ចិនច្រានចោលការចោទរបស់អាមេរិកដែលថា ប៉េកាំងប្រើនយោបាយអនុត្តរភាពនៅអាស៊ី
នៅថ្ងៃព្រហស្បតិ៍ ទី៣១ ឧសភា ប្រទេសចិនបានបញ្ចេញប្រតិកម្មច្រានចោលលើការលើកឡើងរបស់មន្រ្តីយោធាជាន់ខ្ពស់អាមេរិកម្នាក់ដែលថា ចិនកំពុងប្រើនយោបាយអនុត្តរភាពនៅអាស៊ី ពិសេសនៅក្នុងសមុទ្រចិនខាងត្បូង។ ជាការឆ្លើយតបវិញ ចិនបានស្តីបន្ទោសអាមេរិកថាជាមន្ទីរពេទ្យដែលគ្មានសប្បុរសធម៌។ ចំណែកអ្នកនាំពាក្យក្រសួងការបរទេសចិនលោកស្រីហួ ជុនយីងបានចំអកឡកឡាយដាក់អាមេរិកថាជាចោរដែលកំពុងស្រែកឲ្យគេចាប់ចោរ។
ចុះផ្សាយនៅថ្ងៃ៖
ស្តាប់ - ០២:៤០
សមុទ្រចិនខាងត្បូងកំពុងបន្តក្លាយជាសង្រ្គាមពាក្យសម្តីយ៉ាងផុសផុលរវាងចិន និងអាមេរិក។ ដើម្បីប្រឆាំងចិន និងដើម្បីបង្ហាញពីសេរីភាពធ្វើចរាចរណ៍ផ្លូវសមុទ្រនៅក្នុងសមុទ្រចិនខាងត្បូងដែលវ៉ាស៊ីនតោនបន្តអះអាងជាដែនទឹកអន្តរជាតិ អាមេរិកតែងបញ្ជូននាវាចម្បាំងរបស់ខ្លួនទៅកាន់តំបន់ដែលចិនក៏កំពុងមានជម្លោះជាមួយប្រទេសអាស៊ីមួយចំនួន រួមមាន ហ្វីលីពីន វៀតណាម ម៉ាឡេស៊ី និងព្រុយណេ។ អ្វីៗបានផ្តើមចេញពីការថ្លែងរបស់មេបញ្ជាការអាមេរិកប្រចាំតំបន់ប៉ាស៊ីហ្វិកឧត្តមនាវីហារី ហារីសពីកោះហាវ៉ៃក្នុងថ្ងៃពុធ ទី៣០ ឧសភាដែលថា សុបិន្តអនុត្តរភាពរបស់ចិននៅអាស៊ីកំពុងបង្កជាបញ្ហាប្រឈមចម្បងរបស់អាមេរិកសម្រាប់រយៈពេលវែង។
ចំណាប់អារម្មណ៍របស់ឧត្តមនាវីអាមេរិករូបនេះបានធ្វើឡើង មួយថ្ងៃក្រោយពីការថ្លែងរបស់ប្រមុខការពារជាតិអាមេរិកលោក James Mattis ក្នុងថ្ងៃអង្គារ ទី២៩ ឧសភាដែលថា អាមេរិកនឹងបន្តប្រឆាំងទល់នឹងការវាតទីដែនដីពីសំណាក់ចិន និងបិរហារលើមហិច្ឆតាយោធានិយមរបស់ចិនលើទីប្រជុំកោះនៅក្នុងតំបន់។ តែក៏ដូចជាសព្វមួយដង ចិនមិនដែលទុកឲ្យការលើកឡើងរបស់អាមេរិកក្នុងសំណុំរឿងនេះលើសពី ២៤ម៉ោងឡើយ។ « ទោះបីជាការអភិវឌ្ឍន៍របស់ចិនមានកម្រិតត្រឹមណាក៏ដោយ ក៏ចិនមិនដែលមាននយោបាយអនុត្តរភាព ឬការវាតទីដែរ » នេះជាការគូសបញ្ជាក់របស់លោកស្រីហួ ជុនយីង អ្នកនាំពាក្យក្រសួងការបរទេសចិន។
តាមលោកស្រីហួ ជុនយីង ចិនមិនមែនជាប្រទេសដែលបានពង្រាយគ្រឿងសព្វាវុធនៅសមុទ្រចិនខាងត្បូងមុនគេ និងច្រើនជាងគេទេ ហើយចិនក៏មិនមែនជាប្រទេសដែលបានធ្វើសមយុទ្ធញឹកញាប់នៅក្នុងតំបន់ដែរ។ រូបអ្នកនាំពាក្យការបរទេសចិនដដែលបានបន្ថែមដោយចំអកឡកឡាយថា « នៅអាមេរិក មានមនុស្សខ្លះកំពុងឃោសនាពីការវាតទីយោធានិយមរបស់ចិននៅសមុទ្រចិនខាងត្បូង តែសម្រាប់ខ្ញុំ វាជារឿងគួរឲ្យអស់សំណើចដូចជាចោរម្នាក់កំពុងស្រែកហៅឲ្យគេចាប់រូបចោរនោះ »។
គួររម្លឹកជូនថា ភាពតានតឹងរវាងអាមេរិក និងចិនក្នុងរឿងសមុទ្រចិនខាងត្បូងដែលបានចាប់ផ្តើមតាំងពីដើមឆ្នាំ ២០១០ ហាក់បានឡើងតានតឹងមួយកម្រិតទៀតក្នុងសប្តាហ៍កន្លងទៅ បន្ទាប់ពីអាមេរិកបានដកចិនចេញពីសមយុទ្ធ RIMPAC ដែលនឹងត្រូវចាប់ផ្តើមនៅដំណាច់ខែមិថុនានេះ។ RIMPAC ជាសមយុទ្ធផ្លូវសមុទ្រដ៏សំខាន់នៅសមុទ្រប៉ាស៊ីហ្វិកដែលរៀបចំរៀងរាល់ ២ឆ្នាំម្តង និងដែលដឹកនាំដោយអាមេរិក ព្រមទាំងមានការចូលរួមពី ២៣ប្រទេស។ ចិនត្រូវបានអាមេរិកហៅឲ្យចូលរួមលើកទី១ ក្នុងឆ្នាំ ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ