ចិនត្រៀមលុបច្បាប់ កំរិត ចំនួនកូន ដែលពលរដ្ឋមានសិទ្ធិបង្កើត
ចិនកំពុងត្រៀមរៀបចំសេចក្តីព្រាងច្បាប់ នៃក្រមរដ្ឋប្បវេណីរបស់ខ្លួន លែងកំណត់ចំនួនកូន ដែលគូស្វាមីភរិយាចិនមានសិទ្ធិបង្កើតទៀតហើយ ! នេះបើតាមសារព័ត៌មានផ្លូវការចិនចេញផ្សាយនៅថ្ងៃចន្ទ ទី ២៧ សីហា ២០១៨។ គម្រោងច្បាប់នេះជាសារបញ្ជាក់ថា អាជ្ញាធរក្រុងប៉េកាំងកំពុងត្រៀមខ្លួនលុបចោលទាំងស្រុងផែនការគ្រួសារ តាមគន្លងនយោបាយ "គ្រួសារកូនមួយ”ដែលចិនបានអនុវត្តយ៉ាងតឹងតែងបំផុត តាំងពីឆ្នាំ១៩៧៩ដល់ឆ្នាំ២០១៥។
ចុះផ្សាយនៅថ្ងៃ៖
ស្តាប់ - ០២:០៧
ប្រឈមនឹងភាពចាស់ជរារបស់ប្រជាជន ចិនបានប្រកាសបោះបង់ចោលនយោបាយ "កូនតែមួយ" នៅចុងឆ្នាំ២០១៥។ តាំងពីពេលនោះមក គូស្វាមីភរិយាចិន អាចមានកូនទីពីរ តែមិនអាចមានច្រើនលើសពីពីរនាក់បានឡើយ !
ប៉ុន្តែនៅថ្ងៃនេះ ចិនបាននិងកំពុងរៀបចំគម្រោងច្បាប់ថ្មី ដែលលែងមានចែងទាល់សោះអំពីការកំរិតចំនួនកូន និងបម្រាមអ្វីទាំងអស់។ ច្បាប់នេះនឹងត្រូវអនុម័តនៅ ឆ្នាំ២០២០ ដោយអង្គសមាជសភាប្រជាជនដែលជាអ្នកគ្រប់គ្រងច្បាប់រដ្ឋប្បវេណីចិន។
សូមបញ្ជាក់ថា បក្សកុម្មុយនិស្តចិនបានចេញគោលការណ៍ “កូនតែមួយ” នៅឆ្នាំ១៩៧៩ ដើម្បីទប់ស្កាត់កំណើនប្រជាជន ដោយមិនខ្លាចនឹងចាប់បង្ខំប្រជាជនឱ្យរម្លូតកូន ឱ្យប្រើវិធីពន្យារកំណើត ឱ្យបង់ពិន័យ ឱ្យជាប់ពន្ធនាគារទេ ... នយោបាយត្រួតពិនិត្យកំណើតដ៏តឹងតែងនេះបានរងការរិះគន់យ៉ាងខ្លាំង ព្រោះវាបានបង្កឱ្យវិសមភាពជាច្រើន ៖ កំណើនមនុស្សចាស់ និងកង្វះមនុស្សភេទស្រី ព្រោះចិនចូលចិត្តតែកូនប្រុស។
មុនការប្តូរផ្លាស់នយោបាយឆ្នាំ២០១៥ ចិនបានផ្តល់សិទ្ធិ ជាករណីលើកលែងឱ្យស្ត្រីចំនួន៥០លាននាក់ បង្កើតកូនពីរ ក្រោមមូលហេតុជាជនភាគតិច ជាអ្នកជនបទ មានកូនទីមួយភេទស្រី ខ្លួនឯងឬស្វាមីជាកូនទោលស្រាប់។ ប៉ុន្តែច្បាប់នេះមិនបានផ្តល់ផ្លែផ្កាទេ ! អត្រាកំណើត បានធ្លាក់ចុះ ខ្លាំងនៅឆ្នាំ២០១៧ ព្រោះគូស្វាមីភរិយាចិន មិនចង់បង្កើតកូនទីពីរ ដោយខ្លាចបាត់បង់ការងារ ដោយបញ្ហាថវិកាផ្ទះសម្បែងថ្លៃ ការសិក្សាក៏អស់ច្រើន។
ក្នុងបរិបទនេះ កំណើនមនុស្សចាស់កំពុងក្លាយជា វិបត្តិប្រជាសាស្ត្រ ! ចំនួនពលរដ្ឋចិនសកម្ម (១៦-៥៩ឆ្នាំ) បានធ្លាក់ចុះអស់ជិត៥លាននាក់កន្លះ កាលពីឆ្នាំទៅ និងជាគម្រប់៦ឆ្នាំជាប់ៗគ្នា មកនៅត្រឹមតែ៩០២លាននាក់ ពោលគឺត្រូវជា ៦៥%នៃប្រជាជនសរុប។
បើតាមការប៉ាន់ស្មានរបស់រដ្ឋាភិបាល ចំនួនប្រជាជនវ័យចំណាស់ ចាប់ពី៦០ឆ្នាំឡើងទៅ និងកើនឡើងដល់ទៅ ៤៨៧លាននាក់នៅឆ្នាំ២០៥០ ពោលគឺស្មើនឹង៣៥%នៃប្រជាជនសរុប ទល់នឹង២៤១លាននាក់ (១៧%)នៅឆ្នាំ២០១៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ