតាមចាប់ជនសង្ស័យពីរនាក់ថ្មី អង្កេតមានដានឡើងព្រាលៗ
ជនសង្ស័យថ្មីពីរនាក់ទៀត ម្នាក់ជាស្ត្រីជនជាតិថៃ ពាក់អាវរុំជិតសល់តែរង្វង់មុខ និងម្នាក់ទៀតជាប្រុស គ្មានកំណត់អត្តសញ្ញាណ ជាផ្ទាំងស្ទីបថ្មីនៃការស្វែងរកចាប់ខ្លួនរបស់ប៉ូលិស ក្នុងក្របខ័ណ្ឌនៃការអង្កេតលើភេរវកម្មនៅបំផ្ទុះគ្រាប់បែកនៅទីក្រុងបាងកក កាលពីថ្ងៃទី ១៧ សីហា។ នេះបើបានការជូនដំណឹងរបស់ប៉ូលិស ជាមួយនឹងដីការតាមចាប់ខ្លួនជនសង្ស័យទាំងពីរ នៅថ្ងៃចន្ទនេះ។ ពីរសប្តាហ៍ក្រោយភេរវកម្ម នៅតែគ្មានក្រុមណាចេញមុខទទួលស្គាល់ស្នាដៃ ឯការអង្កេតកំពុងទៅមុខ ប៉ូលិសថៃជាថ្មីម្តងទៀត មិនច្រានចោលដានស្រាវជ្រាវណាមួយឡើយ។
ចុះផ្សាយនៅថ្ងៃ៖ កែប្រែថ្ងៃទី៖
រូបថត នាង វណ្ណា សួនសាន មានអាយុប្រមាណ២៦ឆ្នាំ ភេទស្រី ស្លៀកពាក់ខ្មៅរុំសល់តែប្រឡង់មុខ ត្រូវបានបង្ហាញជាសាធារណៈ ព្រោះនាងរស់នៅក្នុងផ្ទះ ដែលប៉ូលិសរកឃើញមានធាតុនិងគ្រឿងផ្ទុះ កាលពីថ្ងៃអាទិត្យ។ ចំនែកបុរសម្នាក់ទៀត គេមិនស្គាល់អត្តសញ្ញាណ និងសញ្ជាតិទេ។ ប៉ូលិសបានត្រឹមឱ្យតម្រុយជាគំនូរភិនភាគថា ជាជនបរទេស រស់នៅជាមួយនាងវណ្ណា សួនសាន មានពុកមាត់រ៉ុយៗ និងសក់ក្បាលពណ៌ត្នោត។
នៅថ្ងៃអាទិត្យម្សិលមិញ ប៉ូលិសថៃបានបើកយុទ្ធនាការរុករក ក្នុងអាគារស្នាក់នៅមួយ ជាយក្រុងបាងកក ភាគខាងជើង ត្រង់សង្កាត់ដែលចាប់បានខ្លួនជនសង្ស័យទីមួយ កាលពីថ្ងៃសៅរ៍ ទើបរកឃើញមានសម្ភារៈបរិក្ខារជាធាតុផ្ទុះ សម្រាប់ផលិតជាគ្រាប់បែកឆ្នៃ ដូចជាស្បោងជីរគីមី នាឡិកា ប្រព័ន្ធវិទ្យុ ... និងគ្រឿងផ្ទុះ។ នេះបើតាមការគូសបញ្ជាក់របស់អ្នកនាំពាក្យប៉ូលិស លោក ប្រាយុទ្ធ ថាវ៉នស៊ីរី នៅព្រឹកមិញ។
ជនសង្ស័យទីមួយមិនសហការជាមួយប៉ូលិស
ជាការពិតណាស់ ដែលថាភាពអសកម្មភាព និងការមិនព្រមសហការរបស់ជនសង្ស័យទីមួយ មិនបានសម្រួលដល់កិច្ចការអង្កេត។ ថ្វីបើប៉ូលិសថៃពុំទាន់បញ្ជាក់លម្អិត និងរកឃើញអំពីទំនាក់ទំនងរវាងជនសង្ស័យទីមួយ និងជនសង្ស័យទីពីរនិងទីបី ព្រមទាំងវត្ថុតាងនៅក្នុងផ្ទះក៏ពិតមែន ប៉ុន្តែគេឃើញមានស្នាមធាតុTNT នៅជាប់នឹងខ្លួនជនសង្ស័យទីមួយ ចាប់ខ្លួនបានកាលពីថ្ងៃសៅរ៍។
ប៉ូលិសថៃ នៅមិនទាន់កំណត់បានថាបុរសនេះពិតជាអ្នកដាក់គ្រាប់បែក ឱ្យផ្ទុះនៅក្រុងបាងកកកាលពីថ្ងៃទី ១៧ សីហា ឬគ្រាន់តែជាបានចូលរួមចំណែកផលិតគ្រាប់ទេ ទើបមានប្រលាក់ជាប់ស្នាមTNT។ ក្រុមអ្នកអង្កេតកំពុងធ្វើ ប្រមូលភស្តុតាងរឹបអូសយកបាននៅកន្លែងចាប់ខ្លួន និងស្នាមអាដេអិន ដែលមានជាប់លើអាវ មានប្រលាក់ជាតិTNT ព្រមទាំងទិន្នន័យក្នុងទូរស័ព្ទមកវិភាគរួមគ្នា។ តែអ្វីដែលអាជ្ញាធរថៃជឿជាក់ និងប្រាកដក្នុងចិត្តខ្លាំង គឺបុរសនេះច្បាស់ជាមានពាក់ព័ន្ធនឹងភេរវកម្មដែលសម្លាប់ជីវិតមនុស្សអស់២០នាក់ និងរបួសជាង១២០នាក់ កណ្តាលរាជធានី។
ដោយផ្អែកលើភស្តុតាងច្បាស់ៗទាំងអស់នេះ ប៉ូលិសថៃសង្ឃឹមថានឹងទទួលបានចម្លើយខ្លះពីជនសង្ស័យទៅមួយ ដោយនៅថ្ងៃចន្ទនេះ ប៉ូលិសបានផ្តើមចោទសួរជាថ្មី។ ព្រោះបើតាមច្បាប់នៅក្នុងប្រទេសថៃ ជនសង្ស័យអាចស្ថិតនៅក្រោមការ ឃាត់ខ្លួន និងឃុំឃាំង ក្នុងមណ្ឌលសួរចម្លើយយោធា ត្រឹមតែ៧ថ្ងៃប៉ុណ្ណោះ។ ហើយរហូតមកទល់ពេលនេះ គ្មានព័ត៌មានបញ្ជាក់ច្បាស់លាស់ ស្តីពីអត្តសញ្ញាណជនសង្ស័យ ត្រូវបានបង្ហើបរកឃើញទេ។ លិខិតឆ្លងដែនតួកគីដែលនៅជនជាប់សង្ស័យប្រើសម្រាប់ធ្វើដំណើរ ទំនងជាលិខិតឆ្លងដែនក្លែងក្លាយផង។ រូបជនសង្ស័យតែម្នាក់នេះ មានលិខិតឆ្លងដែនដល់ទៅជាង១០ ហើយ នៅពេលចាប់ខ្លួននិងឆែកឆេរក្នុងផ្ទះ ប៉ូលិសប្រមូលបានលិខិតឆ្លងដែនក្លែងក្លាយដល់ជាង២០០។
សេចក្តីថ្លែងការណ៍ចម្រូងចម្រាស
ជាមួយនឹងការវិវឌ្ឍន៍ចុងក្រោយនេះ គឺពិតណាស់ដែលថាប៉ូលិសថៃពេលនេះមានដានអង្កេត ច្បាស់លាស់ជាងមុន មិនមែនត្រឹមជាសម្មតិកម្ម ឬការសន្និដ្ឋានទេ។ ដានភេរវកម្មដែលអាចធ្វើឡើងដើម្បីសងសឹកនឹងទង្វើក្រុងបាងកកបញ្ជូនចេញជនជាតិអ៊ុយហ្គួរ ជាងពីររយនាក់ កាលពីខែកក្កដា ទៅចិនដែលមាននយោបាយគាបសង្កត់និងបង្ក្រាបខ្លាំង ក្រុមជនជាតិភាគតិចអ៊ីស្លាមនិយាយភាសាតួកគី ! ក្រុមជនជាតិភាគតិចអ៊ីស្លាមតួកគីនេះ បានបង្កើនអំពើហិង្សាច្រើន ដោយជាញឹកញយច្រើនវាយប្រហារដោយកាំបិត និងមិនធ្លាប់ធ្វើសកម្មភាពឆ្លងចេញពីប្រទេសចិន ឬវាយប្រហារតាមបែបទំនើបខ្លាំង ដូចនៅក្នុងការបំផ្ទុះគ្រាប់បែកនៅក្រុងបាងកកនេះឡើយ។
ក្រោយភេរវកម្មភ្លាម និងក្នុងរយៈពីរសប្តាហ៍កន្លងមកនេះ អាជ្ញាធរថៃ បានធ្វើសេចក្តីសន្និដ្ឋានម្តងអញ្ចេះ ម្តងអញ្ចុះ ចោទក្រុមប្រឆាំងរដ្ឋាភិបាល ក្រុមអ៊ីស្លាមជ្រុលនិយមនៅភាគខាងត្បូង ក្រុមអ៊ីស្លាមជ្រុលនិយមអ៊ុយហ្គួរ…។ សម្មតិកម្មចុងក្រោយគេបង្អស់ ដែលក្រុមអ្នកអង្កេតហាក់ផ្តល់អាទិភាពជាងគេ គឺក្រុមឈ្មួញរកស៊ីផលិតលិខិតឆ្លងដែនខុសច្បាប់ ចង់សងសឹកនឹងនយោបាយរឹតបន្តឹងថៃដែលដឹកនាំដោយរបបសឹកតាំងពីខែឧសភា២០១៤មក ដោយមកពីប្រមូលលិខិតឆ្លងដែនខុសច្បាប់បានច្រើន។
កាលពីល្ងាចថ្ងៃសៅរ៍ មេប៉ូលិសថៃ បានលើកឡើងអំពីជម្លោះឯកជន និងបន្តជឿតិចតួចថា បំផ្ទុះគ្រាប់បែកថ្ងៃទី១៧សីហា ជាភេរវកម្មរបស់ក្រុមភេរវនិយមអន្តរជាតិ។ ទាំងប៉ូលិស ទាំងរបបដឹកនាំសឹក សុទ្ធតែបានច្រានចោលម្តងជាពីរដង ទង្វើភេរវកម្មអន្តរជាតិលើទឹកដីថៃ ប៉ុន្តែរាល់សេចក្តីថ្លែងការណ៍ទាំងអស់នោះហាក់ដូចជាពិបាកជឿ និងដូចជាចម្រូងចម្រាសគ្នាខ្លាំង បង្កបង្កើតតែភាពសង្ស័យនិងមិនទុកចិត្តកាន់តែខ្លាំងលើសកម្មភាពអង្កេត។
ទើបតែនៅថ្ងៃនេះ ដែលអ្នកនាំពាក្យរបបសឹក បានបញ្ជាក់ជាថ្មី តាមកញ្ចក់ទូរទស្សន៍ ដោយសង្កត់ធ្ងន់ៗថាមិនច្រានចោលសេណារីយោណាទាំងអស់ និងសុំទុកភារៈឱ្យក្រុមអង្កេតធ្វើការរកមូលហេតុពិតប្រាកដដែលលាក់បង្កប់ពីក្រោយភេរវកម្មក្រុងបាងកក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ