ដើម្បីមុខមាត់ ចិនមិនចោលគំនិត អួតវិសាលភាពរបស់ខ្លួន
រឿងចម្រូងចម្រាស កើតចេញមកពីទំហំធំមហិមារបស់ផ្ទះពិព័រណ៌ នាឱកាសពិព័រណ៌សកលក្នុងក្រុងសៀងហៃ កាលពីឆ្នាំ ២០១០ បានធ្វើឲ្យប្រទេសចិន ត្រូវពិនិត្យ សើរើឡើងវិញ នយោបាយវិសាលភាពរបស់ខ្លួន។ ជាលទ្ធផល នៅក្នុងពិព័រណ៌សកល ក្រុងមីឡង់ ឆ្នាំ ២០១៥ ផ្ទះពិព័រណ៌របស់ចិនបានបន្ថយទំហំរបស់ខ្លួន មកនៅត្រឹម ៤៥៩០ ម៉ែត្រការ៉េ គឺស្ថិតនៅចំណាត់ថ្នាក់ទី ២ បន្ទាប់ពី អាល្លឺម៉ង់។ បើទោះបីជាចិន មិនសូវអួត លេចធ្លោរខ្លាំងដូច កាលនៅពិព័រណ៌សកលសៀងហៃ ប៉ុន្តែ មហាយក្សអាស៊ីនៅតែបង្ហាញវិសាលភាពរបស់ខ្លួន ដោយមានដាក់តាំងបង្ហាញ ផ្ទះតាំងពិព័រណ៌ដល់ទៅ ៣។ ខាងក្រោមនេះ ជាអត្ថបទយកការណ៍របស់André Wang អ្នកកាសែតរបស់ការិយាល័យចិន របស់វិទ្យុបារាំងអន្តរជាតិ RFI
ចុះផ្សាយនៅថ្ងៃ៖ កែប្រែថ្ងៃទី៖
កាលពី៥ឆ្នាំមុន នៅពិព័រណ៌សកលសៀងហៃ ចិនដែលចង់បញ្ជាក់អំណាចអស្ចារ្យរបស់ខ្លួន ទៅកាន់ពិភពលោក បានបញ្ចេញឲ្យឃើញ ផ្ទះពិព័រណ៌ដ៏ធំមហិមា គ្មានអ្នកប្រៀប។ នៅឆ្នាំ នេះ ផ្ទះពិព័រណ៌របស់ចិន បានបន្ថយទំហំ បន្តិច ចំណែក ប្រធានបទរបស់ផ្ទះពិព័រណ៌ចិន ដែលមានឈ្មោះថា “ដីនៃក្តីសង្ឃឹម” ហាក់ស៊ីសង្វាក់គ្នានឹងគោលគំនិតសំខាន់នៃពិព័រណ៌សកលមីឡង់ ឆ្នាំ ២០១៥ ដែលមានឈ្មោះថា “ចិញ្ចឹមផែនដី ថាមពលដើម្បីជីវិត”។ នៅផ្ទះពិព័រណ៌ ចិនតាំងបង្ហាញ កសិកម្ម ចំណីអាហារ អនាគតនៃការផលិតចំណីអាហារ និងគំនិតរបស់ចិន ដើម្បីអភិវឌ្ឍសេដ្ឋកិច្ច។ បើស្តាប់តាមបទបង្ហាញរបស់អ្នកទទួលខុសត្រូវចិន លោក វ៉ាង ជីឈិន សារនៃប្រធានបទរបស់ចិន គឺ ដីនៃក្តីសង្ឃឹម គឺជាសារមានសារៈសំខាន់ដែលនិយាយពីការផ្សារភ្ជាប់ ចូលគ្នា ដ៏សុខដុមរមនា នៃមនុស្ស និងធម្មជាតិ។
ផ្ទះពិព័រណ៌ចិនស្ថិតនៅចំកណ្តាលនៃទីវាលដ៏ធំនៃពិព័រណ៌សកលមីឡង់ ឆ្នាំ ២០១៥។ នៅក្នុងផ្ទះពិព័រណ៌ចិន គេឃើញ មានអំពូលភ្លើង ពណ៌ល្អិតៗ រាប់ម៉ឺន ដែលតំណាងឲ្យស្រូវសាឡី មានពន្លឺភ្លិបភ្លែត រត់ចុះឡើង គឺដូចជាចុងស្រូវសាឡី ដែលបក់យោលយោកទៅតាមខ្យល់។ ផ្ទះពិព័រណ៌ចិនត្រូវពុះចែកជាតំបន់ ចំនួន ៤ ដែលមួយៗសុទ្ធតែមានប្រធានបទផ្ទាល់ខ្លួនមួយ។ ជារួម តាមរយៈផ្ទះពិព័រណ៌ ចិនចង់បង្ហាញ ពីទំនៀមទម្លាប់ក្នុងការធ្វើកសិកម្ម ទស្សនវិជ្ជាបុរាណ ដែលមានបូកផ្សំបញ្ចូលគ្នា រវាងមេឃ ដី មនុស្ស និងភាពសុខដុមរមនា។ នៅក្បែរ ផ្ទះពិព័រណ៌ចិន មានអមដោយផ្ទះពិព័រណ៌ពីរផ្សេងទៀត ដែលមួយជារបស់ក្រុមហ៊ុនVankeដែលជាក្រុមហ៊ុនពហុជាតិ ចិន នាំមុខគេ ខាងសាងសង់ផ្ទះសម្បែង និងមួយទៀត ជាផ្ទះពិព័រណ៌របស់Chine Entreprise ដែលជាបណ្តាញប្រមូលផ្តុំក្រុមហ៊ុនសំខាន់ៗនៅប្រទេសចិន។
គំនិតយោបល់ទៅលើផ្ទះពិព័រណ៌ចិន មានប្លែកៗ។ អ្នកចូលទស្សនា ជាតិចិនម្នាក់បាននិយាយថា គាត់មើលមិនឃើញ ថា គំនិតទាំង៤ គឺមេឃ ដី មនុស្ស និងភាពសុខដុមរមនា ដែលចិន លើកបង្ហាញ នោះ មានអត្ថន័យ ជាប់ទាក់ទងនឹងប្រធានបទរបស់ពិព័រណ៌សកលនៅមីឡង់ទាល់តែសោះ។ “តាមយោបល់ខ្ញុំ ប្រធានបទរបស់ចិន មានជាប់ទាក់ទងនឹងទស្សនវិជ្ជា ខុងជឺ។ លើសពីនោះ “ដីនៃក្តីសង្ឃឹម” គឺជាឈ្មោះនៃបទចម្រៀង នៅទសវត្សរ៍ឆ្នាំ ១៩៨០ ដែលបកស្រាយដោយអ្នកចម្រៀង ប៉េង លីយុន ដែលគ្មានអ្នកណាក្រៅតែពីភរិយារបស់ប្រធានាធិបតីចិនបច្ចុប្បន្ននេះទេ។” យុវជនវូ អ្នកចូលទស្សនាម្នាក់ទៀត បាននិយាយថា “រហូតមកដល់ពេលនេះ ខ្ញុំបានមើលផ្ទះពិព័រណ៌តែបី បួនប៉ុណ្ណោះ។ ផ្ទះពិព័រណ៌ចិន មិនពេញភ្នែករបស់ខ្ញុំទេ។ បើមើលពីសំបកក្រៅ ឃើញថា ស្អាត អស្ចារ្យណាស់ ប៉ុន្តែ បើនៅខាងក្នុងវិញ គឺគ្មានអ្វីធំដុំទាល់តែសោះ។ យុវជនវូបានត្អូញ រអ៊ូ ពីការទទួលភ្ញៀវដ៏ អាក្រក់ពីមន្រ្តីចិននៅក្នុងផ្ទះពិព័រណ៌។ អ្នកចាំទទួលភ្ញៀវមានតិច ហើយក៏ការពន្យល់ទៀត សោត គឺរឹតតែតិចទៅទៀត។
គំនិតរបស់វូ មិនបានទទួលការគាំទ្រពីជូ ចិន ដែលបានស្ម័គ្រចិត្តបម្រើការឲ្យផ្ទះពិព័រណ៌ចិនទេ។ ជូ ចិនដែលនៅឈរលក់សំបុត្រចូលទស្សនាសម្រាប់ផ្ទះពិព័រណ៌ចិនបាននិយាយថា វាច្បាស់ណាស់ថា ម្នាក់ៗ មានគំនិតចូលចិត្ត ខុសប្លែកគ្នា។ សម្រាប់នាង នៅពិព័រណ៌សកលមីឡង់ ចិនជោគជ័យច្រើនជាងគេ បើប្រៀបធៀប នឹងអាល្លឺម៉ង់ និងប្រេស៊ីល។ នាងគិតថា ជាមួយនឹងទាហានចិនធ្វើពីដី និងផ្លូវដើរក្រាលដោយសូត្រ ផ្ទះពិព័រណ៌ចេះរៀបចំធ្វើឲ្យខុសប្លែកពីគេ។ “ចិនជាប្រទេសមហាអំណាច។ ចិនមិនត្រូវបង្ហាញចំណុចខ្សោយរបស់ខ្លួនទេ។ វាសំខាន់ណាស់សម្រាប់មុខមាត់ប្រតេសចិន។”
នៅប៉ុន្មានរយម៉ែត្រពី ផ្ទះពិព័រណ៌ចិន ផ្ទះពិព័រណ៌របស់ក្រុមហ៊ុនចិនមានបិទផ្ទាំង ដែលមានសរសេរអក្សរធំៗ “គ្រាប់ពូជចិន” គឺមានន័យស៊ីគ្នា នឹង “ដីនៃក្តីសង្ឃឹម”។ នៅក្នុងផ្ទះពិព័រណ៌មួយនេះ គេឃើញ ពីភាពស្វាហាប់ និងគំនិតច្នៃប្រឌិត បង្កើតថ្មីរបស់ក្រុមហ៊ុនចិន។ តាមលោកហួង យៅឆេង ប្រធានរបស់ផ្ទះពិព័រណ៌របស់ក្រុមហ៊ុន Chine Entreprise Chine Entrepriseចង់ដើរតួនាទីជាស្ពាន ដែលជាកន្លែងដើរបញ្ជ្រួសគ្នារវាងក្រុមហ៊ុនចិន និងក្រុមហ៊ុនអឺរ៉ុប។
តាមលោកហួង យៅឆេង សារដែលមានឈ្មោះថា គ្រាប់ពូជចិន ចង់សំដៅទៅក្រុមហ៊ុនចិន ដែលចិនចង់ព្រួស នៅគ្រប់កន្លែង ក្នុងពិភពលោក។ “យើងចង់លើកទឹកចិត្តក្រុមហ៊ុនចិនឲ្យចេញទៅមើលខាងក្រៅ ចិន ទៅមើលពិភពលោក។ ជាមួយគ្នានោះ យើងនៅតែរក្សាគោលការណ៍ ថែរក្សាការពារបរិស្ថាន និងសន្តិសុខស្បៀងអាហារ”។ លោកហួង យៅឆេងបានលើកឡើងពីគ្រាប់អង្ករកូនកាត់ ដែលបង្កើតឡើងដោយអ្នកវិទ្យាសាស្រ្តចិន លោកយួន ឡុងពីង។ អង្ករកូនកាត់របស់ចិន នឹងអាចធ្វើឲ្យកសិករផលិតបានច្រើន និងចំណាយទុនតិច បើប្រៀបធៀបនឹងអង្ករធម្មតា។
លោកហួង យៅឆេងធ្លាប់បានចូលរួមនៅក្នុងពិព័រណ៌សកលសៀងហៃ ឆ្នាំ ២០១០។ ចំណុចខុសប្លែកដែលលោកសង្កេតឃើញ នៅក្នុងពិព័រណ៌សកលមីឡង់ ឆ្នាំ ២០១៥នេះ គឺ គ្រប់ប្រទេស មិនថា តូច ឬធំបានបង្ហាញពីគំនិតច្នៃប្រឌិត ប្លែកថ្មីៗ។ កាហ្សាក់ស្ថាន វេណេស៊ុយអេឡា ឬអារ៉ាប៊ី សាអូឌីតបានបង្ហាញស្នាដៃរបស់ខ្លួន ដោយប្រើកម្មវិធីវីដេអូ 3D ចំណែកអាល្លឺម៉ង់ អ៊ីតាលី និងជប៉ុនមានផ្ទះពិព័រណ៌ដែលផ្តោតសំខាន់ទៅលើបញ្ហាបរិស្ថាន។
ដោយប្រៀបធៀបទៅនឹងពិព័រណ៌សកល សៀងហៃ ឆ្នាំ ២០១០ លោកហួង មិនអាចទប់ចិត្តនឹងកោតសរសើររបៀបរៀបចំរបស់អ៊ីតាលី ម្ចាស់ផ្ទះ ជាពិសេសផ្នែកសន្តិសុខ ដែលត្រូវបានគេធានាយ៉ាងមានប្រសិទ្ធិភាព និងស្ងៀមស្ងាត់មិនចេញមុខ គឺខុសស្រឡះពីពិព័រណ៌សកល សៀងហៃដែលថប់ ដង្ហើម ដោយសារតែការយាមតឹងតែង ឆ្វាត់ឆ្វែងរបស់ប៉ូលិសចិន។ “នៅទីនេះ ប្រទេសម្ចាស់ផ្ទះបានរៀបចំយ៉ាងល្អ។ ខ្ញុំមានអារម្មណ៍ថា អ្វីត្រូវបានចាត់ចែងយ៉ាងមានសណ្តាប់ធ្នាប់ ដោយមិនឲ្យអ្នកចូលទស្សនាមានអារម្មណ៍ ពួកគេកំពុងស្ថិតនៅក្រោមការការពារដូចនៅក្នុងជំរំទ័ពនោះទេ។ នេះជាឧទាហរណ៍មួយ ដែលប្រទេសអ្នករៀបចំក្រោយៗត្រូវយកទៅគិតគូរ ធ្វើតាម”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ