សមុទ្រចិនខាងត្បូង៖ចិនបរិហារវត្តមាននាវាចម្បាំងអាមេរិកដោយចាត់ទុកជាទង្វើបង្ករឿង
នៅយប់ថ្ងៃសុក្រឆ្លងចូលថ្ងៃសៅរ៍ ទី២២ តុលានេះ ប្រទេសចិនបានចេញមុខបរិហារអាមេរិកដែលបានបញ្ជូននាវាចម្បាំងខ្លួនចូលក្បែរតំបន់ជម្លោះក្នុងសមុទ្រចិនខាងត្បូង។ សម្រាប់ប៉េកាំង វត្តមាននាវាចម្បាំងអាមេរិកក្នុងសមុទ្រចិនពេលនេះជារឿងខុសច្បាប់ និងជាទង្វើបង្ករឿងដោយចេតនា។
ចុះផ្សាយនៅថ្ងៃ៖
ស្តាប់ - ០១:៥៩
ប្រតិកម្មរបស់ចិនប្រឆាំងនឹងវត្តមាននាវាចម្បាំងអាមេរិកក្នុងសមុទ្រចិនខាងត្បូងត្រូវបានធ្វើឡើងតាមរយៈសេចក្តីប្រកាសព័ត៌មានចំនួនពីរដាច់ដោយឡែកពីគ្នា ទី១ ជារបស់ក្រសួងការពារជាតិ និងទី២ ជារបស់ក្រសួងការបរទេស។ ក្រសួងការពារជាតិចិនបានបញ្ជាក់ថា នាវាចម្បាំងចិនចំនួន ២គ្រឿងបានចេញប្រតិបត្តិការរារាំងនាវាចម្បាំងអាមេរិកមិនឲ្យបន្តដំណើរទៅមុខ បន្ទាប់ពីនាវានោះបានឆ្លងចូលក្នុងដែនទឹកចិនក្បែរទីប្រជុំកោះ Paracels។ នៅក្នុងសេចក្តីប្រកាសព័ត៌មាននេះដដែល ក្រសួងការពារជាតិចិនបានចាត់ទុកវត្តមាននាវាចម្បាំងអាមេរិកជារឿងខុសច្បាប់ និងជាការបង្ករឿងដោយចេតនា។
ចំណែកសេចក្តីប្រកាសព័ត៌មានរបស់ក្រសួងការបរទេសវិញបានថ្លែងថា ទង្វើរបស់អាមេរិករបៀបនេះបានរំលោភបំពានយ៉ាងធ្ងន់ធ្ងរលើអធិបតេយ្យភាព និងផលប្រយោជន៍សន្តិសុខរបស់ចិន ព្រមទាំងរំលោភបំពានលើច្បាប់ចិន និងអន្តរជាតិផងដែរ។ ប្រតិកម្មខ្លាំងៗរបស់ចិនពេលនេះបានធ្វើឡើង បន្ទាប់ពីក្រសួងការពារជាតិអាមេរិកបានបញ្ជាក់នៅថ្ងៃសុក្រ ទី២១ តុលាថា អាមេរិកពិតជាបានបញ្ជូននាវាចម្បាំងរបស់ខ្លួនទៅក្បែរទីប្រជុំកោះ Paracels ក្នុងសមុទ្រចិនខាងត្បូងមែន តែបានគោរពតាមនីតិវិធីច្បាប់អន្តរជាតិដោយមិនបានរំលោភលើដែនអធិបតេយ្យរបស់ប្រទេសណាមួយទេ។
គិតតាំងពីដើមឆ្នាំ ២០១៦ មក នេះជាលើកទី៣ ហើយដែលអាមេរិកបានបញ្ជូននាវាចម្បាំងរបស់ខ្លួនទៅក្បែរទីប្រជុំកោះ Paracels ដើម្បីចង់បញ្ជាក់ពីសេរីភាពក្នុងការធ្វើចរាចរណ៍សមុទ្រដែលអាមេរិកយល់ថា ជាដែនទឹកអន្តរជាតិ ពោលមិនមែនជាកម្មសិទ្ធិរបស់ប្រទេសណាមួយទេ។ តែបញ្ហានៅត្រង់ថា ចិនមិនបានយល់ឃើញដូចអាមេរិកឯណា និងបានបន្តទាមទារជារបស់ខ្លួនទាំងស្រុងដោយមិនញញើតប្រឈមមុខទល់ប្រទេសអាស៊ានមួយចំនួន ពិសេសវៀតណាម និងហ្វីលីពីន។ ដើម្បីបង្ហាញពីសិទ្ធិ និងមហិច្ឆិតារបស់ខ្លួន ចិនថែមទាំងបានធ្វើការសាងសង់កោះសិប្បនិម្មិតនៅក្នុងតំបន់ទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ