ផ្ទុះគ្រាប់បែកក្រុងបាងកក៖ ស្នាដៃរបស់ក្រុមភេរវកម្ម
ការស៊ើបអង្កេត ក្រោយហេតុការណ៍បំផ្ទុះគ្រាប់បែក នៅកណ្តាលក្រុងបាងកក កាលពីថ្ងៃចន្ទទី ១៧ សីហា ដែលបណ្តាលឲ្យមានមនុស្សស្លាប់ ២០នាក់ នៅមិនទាន់មានពន្លឺច្បាស់លាស់នៅឡើយ។ បើទោះបីជាជនដៃដល់ដែល ជាអ្នកដាក់គ្រាប់បែក ត្រូវបានគេថតរូបបាន ក៏រហូតមកដល់ពេលនេះ គេនៅមិនទាន់ចាប់ជននោះបាននៅឡើយដែរ។ អាជ្ញាធរថៃ នៅមិនទាន់កំណត់មុខសញ្ញា ថាជនដៃដល់ ជាក្រុមមកពីខាងណានោះទេ តែគ្រាន់តែបានបញ្ជាក់ថា វាជាស្នាដៃរបស់មនុស្សមួយក្រុម ដែលមានគ្នាយ៉ាងហោចណាស់ ១០នាក់ ដែលបានចូលរួម ធ្វើអំពើភេរវកម្មនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:០៩
មិនមែនជាអំពើរបស់បណ្តាញភេរវកម្មអន្តរជាតិ៖
គិតមកត្រឹមពេលនេះ អាជ្ញាធរថៃ នៅមិនទាន់ធ្វើការសន្និដ្ឋានឲ្យច្បាស់ការណ៍នោះទេ។ លោក សំយុទ្ធ ភុំផាន់មួង អគ្គបញ្ជាការនគរបាលថៃ បានថ្លែងប្រាប់អ្នកកាសែត នៅថ្ងៃព្រហស្បតិ៍នេះថា បើតាមការសន្និដ្ឋានជាបឋម ភេរវកម្មនេះ អាចជាស្នាដៃរបស់មនុស្សយ៉ាងហោចណាស់ ក៏១០នាក់ដែរ។ លោកបញ្ជាក់ថា ឆ្លងតាមការវិភាគរបស់នគរបាល ជនដៃដល់មានគ្នាច្រើនផ្សេងទៀត ដែលនៅចាំយាមផ្លូវ និងចាំជួយរំដោះ ជនដៃដល់ បន្ទាប់ពីដាក់គ្រាប់បែករួចរាល់។
ការសន្និដ្ឋានមួយទៀត គឺទាក់ទងនឹងការផ្ទុះលើកទីពីរ នៅថ្ងៃបន្ទាប់។ យោងតាមប្រសាសន៍មេប៉ូលីសថៃដដែល គ្រាប់បែកដែលបានដាក់បំផ្ទុះទាំងពីរលើក ជាប្រភេទគ្រាប់បែកឆ្នៃ ម្សៅ TNT ដូចគ្នាបេះបិទ។ ដូច្នេះនគរបាលថៃសន្និដ្ឋានថា វាគឺជាស្នាដៃ របស់មនុស្ស រឺក្រុមតែមួយ។
ទោះបីជាយ៉ាងណាក៏ដោយ នៅថ្ងៃព្រហស្បតិ៍នេះ លោក វីនថៃ ស៊ុរ៉ាវី អ្នកនាំពាក្យរដ្ឋាភិបាលយោធាថៃ បានបញ្ជាក់ថា តាមការប៉ាន់ស្មាន ក្រុមមនុស្សដែលបង្ករអំពើភេរវកម្មនេះ អាចនឹងមិនជាប់ពាក់ព័ន្ធ នឹងបណ្តាញភេរវកម្មអន្តរជាតិទេ។
រង្វាន់១លានបាត ដល់អ្នកដែលផ្តល់ព័ត៌មាន៖
យោងតាមការថតរូបបាន ពីម៉ាស៊ីនថតសុវត្ថិភាព នៅកន្លែងកើតហេតុ បានបង្ហាញថា ជនដៃដល់ជាជនបរទេស ស្បែកស ភេទប្រុស ខ្ពស់ មានពាក់វ៉ែនតា។ ជននេះ បានយកកាបូបស្បាយខ្នង យកទៅទុកចោលនៅក្រោមបង់អង្គុយ នៅកន្លែងកើតហេតុ។ ហើយប៉ុន្មាននាទីក្រោយមក គ្រាប់បែកក៏ផ្ទុះឡើងតែម្តង។
ក្រោយហេតុការណ៍ភ្លាម មានការផ្សព្វផ្សាយទូទាំងប្រទេសថៃ ជាពិសេសតាមច្រកចេញចូល អន្តរជាតិ ដូចជាព្រលានយន្តហោះជាដើម ឲ្យមានការប្រុងប្រយ័ត្ន ដើម្បីឃាត់ទុកមនុស្សណា ដែលមានភិនភាគប្រហាក់ប្រហែល និងជនដៃដល់ ដែលគេថតរូបបាន។ បុរសជនបរទេសម្នាក់ ក៏ត្រូវបានអាជ្ញាធរថៃ ធ្វើការឃាត់ខ្លួនផងដែរ នៅព្រលានយន្តហោះសុវណ្ណភូមិ ក្រុងបាងកក ដោយសារតែបុរសនេះ មានរូបរាង្គ ភិនភាគស្រដៀងនឹងជនដៃដល់។ បុរសនោះត្រូវបានគេដោះលែង ទៅវិញហើយ ក៏ប៉ុន្តែត្រូវបានគេហាមឃាត់ មិនទាន់ឲ្យ ធ្វើដំណើរចេញពីប្រទេសថៃទេ។
នៅថ្ងៃព្រហស្បតិ៍នេះផងដែរ លោក ប្រធានការិយាល័យនគរបាលអន្តរជាតិថៃ អភិឆាដ ស៊ុរីប៊ុនយ៉ា បានប្រាប់អ្នកយកព័ត៌មានបារាំងថា ថៃនឹងធ្វើការស្នើសុំកំណត់ហេតុព័ណខៀវ ទៅស្នងការនគរបាលអន្តរជាតិInterpol ។ កំណត់ហេតុព័ណខៀវនេះ មានន័យថា ថៃសុំទៅ Interpol ដើម្បីឲ្យ Interpol ប្រគល់ព័ត៌មានសំខាន់ៗ ទាក់ទិននឹងប្រវត្តិរូប ព្រមទាំងសកម្មភាពផ្សេងៗរបស់ជនសង្ស័យ ដែលគេថតរូបបាន នៅកន្លែងកើតហេតុ។ រដ្ឋាភិបាលបានប្រកាសសន្យា ផ្តល់ប្រាក់រង្វាន់ ចំនួន១លានបាត ដល់នរណាដែលអាចផ្តល់ព័ត៌មាន ឈានទៅដល់ការចាប់ខ្លួន ជនសង្ស័យ។
ភេរវកម្មសំដៅ បង្កចលាចល និងវាយប្រហារវិស័យទេសចរណ៍ថៃ៖
អ្វីដែលគេមិនអាចប្រកែកបាន គឺថាកម្មវត្ថុនៃភេរវកម្មនេះ គឺធ្វើយ៉ាងណាបង្ករឲ្យមានអ្នករងគ្រោះច្រើនបំផុត ហើយមួយទៀត គឺបង្ករការភ័យខ្លាច និងចលាចល ក្នុងសង្គមថៃ។ លោក ប្រាយុទ្ធ ចន្ទអូចា ប្រមុខរដ្ឋាភិបាលយោធាថៃ បានចាត់ទុកអំពើភេរវកម្មនេះ ជាករណីវាយប្រហារដ៏ធ្ងន់ ទៅលើសង្គមថៃ មិនដែលធ្លាប់មាន តាំងពីមុនមក។ ព្រោះអី្វ? ព្រោះថា វាបានសំដៅ សម្លាប់ជនរងគ្រោះ ដែលជាជនស្លូតត្រង់មិនដឹងអី។ ហើយមួយទៀត គឺវាសំដៅ ធ្វើឲ្យរង្គើរវិស័យទេសចរណ៍ ដែលជាសរសរទ្រូងនៃសេដ្ឋកិច្ចថៃ។
លោក ប្រាយុទ្ធ ចន្ទអូចា ថ្លែងបែបនេះ ដោយសំដៅថា គ្រាប់បែកត្រូវបានគេបំផ្ទុះនៅ កណ្តាលក្រុងបាងកក ចំកន្លែងដែលមានទីបូជនីយដ្ឋានតាមបែបសាសនាឥណ្ឌូ ឈ្មោះ អ៊ីរ៉ាវ៉ាន់។ កន្លែងនេះ តាមធម្មតា មានមនុស្សម្នា មកបន់ស្រន់ រឺក៏មកអង្គុយលេង ច្រើនណាស់ ហើយភាគច្រើនជាអ្នកទេសចរបរទេសទៀត។
ជាក់ស្តែង ក្នុងចំណោមអ្នកស្លាប់ទាំង២០នាក់ មានជនជាតិថៃ៥នាក់ ចិន២នាក់ ម៉ាឡេ២នាក់ សឹង្ហបុរី ១នាក់ ចិនហុងកុង២នាក់ ឥណ្ឌូណេស៊ីម្នាក់ និងជនជាតិអង់គ្លេសម្នាក់។ នៅមានអ្នកស្លាប់៦នាក់ទៀត ដែលគេមិនទាន់ដឹង ពីអត្តសញ្ញាណនៅឡើយ។ ដូច្នេះតាមប្រសាសន៍ លោក ប្រមុខរដ្ឋាភិបាលថៃ វាជាការវាយប្រហារ ដើម្បីបង្ករអស្ថិរភាព ក្នុងសង្គមថៃ ហើយព្រមទាំង ធ្វើឲ្យអ្នកទេសចរបរទេស មានការភ័យខ្លាច។
ស្នាដែ ក្រុមជនជាតិអ៊ុយហ្គួរ?
ជាដំបូងគេបានគិតទៅដល់ថា វាអាចជាស្នាដៃរបស់ក្រុមឧទ្ទាមផ្តាច់ទឹកដី សាសនាអ៊ីស្លាម នៅភាគខាងត្បូងប្រទេសថៃ។ ប៉ុន្តែលោក អនុរដ្ឋមន្ត្រីក្រសួងការពារជាតិថៃ បានច្រានចោលការសង្ស័យនេះ ព្រោះថាក្រុមអ៊ីស្លាមនៅភាគខាងត្បូង មិនដែលធ្វើសកម្មភាព នៅតំបន់ណាផ្សេង ក្រៅពីភាគខាងត្បូងទេ ហើយគ្រាំបែក ក៏មិនមែនប្រភេទដូចគ្នា នឹងអាវុធដែលពួកនេះធ្លាប់ប្រើដែរ។
តាមធម្មតា ពេលមានហេតុការណ៍បែបនេះ គេតែងតែគិតថា វាជាស្នាដែរបស់អ្នកដែលឈ្លោះ ជាមួយរដ្ឋាភិបាលថៃ ហើយចង់វាយប្រហាររដ្ឋាភិបាលនេះ។ ជាការពិតមែន អាជ្ញាធរថៃ បានដាក់ការសង្ស័យ ទៅលើក្រុមជនជាតិអ៊ុយហ្គួរ ដែលជាជនជាតិភាគតិតសាសនាអ៊ីស្លាម នៅខេត្តស៊ីនជាំង ភាគខាងកើតប្រទេសចិន។ គេសង្ស័យថា ក្រុមនេះ អាចសងសឹកទៅលើរដ្ឋាភិបាលថៃ ដែលបានបញ្ជូនជនជាតិអ៊ុយហ្គួរ ១០៩ នាក់ឲ្យត្រឡប់ទៅស្រុកចិនវិញ កាលពី ប៉ុន្មានសប្តាហ៍មុននេះ។ ប៉ុន្តែការសង្ស័យនេះ ធ្វើឲ្យអ្នកវិភាគឯករាជ្យ មួយចំនួន គេមិនយល់ស្របទេ ព្រោះក្រុមជនជាតិអ៊ុយហ្គួរ មិនដែល ធ្វើសកម្មភាព នៅក្រៅប្រទេសចិនទេ។ បើនិយាយអញ្ចឹង ប្រទេសកម្ពុជាយើងក៏អាចប្រឈមមុខនឹងការវាយប្រហារភេរវកម្មពីក្រុមនេះផងដែរ ព្រោះរដ្ឋាភិបាលកម្ពុជា ក៏ធ្លាប់បញ្ជូនជនភៀសខ្លួនអ៊ុយហ្គួរ ឲ្យត្រឡប់ទៅស្រុកចិន វិញដែរ។
រឺមួយជាឆាកល្ខោន ដែលរៀបចំដោយរដ្ឋាភិបាលយោធាថៃ?
អាជ្ញាធរថៃ ក៏មិនបានសង្ស័យ ថាវាអាចជាស្នាដៃរបស់ក្រុមអាវក្រហម ដែលជាក្រុមស្មោះស្ម័គ្រនឹង គ្រួសារលោកថាក់ស៊ីនដែរ។ ប៉ុន្តែទាំងនេះ ជាការសង្ស័យ ដែលយើងគិតថា វាមកពីខាងក្រៅ ពីក្រុមដែលប្រឆាំងនិងស្អប់រដ្ឋាភិបាលយោធាថៃ។ ប៉ុន្តែចុះបើវាមកពីខាងក្នុង? ចុះបើវាជាការរៀបចំទាំងស្រុងរបស់ក្រុមយោធាថៃវិញ?
ចំណុចនេះ មិនទាន់ដែលមានអ្នកណាលើកឡើងដោយចំហរនោះទេ។ វាអាចជាករណី ស្វាស៊ីបាយ លាបមាត់ពពែ។ យើងកុំភ្លេចថា ជាមួយនឹងហេតុការណ៍នេះ រដ្ឋាភិបាលយោធាថៃ ដែលដឹកនាំដោយលោកមេទ័ព ប្រាយុទ្ធ ចន្ទអូចា និងបន្ត ប្រើច្បាប់អាជ្ញាសិក ដឹកនាំប្រទេសថៃតទៅទៀត ដោយយកលេសថា ប្រទេសថៃកំពុងជួបអស្ថិរភាព ហើយត្រូវការការពារសន្តិសុខ ជាអាទិភាព។
ទោះបីជាយ៉ាងណា ក្រោយហេតុការណ៍នេះ យើងឃើញថា ប្រជាជនថៃ អ្នកក្រុងបាងកក មានការភ័យខ្លាចច្រើន មិនហ៊ានចេញដើរទៅណា ជាពិសេសនៅតាមទីប្រជុំជន។ អត្រាលុយបាត បានធ្លាក់ថ្លៃជាខ្លាំងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ