ប្រទេសជប៉ុនសុំការពន្យល់បំភ្លឺពីប្រទេសអង់គ្លេសជុំវិញ Brexit
លោករដ្ឋមន្រ្តីការបរទេសអង់គ្លេសហ្សេរេមី ហាន់បានអញ្ជើញទៅបំពេញទស្សនកិច្ចនៅក្នុងប្រទេសជប៉ុននាថ្ងៃអង្គារ ទី១៨ កញ្ញា។ លោកហាន់បានទទួលជួបដោយសមភាគីជប៉ុនលោកតារ៉ូ កូណូ និងដែលនៅក្នុងជំនួប លោកកូណូបានសុំការពន្យល់បំភ្លឺពីលោកហាន់ជុំវិញរឿងអង់គ្លេសដកខ្លួនចេញពីសមាជិកសហភាពអឺរ៉ុបដែលហៅកាត់ថា Brexit។ អ្វីដែលភាគីជប៉ុនចង់បាន គឺការធានារបស់រដ្ឋាភិបាលទីក្រុងឡុងដ៏ចំពោះវត្តមានក្រុមអ្នកជំនួញជប៉ុនក្នុងទឹកដីអង់គ្លេស បន្ទាប់ពីប្រទេសអឺរ៉ុបមួយនេះលែងលះពីអឺរ៉ុបជាផ្លូវការនៅចុងខែមីនា ឆ្នាំ ២០១៩។
ចុះផ្សាយនៅថ្ងៃ៖
ស្តាប់ - ០២:៣២
ក្នុងពេលដែលសំណុំឯកសារលែងលះរវាងប្រទេសអង់គ្លេស និងសហភាពអឺរ៉ុបកំពុងស្ថិតក្នុងសម័យអន្តរកាល និងការប្រទាញប្រទង់គ្នា ក្តីបារម្ភបាននិងកំពុងកើតមានកាន់តែច្រើនចំពោះក្រុមអ្នកជំនួញបរទេសដែលកំពុងបោះទុនរកស៊ីនៅក្នុងប្រទេសអង់គ្លេស។ សំណួរដែលពួកគេបានចោទសួរ និងនៅមិនទាន់មានចម្លើយនោះគឺថា តើបែបបទ និងលក្ខន្តិកៈនៃការរកស៊ីរបស់ពួកគេនៅក្នុងទឹកដីអង់គ្លេសនឹងមានការផ្លាស់ប្តូរឬអត់ ក្រោយពីប្រទេសអឺរ៉ុបមួយនេះបានបញ្ចប់សមាជិកភាពជាផ្លូវការពីសហភាពអឺរ៉ុបនាដំណាច់ខែមីនា ឆ្នាំ ២០១៩។ គឺសំណួរនេះហើយដែលលោកប្រមុខការទូតជប៉ុនតារូ កូណូបានសុំការពន្យល់បំភ្លឺពីសមភាគីអង់គ្លេសលោកហ្សេរេមី ហាន់។
លោកកូណូបានយល់ឃើញថា ពិតមែនតែរឿងរ៉ាវលែងលះរវាងអង់គ្លេស និងសហភាពអឺរ៉ុបកំពុងស្ថិតក្នុងសម័យអន្តរកាលក៏ដោយ ក៏វាជារឿងចាំបាច់មិនអាចខ្វះបានដែលទីក្រុងឡុងដ៏ត្រូវធានាពីការព្យាករណ៍ តម្លាភាព និងស្ថិរភាពផ្លូវច្បាប់ចំពោះក្រុមហ៊ុនបរទេសដែលកំពុងបោះទុនរកស៊ីនៅក្នុងទឹកដីអង់គ្លេស។ ប្រតិកម្មយ៉ាងដូចនេះរបស់ប្រមុខការទូតជប៉ុនបានកើតមានឡើង ប៉ុន្មានសប្តាហ៍ក្រោយពីក្រុមហ៊ុនជប៉ុន Panasonic បានសម្រេចប្តូរទីស្នាក់ការប្រចាំអឺរ៉ុបរបស់ខ្លួនពីប្រទេសអង់គ្លេសទៅកាន់ប្រទេសហូឡង់។ ទន្ទឹមគ្នានេះ ក្រុមហ៊ុនជប៉ុនគ្រាក់ៗផ្សេងទៀត ដូចយ៉ាង Nomura Holdings ឬ Sumitomo Mitsui Financial Group ក៏ប្រកាសឲ្យដឹងពីបំណងចង់ចាកចេញពីទីក្រុងឡុងដ៏ដែរ។
បច្ចុប្បន្ននេះ ទឹកប្រាក់វិនិយោគសរុបរបស់ក្រុមហ៊ុនជប៉ុនទាំង ៨៧៩ក្រុមហ៊ុននៅក្នុងប្រទេសអង់គ្លេសមានជាង ៦០ ០០០លានដុល្លារ និងមានក្រុមហ៊ុនខ្លះ ដូចយ៉ាងក្រុមហ៊ុនផលិតរថយន្តហុងដា និងនីសាន់បានប្រើបុគ្គលិកជិត ១៥ម៉ឺននាក់។ ប្រឈមនឹងសក្តានុពលនេះ លោកស្រីប្រមុខរដ្ឋាភិបាលអង់គ្លេស Theresa May ធ្លាប់បាននិយាយធានាចំពោះក្រុមអ្នកវិនិយោគជប៉ុននាឱកាសទស្សនកិច្ចរបស់លោកស្រីក្នុងទីក្រុងតូក្យូកាលពីខែសីហា ឆ្នាំ ២០១៧។ បន្ទាប់មកក្នុងឆ្នាំ ២០១៨ នេះ លោកស្រីក៏បានធានាជាថ្មីក្នុងពេលទទួលជួបសន្ទនាជាមួយប្រធានក្រុមហ៊ុនជប៉ុនគ្រាក់ៗក្នុងទីក្រុងឡុងដ៏។
យ៉ាងណាក៏ដោយ ប្រមុខកាទូតជប៉ុនលោកតារូ កូណូសង្ឃឹមថានៅក្រោយ Brexit ទំនាក់ទំនងសេដ្ឋកិច្ចរវាងជប៉ុន និងអង់គ្លេសនឹងរឹតតែកើនឡើងថែមទៀត។ ចំណែកអង់គ្លេសសង្ឃឹមថានៅក្រោយចែកផ្លូវជាមួយអឺរ៉ុប ខ្លួននឹងទទួលបានដៃគូថ្មី មានទាំងជប៉ុនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ