ចិន-ហ្វីលីពីន៖លោកឌុយទែរតេសារភាពត្រង់ៗថា មកចិនដើម្បីសុំជំនួយសេដ្ឋកិច្ច
លោកប្រធានាធិបតីហ្វីលីពីនឌុយទែរទេកំពុងបន្តបំពេញទស្សនកិច្ចក្នុងប្រទេសចិន។ នៅក្នុងបទសម្ភាសន៍ជាមួយទូរទស្សន៍ចិនមួយឈ្មោះ CCTV នាថ្ងៃពុធ ទី១៩ តុលា លោកប្រមុខរដ្ឋហ្វីលីពីនបានថ្លែងសារភាពត្រង់ៗថា លោកមកប៉េកាំងពេលនេះដើម្បីសុំជំនួយសេដ្ឋកិច្ចចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
« ខ្ញុំនិយាយដោយស្មោះត្រង់មិនលាក់លៀម ខ្ញុំមកដើម្បីសុំជំនួយពីអ្នក។ ដង្ហើមសេដ្ឋកិច្ចហ្វីលីពីនមានតែមួយគត់ គឺចិន » នេះជាពាក្យសម្តីរបស់លោកប្រធានាធិបតីហ្វីលីពីនឌុយទែរតេនៅក្នុងបទសម្ភាសន៍មួយជាមួយកាណាល់ទូរទស្សន៍ចិន CCTV នាថ្ងៃពុធ ទី១៩ តុលា។ ដោយមិនឆ្លើយតបចំៗនឹងការថ្លែងរបស់លោកឌុយទែរតេ អ្នកនាំពាក្យក្រសួងការបរទេសចិនលោកស្រីហួរ ជុនយីងបានថ្លែងនៅក្នុងសន្និសីទកាសែតប្រចាំថ្ងៃថា ចិនសាទរលើការរីកចម្រើនឆ្ពោះទៅរកដំណោះស្រាយលើភាពខុសគ្នាតាមផ្លូវកិច្ចសន្ទនា និងពិគ្រោះយោបល់។
ទន្ទឹមគ្នានេះ លោកស្រីហួរ ជុនយីងក៏បានគូសបញ្ជាក់ដោយប្រើឃ្លាភ្ញាក់ផ្អើលថា « នេះហើយជាផ្លូវដែលប្រទេសមិត្តជិតខាងទាំងពីរត្រូវដោះស្រាយរួមគ្នា »។ គឺសញ្ញានៃការហុចដៃរកចិនតាំងពីដំបូងរបស់លោកឌុយទែរតេនេះហើយបានជាលោកត្រូវបានចិនផ្តល់កិត្តិយសធំធេង និងទទួលដៃពីរដោយលោកប្រមុខការទូតចិនវ៉ាង យីតាំងពីដាក់ជើងជាន់ទឹកដីចិននៅឯព្រលានយន្តហោះនារាត្រីថ្ងៃទី១៨ តុលា។ នៅថ្ងៃព្រហស្បតិ៍ ទី២០ តុលានេះ លោកឌុយទែរតេទទួលជួបដោយលោកប្រធានាធិបតីស៊ី ជីនពីង និងលោកនាយករដ្ឋមន្រ្តីលី ខឺជាំង។
សូមជម្រាបជូនថា ហ្វីលីពីនដែលស្ថិតក្រោមអាណានិគមអាមេរិកដល់ឆ្នាំ ១៩៤៦ គឺសម្ព័ន្ធមិត្តចាក់ទឹកមិនលេចម្នាក់របស់អាមេរិកដែលបានចងភ្ជាប់គ្នាដោយសន្ធិសញ្ញាការពារទ្វេភាគី។ តែខុសពីលោកប្រធានាធិបតីអាគីណូដែលបានឱបជើងអាមេរិកស្អិត និងចេញមុខតទល់ខ្លាំងនឹងចិន លោកឌុយទែរតេបែរជាជ្រើសយកនយោបាយការបរទេសទាត់អាមេរិកចោល រួចទៅឱបជើងចិន និងរុស្ស៊ីទៅវិញ។ លោកឌុយទែរតេថែមទាំងបានបញ្ជាក់ច្បាស់ៗថា ហ្វីលីពីនឈប់ធ្វើសមយុទ្ធជាមួយអាមេរិក ហើយបែរទៅធ្វើជាមួយចិន និងរុស្ស៊ីវិញ និងថា ហ្វីលីពីនក៏ត្រូវការទិញគ្រឿងសព្វាវុធពីចិនដែរ។
ទាក់ទងនឹងជម្លោះនៅសមុទ្រចិនខាងត្បូងដែលហ្វីលីពីនកំពុងមានជាមួយចិនក៏លោកឌុយទែរទេធ្លាប់បានអះអាងថា ហ្វីលីពីនចង់បង្វែរពីការប្រឈមមុខដាក់គ្នាមកជាការចរចាទ្វេភាគីដើម្បីចែកប្រយោជន៍គ្នានៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ