Amnesty International ស្នើអោយប្តឹងមេទ័ពភូមាទៅកាន់តុលាការព្រហ្មទណ្ឌអន្តរជាតិ
អង្គការ Amnesty International ទើបចេញរបាយការណ៍មួយ ចោទមេទ័ពនិងមន្ត្រីយោធាជាន់ខ្ពស់ភូមា១២រូបផ្សេងទៀត ពីបទធ្វើសកម្មភាពដ៏ហិង្សាប្រឆាំងទៅលើសហគមន៍រ៉ូហ៊ីងយ៉ា ដោយបានស្នើអោយប្តឹងពួកនេះ ទៅកាន់តុលាការព្រហ្មទណ្ឌអន្តរជាតិក្នុងបទឧក្រឹដ្ឋកម្មប្រឆាំងមនុស្សជាតិ។ របាយការណ៍ខាងលើនេះត្រូវបានចេញផ្សាយ មួយថ្ងៃបន្ទាប់ពីសហភាពអឺរ៉ុបនិងកាណាដា បានសម្រេចដាក់ទណ្ឌកម្មទៅលើមន្ត្រីភូមាធំៗចំនួន៧នាក់រួចមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
អង្គការ Amnesty International ដែលទើបបានចេញផ្សាយរបាយការណ៍មួយរបស់ខ្លួនក្នុងកម្រាស១៨៦ទំព័រ បានចោទជាអាទិ៍លើក្រុមអ្នកទទួលខុសត្រូវជាន់ខ្ពស់នៃកងទ័ពភូមា ថាជាអ្នកជាប់ពាក់ព័ន្ធនៅក្នុងសកម្មភាពធ្វើទុក្ខបុកម្នេញ អំពើហិង្សា បោសសំអាតពូជសាសន៍ទៅលើសហគមន៍ជនជាតិភាគតិចរ៉ូហ៊ីងយ៉ា។ គឺជារបាយការណ៍មួយដែល បានផ្អែកផងដែរ ទៅលើរូបភាពនៃផ្កាយរណប ក៏ព្រមទាំង ទៅលើ ឯកសារសម្ងាត់នានា របស់កងទ័ពភូមា។
អង្គការ Amnesty International ថែមទាំងបានធ្វើការសាកសួរសាក្សីចំនួនជាង ៤០០នាក់នៅរវាងខែកញ្ញាឆ្នាំ២០១៧និងខែមិថុនាឆ្នាំ ២០១៨ នៅក្នុងប្រទេសបង់ក្លាដែសនិងនៅភូមា។
លោក Matthew Wells ដែលជាមន្ត្រីនៃអង្គការ Amnesty International បានចោទថា”ការកើននូវអំពើហិង្សាដ៏ខ្លាំងក្លា ដែលមានដូចជា ឃាដកម្ម ការរំលោភបំពានផ្លូវភេទ ឬ ក៏ ការធ្វើទារុណកម្មនានា ការដុតបផ្លិចបំផ្លាញទីលំនៅដ្ឋាន ប្រឆាំងទៅលើសហគមន៍រ៉ូហ៊ីងយ៉ា គឺពុំមែនជាសកម្មភាពដែលបង្កឡើងស្រេចតែអំពើចិត្ត ដោយពួកទាហានតូចតាចរបស់ភូមានោះទេ តែ គឺ ជា ការបញ្ជាចេញពីថា្នក់លើ នៃកងទ័ពភូមាតែម្តង នៅក្នុងការបង្កសកម្មភាពប្រឆាំងយ៉ាងហិង្សា គ្រប់បែបយ៉ាងទៅលើសហគមន៍រ៉ូហ៊ីងយ៉ា។
ពោល គឺ មេបញ្ជាការជាន់ខ្ពស់របស់កងទ័ពភូមាតែម្តង ដែលបានចេញបញ្ជា ដាក់ពង្រាយអង្គភាពទ័ពស្រួចរបស់ខ្លួននៅជួរមុខ ទ័ព ដែលល្បីល្បាញ ថាបានប្រព្រឹត្ត អំពើរំលោភបំពានរួចទៅហើយ។ ចំពោះ Amnesty International “ការសម្រេចចិត្តរបស់មេទ័ពភូមានេះ បានជះផលវិបាក យ៉ាងមហន្តរាយ ទៅលើប្រជាជនរ៉ូហ៊ីងយ៉ា ដោយបានរំលឹកឲ្យដឹងដែរថា មេទ័ពភូមា លោក Aung Hlaing និងអ្នកទទួលខុសត្រូវយោធាផ្សេងៗទៀត បានធ្វើដំណើរចុះទៅផ្ទាល់នៅក្នុងតំបន់រ៉ូហ៊ីងយ៉ា នៅមុនពេលនឹងនៅពេលធ្វើយុទ្ធនាការ បោសសំអាតពូជសាសន៍ ក្នុងគោលដៅ ដើម្បី ត្រួតពិនិត្យ លើប្រតិបត្តិការណ៍មួយចំនួនផង។
គួរបញ្ជាក់ថា នៅថ្ងៃពុធនេះ អាជ្ញាធរភូមា ពុំមានប្រតិកម្មអ្វីបន្តិចទេនៅលើរបាយការណ៍របស់ Amnesty International ក៏ព្រមទាំងសំណើររបស់អង្គការនេះ នៅក្នុងការបញ្ជូនមេយោធាភូមាទៅកាន់តុលាការព្រហ្មទណ្ឌអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ