G២០៖លោកដូណាល់ ទូស្កឆ្លើយតបនឹងការយល់ឃើញរបស់លោកវ្ល៉ាឌីមៀរ ពូទីនស្តីពីលទ្ធិប្រជាធិបតេយ្យ
ថ្ងៃសៅរ៍ ទី២៩ មិថុនាជាថ្ងៃទី២ និងជាថ្ងៃចុងក្រោយនៃជំនួបកំពូល G២០ ក្នុងទីក្រុងអូសាកា ប្រទេសជប៉ុន។ ក្រៅពីជំនួបកំពូល G២០ គេសង្កេតឃើញមានជំនួបជាលក្ខណៈទ្វេភាគី ឬត្រីភាគីជាច្រើនផ្សេងទៀត ដូចយ៉ាងជំនួបរវាងប្រធានាធិបតីអាមេរិកលោកត្រាំ និងសមភាគីរុស្ស៊ីលោកពូទីន ឬមួយរវាងលោកពូទីន និងនាយករដ្ឋមន្រ្តីអង់គ្លេសលោកស្រីម៉េជាដើម។ ដោយឡែក ប្រធានក្រុមប្រឹក្សាអឺរ៉ុបលោកដូណាល់ ទូស្កដែលមានវត្តមាននៅ G២០ បានឆ្លៀតឆ្លើយតបនឹងការយល់ឃើញរបស់លោកពូទីនស្តីពីលទ្ធិប្រជាធិបតេយ្យ។ នៅក្នុងបទសម្ភាសន៍មួយផ្តល់ឲ្យកាសែតសេដ្ឋកិច្ចឈ្មោះ Financial Times លោកពូទីនបានថ្លែងថា គំនិតជឿនលឿននៃលទ្ធិប្រជាធិបតេយ្យបែបបស្ចិមលោកជាគំនិតដែលគេលែងប្រើ។ តាមលោកពូទីន គំនិតមួយនេះកំពុងមានជម្លោះផលប្រយោជន៍ជាមួយមនុស្សភាគច្រើន។ តែលោកទូស្កបានថ្លែងតបវិញនៅក្នុងសន្និសីទកាសែតក្នុងទីក្រុងតូក្យូថា លោកមិនយល់ស្របនឹងការលើកឡើងរបស់លោកពូទីន រួចបញ្ជាក់ពីជំហរអឺរ៉ុបក្នុងការការពារយ៉ាងម៉ឺងម៉ាត់ និងឥតងាករ៉េលើគំនិតសេរីប្រជាធិបតេយ្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៦
« ដោយហេតុតែខ្ញុំគេងមិនលក់ដោយសារខុសពេលម៉ោង ខ្ញុំអាចអានបានទាំងស្រុងនូវខ្លឹមសារនៃបទសម្ភាសន៍របស់លោកវ្ល៉ាឌីមៀរ ពូទីននៅក្នុងកាសែត Financial Times។ ខ្ញុំត្រូវនិយាយថា ខ្ញុំមិនយល់ស្របជាមួយនឹងអំណះអំណាងចម្បងដែលថា គំនិតចម្រើននិយម និងសេរីនិយមជាគំនិតចាស់គំរិល។ ក្នុងនាមជាពលរដ្ឋអឺរ៉ុប យើងនៅទីនេះដើម្បីការពារយ៉ាងម៉ឺងម៉ាត់ និងឥតងាករ៉េលើគំនិតជឿនលឿននៃលទ្ធិប្រជាធិបតេយ្យ។
នរណាម្នាក់ដែលបញ្ជាក់ថា លទ្ធិប្រជាធិបតេយ្យរីកចម្រើនជារឿងហួសសម័យ គឺមានន័យស្មើនឹងការនិយាយថា សេរីភាពត្រូវបានគេលែងប្រើ នីតិរដ្ឋជារឿងហួសសម័យ ហើយសិទ្ធិមនុស្សក៏ត្រូវបានគេឈប់ប្រើដែរ។
សម្រាប់ពួកយើងនៅទ្វីបអឺរ៉ុប ទាំងអស់នេះជាតម្លៃសារវន្ត និងឋិតនៅយូរអង្វែង។
អ្វីដែលខ្ញុំគិតថាវាហួសសម័យ និងលែងប្រើនោះ គឺអំណាចផ្តាច់ការ របៀបដឹកនាំដែលយកបុគ្គលជាធំ និងច្បាប់នៃពួកអប្បជនាធិបតេយ្យ ទោះបីជាពេលខ្លះ ច្បាប់មួយនេះហាក់មានប្រសិទ្ធិភាពក៏ដោយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ