លោកស្រីអ៊ុងសាន ស៊ូជីទើបធ្វើដំណើរជាលើកទី១ ទៅរដ្ឋរ៉ាឃីន របស់រ៉ូហ៊ីងយ៉ា
ប្រមុខរដ្ឋាភិបាលភូមា លោកស្រីអ៊ុងសាន ស៊ូជីនៅថ្ងៃព្រហស្បតិ៍នេះ បាន ធ្វើដំណើរទៅរដ្ឋរ៉ាឃីន ដែលវឹកវរ ដោយសារអំពើហិង្សា និងការរត់ចំណាកស្រុករបស់ប្រជាជនរ៉ូហ៊ីងយ៉ា។ តាំងពីមានការផ្ទុះអាវុធ ប្រយុទ្ធគ្នាដ៏ហិង្សា រវាងកងទ័ពភូមា និងពួកឧទ្ទាមទ័ពព្រៃដើម្បីរ៉ូហ៊ីងយ៉ា នៅចុងខែសីហា នេះជាលើកទី១ ដែលលោកស្រី អ៊ុងសាន ស៊ូជីធ្វើដំណើរទៅកាន់រដ្ឋរ៉ាឃីន ដែលស្ថិតនៅភាគខាងលិចប្រទេសភូមា។
ចុះផ្សាយនៅថ្ងៃ៖
លោកស្រី អ៊ុងសាន ស៊ូជី មិនបានប្រកាសឲ្យគេដឹងមុនពីទស្សនកិច្ចរបស់លោកស្រីទៅរដ្ឋរ៉ាឃីននោះទេ។ នៅថ្ងៃព្រឹកថ្ងៃព្រហស្បតិ៍នេះ ប្រមុខរដ្ឋាភិបាលស៊ីវិលភូមា បានធ្វើដំណើរតាមឧទ្ទម្ភាគចក្រយោធា ទៅកាន់តំបន់ដែលកំពុងជួបវិបត្តិជនភៀសខ្លួន រ៉ូហ៊ីងយ៉ា នៅរដ្ឋរ៉ាឃីន។ តាមអ្នកនាំពាក្យរបស់រដ្ឋាភិបាល លោកស្រីអ៊ុងសាន ស៊ូជីនឹងបំពេញទស្សនកិច្ចរយៈពេលមួយថ្ងៃ នៅតំបន់មួយចំនួន តាមព្រំដែន ជាទីដែលជនជាតិរ៉ូហ៊ីងយ៉ា រាប់សែននាក់ បានរត់ទៅជ្រកកោន នៅបង់ក្លាដែស ដើម្បីគេចចេញពីអំពើហិង្សា នៅរដ្ឋរ៉ាឃីន។
តាំងពីឈ្នះឆ្នោត នៅឆ្នាំ ២០១៥ និងកើតផ្ទុះអំពើហិង្សា ដែលជាដើមហេតុនៃវិបត្តិជនភៀសខ្លួនរ៉ូហ៊ីងយ៉ាដ៏ធំសម្បើមនៅភូមា នេះជាលើកទី១ ដែលលោកស្រីអ៊ុងសាន ស៊ូជីដាក់ជើងជាន់រដ្ឋរ៉ាឃីន។ សហគមន៍អន្តរជាតិធ្លាប់បានរិះគន់ប្រមុខរដ្ឋាភិបាលភូមា ដែលជាជ័យលាភីណូបែលសន្តិភាព ថា អសមត្ថភាព បិទភ្នែក បណ្តោយឲ្យមានការបង្រ្កាប ដ៏ហិង្សា របស់យោធាទៅលើក្រុមប្រជាជនកាន់សាសនាអ៊ីស្លាម ជាតិរ៉ូហ៊ីងយ៉ា នៅរដ្ឋរ៉ាឃីន។ នៅខែកញ្ញាកន្លងទៅ លោកស្រីអ៊ុងសាន ស៊ូជី បានចេញមុខ បដិសេធការចោទប្រកាន់របស់អង្គការសហប្រជាជាតិ ដែលថា កងទ័ពភូមាកំពុងធ្វើនយោបាយបោសសម្អាតជាតិពិន្ធុ នៅរដ្ឋរ៉ាឃីន តាមរយៈ ការដុតផ្ទះសម្បែង របស់ជនជាតិរ៉ូហ៊ីងយ៉ា។
ដោយលើកឡើងថា អំពើហិង្សាបានបិទបញ្ចប់តាំងពីដើមកញ្ញា នៅរដ្ឋរ៉ាឃីន លោកស្រី អ៊ុងសាន ស៊ូជីធ្លាប់បានប្រកាសផងដែរ ពីមាតុភូមិនិវត្តរបស់ជនជាតិភាគតិចរ៉ូហ៊ីងយ៉ា ដែលរហូតមកដល់ពេលនេះ មានចំនួនច្រើនជាង ៦សែននាក់ បានទៅកកកុញ ប្រជ្រៀតគ្នា ក្នុងជំរំភៀសខ្លួន នៅទឹកដីបង់ក្លាដែស។ នៅក្នុងដំណើរផ្លាស់ទីទៅរដ្ឋរ៉ាឃីន នៅថ្ងៃនេះ លោកស្រី ស៊ូជី មានអមដោយរដ្ឋមន្រ្តី និងអ្នកជំនួញភូមាសំខាន់ៗ២០រូប។ សម្រាប់លោកស្រីអ៊ុងសាន ស៊ូជី មានតែការអភិវឌ្ឍសេដ្ឋកិច្ច នៅក្នុងតំបន់កើតជម្លោះ ដែលជាដំណោះស្រាយរយៈពេលវែង។ នៅរដ្ឋរ៉ាឃីន ភាពក្រីក្រមានកម្រិតខ្ពស់ដល់ទៅ ៧៨ភាគរយ គឺទ្វេដង បើប្រៀបធៀបនឹងរដ្ឋផ្សេងទៀត របស់ភូមា។
ប៉ុន្តែ ក្នុងក្រសែភ្នែករបស់អង្គការការពារសិទ្ធិមនុស្ស កិច្ចការចាំបាច់ ដែលគេត្រូវធ្វើបន្ទាន់នៅពេលនេះ គឺការផ្តល់ជំនួយមនុស្សធម៌ ឲ្យបានលឿន និងប្រសិទ្ធិភាពបំផុតសម្រាប់ជនភៀសខ្លួនរ៉ូហ៊ីងយ៉ា។ រហូតមកដល់ពេលនេះ សកម្មភាពផ្តល់ជំនួយមនុស្សធម៌អន្តរជាតិ ធ្វើឡើងដោយតិចតួចបំផុត ដោយសារការរឹតបន្តឹងរបស់យោធាភូមា ហើយនិងការវាយប្រហាររបស់ក្រុមប្រជាជនភូមា ដែលប្រឆាំង មិនចង់ឲ្យគេជួយជនជាតិរ៉ូហ៊ីងយ៉ា។ រហូតមកដល់មកដល់ពេលនេះ មានតែអង្គការកាកបាទក្រហមតែប៉ុណ្ណោះ ដែលត្រូវបានអនុញ្ញាត ឲ្យទៅផ្តល់ជំនួយ ដូចជាអាហារ និងទឹក ដល់ជនជាតិ រ៉ូហ៊ីងយ៉ា ក្នុងរដ្ឋរ៉ាឃីន។
នៅថ្ងៃពុធម្សិលមិញ ជនជាតិរ៉ូហ៊ីងយ៉ារាប់ពាន់នាក់ នៅតែបន្តចាកចេញពីភូមិផ្ទះសម្បែង សំដៅទឹកដី បង់ក្លាដែស។ នៅដើមសប្តាហ៍នេះ បង់ក្លាដែស ដែលកំពុងទទួលជនភៀសខ្លួនរ៉ូហ៊ីងយ៉ា ជិតមួយលាននាក់ បានចរចា ជាមួយ រដ្ឋាភិបាលភូមា ពីការវិលត្រលប់របស់ជនជាតិរ៉ូហ៊ីងយ៉ាទៅភូមា ប៉ុន្តែ គ្មានបានលទ្ធផលអ្វីនោះទេ។
ដោយឡែកនៅអង្គការសហប្រជាជាតិនៅថ្ងៃពុធម្សិលមិញ ក្រុមប្រទេសអ៊ីស្លាមដែលនាំមុខដោយអារ៉ាប៊ីសាអូឌីតបានផ្ញើគម្រោងសេចក្តីសម្រេចចិត្តមួយទៅអង្គការសហប្រជាជាតិ ក្នុងន័យ បរិហាររិះគន់លើការរំលោភសិទ្ធិមនុស្សពីសំណាក់រដ្ឋាភិបាលភូមាទៅជនជាតិរ៉ូហ៊ីងយ៉ា កាន់សាសនាអ៊ីស្លាម។ សេចក្តីសម្រេច ដែលគាំទ្រដោយប្រទេសអ៊ីស្លាមចំនួន ៥៧ គ្មានទិសដៅទាមទារឲ្យមានការថ្កោលទោសលើភូមា នោះទេ ប៉ុន្តែ គ្រាន់តែលើកឡើងពីកង្វល់ ការព្រួយបារម្ភពីប្រើអំពើហិង្សា ហួសកម្រិតរបស់យោធាភូមាទៅលើជនជាតិរ៉ូហ៊ីងយ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ