តម្លៃភ្លុកដំរីធ្លាក់ចុះខ្លាំងនៅទីផ្សារចិន
ក្តីសង្ឃឹមមួយកំពុងកើតមានសម្រាប់សត្វដំរី ក្នុងលោក ដែលកំពុងប្រឈមនឹងការកាប់សម្លាប់របស់អ្នកប្រមាញ់ ដើម្បីភ្លុក។ តាមការសិក្សាមួយរបស់អង្គការដើម្បីជួយសង្រ្គោះសត្វដំរី Save the elephants តម្លៃភ្លុកដំរី នៅឆ្នាំនេះ បានថយចុះខ្លាំង នៅទីផ្សារចិន ពោល គឺច្រើនជាង ពាក់កណ្តាល ប្រមាណ ២ភាគ៣ បើប្រៀបធៀបទៅនឹងឆ្នាំ ២០១៤។ អ្នកជំនាញខាងសត្វដំរី សង្ឃឹមថា ការហាមបិទអាជីវកម្មលក់ភ្លុកសត្វដំរី នៅឆ្នាំនេះ នៅប្រទេសចិន នឹងជួយឲ្យគេស្រោចស្រង់បានច្រើន ជីវិតសត្វដំរីនៅតំបន់អាហ្វ្រិក។
ចុះផ្សាយនៅថ្ងៃ៖
សម្រាប់អ្នកជំនាញខាងការពារ និងអភិរក្សសត្វដំរី វាជាដំណឹងល្អមួយ ដែលតម្លៃភ្លុកដំរីធ្លាក់ចុះខ្លាំងនៅផ្សារ ក្នុងប្រទេសចិន។ តាមការសិក្សា ដែលធ្វើ និងបង្ហាញឡើងដោយអង្គការដើម្បីសង្រ្គោះសត្វដំរី នៅក្នុងសន្និសីទកាសែត នៅថ្ងៃពុធ ភ្លុកដំរី មានតម្លៃ ៧៣០ដុល្លារ នៅ ឆ្នាំ ២០១៧ ពោលគឺចុះអស់ ២ភាគ៣ បើប្រៀបធៀបនឹងឆ្នាំ ២០១៤ ដែលកាលណោះ ភ្លុកដំរី មួយគីឡូ ត្រូវគេលក់ក្នុងតម្លៃ ២១០០ដុល្លារ ក្នុងទីផ្សារងងឹតចិន។
ចិនដែលជាអ្នកទិញប្រើប្រាស់ភ្លុកដំរី ច្រើនជាងគេក្នុងលោក ត្រូវបានគេវាយតម្លៃថា ជាដើមហេតុ ធ្វើឲ្យមានការប្រមាញ់ វិនាសផុតពូជសត្វដំរីនៅទ្វីបអាហ្វ្រិក។ នៅប៉ុន្មានទសវត្សរ៍ចុងក្រោយនេះ ការប្រមាញ់ សម្លាប់សត្វដំរីបានកើនឡើងខ្លាំង នៅតំបន់អាហ្វ្រិក ដើម្បីឆ្លើយតបនឹងតម្រូវការដែលចេះតែកើនឡើងនៅប្រទេសចិន។ តាមតួលេខផ្តល់ដោយសម្ព័ន្ធអន្តរជាតិដើម្បីសត្វដំរី សព្វថ្ងៃនេះ ទ្វីបអាហ្វ្រិកមានដំរីប្រមាណ តែ ជាង៤សែនក្បាល គឺថយចុះអស់ជាង១សែនក្បាល។ ក្នុងមួយឆ្នាំៗ មានសត្វដំរីប្រមាណ៣ម៉ឺនក្បាលត្រូវគេបាញ់សម្លាប់យកភ្លុក ដើម្បីលក់នៅទីផ្សារងងឹត។
ទាំងតម្លៃ និងចំនួនភ្លុកដាក់តាំងលក់នៅតាមហាង ក្នុងប្រទេសចិនបានថយចុះ ដោយសារតែការធ្លាក់ចុះនៃតម្រូវការរបស់អតិថិជនចិន។ សម្រាប់អ្នកស្រីLucy Vigne អ្នកនិពន្ធម្នាក់នៃការសិក្សារបស់អង្គការ Save the elephants ការយល់ដឹងរបស់ប្រជាជនចិនពីផលប៉ះពាល់ ដោយសារតែការទិញភ្លុកដំរី ជាមូលហេតុមួយធ្វើឲ្យតម្លៃភ្លុកដំរីធ្លាក់ចុះ។ ប៉ុន្តែ គឺការប្រយុទ្ធប្រឆាំងនឹងអំពើពុករលួយ ហើយនិងកំណើនសេដ្ឋកិច្ចនៅទ្រឹងរបស់ចិន ដែលហេតុផលសំខាន់ ធ្វើឲ្យតម្រូវការភ្លុកសត្វដំរីថយចុះ។ ក្នុងអតីតកាល ប្រជាជនចិន ចូលចិត្តប្រើភ្លុកដំរី ដើម្បីឆ្លាក់ច្នៃជាវត្ថុសក្ការៈ ដូចជារូបព្រះពុទ្ធ ត្រា ឬចង្កឹះជាដើម។ ប៉ុន្តែ នៅប៉ុន្មានឆ្នាំចុងក្រោយនេះ យុទ្ធនាការផ្សព្វផ្សាយ របស់រដ្ឋាភិបាលបានបង្ហាញប្រជាជនចិនបានយល់ដឹងពីទំនាក់ទំនងគ្នា នៃការប្រើប្រាស់វត្ថុធ្វើភ្លុក ហើយនិងការប្រមាញ់ បាញ់សម្លាប់សត្វដំរី ដើម្បីយកភ្លុក។ នៅចុងខែធ្នូកន្លងទៅ រដ្ឋាភិបាលចិនបានប្រកាសថា ពីពេលនេះ រហូតដល់ចុងឆ្នាំ ២០១៧ គេនឹងបិទ ហាមលែងឲ្យមានលក់ភ្លុកដំរី។
តម្លៃភ្លុកដំរី បានថយចុះនៅទីផ្សារចិនមែន ប៉ុន្តែ វានៅតែខ្ពស់ នៅទីផ្សារងងឹត ភូមា វៀតណាម និងឡាវ ជាទីដែលជំនួញភ្លុកដំរីនៅតែសកម្ម និងជាគោលដៅសំខាន់របស់អតិថិជនមកពីប្រទេសចិន។ ផ្លូវដើរទៅរកការលុបបំបាត់ចោលការសម្លាប់សត្វដំរីយកភ្លុក នៅវែងតទៅទៀត ប៉ុន្តែ អ្នកជំនាញ និងអភិរក្សសត្វដំរី នៅតែសង្ឃឹមថា ការធ្លាក់តម្លៃ ហើយនិងចំនួនអ្នកទិញភ្លុកដំរីនៅប្រទេសចិន នឹងចូលរួមចំណែក បំបាក់ទឹកចិត្ត ការធ្វើជំនួញ និងការប្រមាញ់ បាញ់សម្លាប់សត្វដំរី យកភ្លុក ជាពិសេស នៅទ្វីបអាហ្វ្រិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ