អង្គការអ៊ីស្លាមនៅអាមេរិក ដាក់ពាក្យប្តឹង លោកប្រធានាធិបតីភូមា ថេន សេន ពីបទប្រល័យពូជសាសន៍
អង្គការរបស់អ្នកកាន់សាសនាអ៊ីស្លាម ជាង ២០ នៅអាមេរិក នៅសប្តាហ៍កន្លងទៅ បានដាក់ពាក្យបណ្តឹង ប្តឹងលោកប្រធានាធិបតី ភូមា ថេនសេន និងមន្រ្តីរដ្ឋាភិបាលភូមា ពីបទប្រព្រឹត្តអំពើប្រល័យពូជសាសន៍លើជនជាតិភាគតិច រ៉ូហ៊ីងយ៉ា។ អ្នកនាំពាក្យរបស់រដ្ឋាភិបាលភូមា កាលពីថ្ងៃចន្ទ បានចាត់ទុក ពាក្យបណ្តឹងថា គ្មានន័យ និងគ្មានសារៈសំខាន់ ដែលរដ្ឋាភិបាលភូមា ត្រូវយកចិត្តទុកដាក់នោះទេ។
ចុះផ្សាយនៅថ្ងៃ៖
ស្តាប់ - ០១:៥៦
"ភូមាមិនស្ថិតនៅក្រោមចំណុះរបស់អាមេរិក។ ដូច្នេះ វាគ្មានហេតុផលអ្វី ដែលភូមាត្រូវទៅប្រឈមមុខនឹងតុលាការអាមេរិកនោះទេ"។ នេះបើតាមការអះអាងរបស់ អ្នកនាំពាក្យរដ្ឋាភិបាលភូមា កាលពីថ្ងៃចន្ទ។
ប្រតិកម្មរបស់អ្នកនាំពាក្យរដ្ឋាភិបាលភូមា ធ្វើឡើង បន្ទាប់ពី អង្គការរបស់អ្នកកាន់សាសនាអ៊ីស្លាម នៅសហរដ្ឋអាមេរិក បានដាក់ពាក្យបណ្តឹង ប្តឹងលោកថេនសេន ប្រធានាធិបតីភូមា និងរដ្ឋមន្រ្តីមួយចំនួន របស់រដ្ឋាភិបាលទៅ តុលាការ សហព័ន្ធ នៅទីក្រុងញូវយ៉ក។ ពាក្យបណ្តឹងនេះធ្វើឡើង នៅក្រោមច្បាប់អាមេរិកាំង Alien Tort Statute ដែលធ្លាប់អនុញ្ញាត បើកផ្លូវឲ្យជនជាតិអាមេរិកាំង ដើមកំណើតបរទេស មានសិទ្ធិទាមទារសំណងជម្ងឺចិត្ត ដោយសារការរំលោភសិទ្ធិមនុស្ស ដែលធ្វើនៅក្រៅទឹកដីអាមេរិក។
នៅក្នុងពាក្យបណ្តឹងរបស់ក្រុមអង្គការអ៊ីស្លាម ដែលនៅក្នុងនោះមានផងដែរ សមាគមជនជាតិរ៉ូហ៊ីងយ៉ា ដែលបានភៀសខ្លួន ទៅរស់នៅអាមេរិក គេបានសរសេរថា ជនជាតិរ៉ូហ៊ីងយ៉ាត្រូវគេស្អប់ រើសអើង និងរងការវាយប្រហារ ពីក្រុមពុទ្ធសាសនិក ដែលទទួលការគាំទ្រ បើកដៃពីរដ្ឋាភិបាលភូមា។ អ្នកដាក់ពាក្យបណ្តឹងខ្លះនិយាយថា ពួកគេ ឬសាច់ញាតិធ្លាប់ប្រឈមនឹងការសម្លាប់ ប្រល័យពូជសាសន៍ រងទារុណកម្ម ការចាប់ដាក់គុក ដោយគ្មានការជំនុំជម្រះ និងការមើលងាយ បន្ថោកបង្អាប់ ពីមន្រ្តីភូមា។
តាមមេធាវី របស់ក្រុមសមាគមអ្នកកាន់សាសនាអ៊ីស្លាម ពាក្យបណ្តឹងបានទៅដល់ការិយាល័យរបស់ចៅក្រម របស់តុលាការសហព័ន្ធ ក្នុងក្រុងញូវយ៉ករួចហើយ ប៉ុន្តែ ចៅក្រមនៅមិនទាន់បានកោះហៅ ចុងចម្លើយ នៅឡើយ។ តាមមេធាវីរបស់ដើមបណ្តឹង លោកប្រធានាធិបតីថេន សេន នឹងមានពេល២១ថ្ងៃ ដើម្បីឆ្លើយតប វិញ គឺចាប់ពីថ្ងៃដែលលោកទទួលដីការរបស់តុលាការអាមេរិក។
គេមិនដឹងថា តើពាក្យប្តឹងផ្តល់មានពាក់ព័ន្ធនឹងនយោបាយដែរឬយ៉ាងណានោះទេ ប៉ុន្តែ ពាក្យបណ្តឹង ប្តឹងលោកថេន សេន ប្រមុខរដ្ឋាភិបាលភូមា ធ្វើឡើង នៅតែជាងមួយខែមុនដែលភូមា ត្រូវរៀបចំការបោះឆ្នោត ជាតិ ដែលគណបក្សរបស់លោកស្រីអ៊ុងសាន ស៊ូជី ត្រូវគេមើលឃើញថា នឹងទទួលជ័យជំនះ លើគណបក្សកាន់អំណាចភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ