ជប៉ុន៖កិច្ចប្រជុំ G៧នៅហ៊ីរ៉ូស្ហ៊ីម៉ាបង្កប់ដោយទស្សនកិច្ចនិមិត្តរូបខ្ពស់របស់លោកចន ឃ៊ែរី
កិច្ចប្រជុំថ្នាក់រដ្ឋមន្រ្តីការបរទេសនៃក្រុមប្រទេសមហាអំណាចឧស្សាហកម្មទាំង ៧ ហៅកាត់ថា G៧ បើកធ្វើរយៈពេល២ថ្ងៃដោយចាប់ផ្តើមពីថ្ងៃអាទិត្យ ទី១០ មេសានេះនៅក្នុងទីក្រុងហ៊ីរ៉ូស្ហ៊ីម៉ា ប្រទេសជប៉ុន។ កិច្ចប្រជុំថ្នាក់ប្រមុខការទូត G៧ គឺជាការត្រៀមរៀបចំជំនួបកំពូល G៧ ថ្នាក់ប្រមុខរដ្ឋ និងប្រមុខរដ្ឋាភិបាលនៅដំណាច់ខែឧសភាខាងមុខ។ អ្វីជាការកត់សម្គាល់នៅក្នុងកិច្ចប្រជុំថ្នាក់រដ្ឋមន្រ្តីការបរទេស G៧ ពេលនេះ គឺជម្រើសទីក្រុងហ៊ីរ៉ូស្ហ៊ីម៉ាដើម្បីរៀបចំកិច្ចប្រជុំ និងទស្សនកិច្ចជាប្រវត្តិសាស្រ្តរបស់អ្នកទទួលខុសត្រូវជាន់ខ្ពស់ក្នុងរដ្ឋបាលអាមេរិកាំងម្នាក់លោកចន ឃ៊ែរីនៅក្នុងទីក្រុងហ៊ីរ៉ូស្ហ៊ីម៉ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៣៩
គេចាត់ទុកទស្សនកិច្ចរបស់លោកប្រមុខការទូតអាមេរិកចន ឃ៊ែរីនៅក្នុងទីក្រុងហ៊ីរ៉ូស្ហ៊ីម៉ាជារឿងប្រវត្តិសាស្រ្តមិនធ្លាប់មាន ព្រោះជាលើកទី១ តាំងពីក្រោយបញ្ចប់សង្រ្គាមលោកលើកទី២ ដែលមានអ្នកដឹកនាំជាន់ខ្ពស់ក្នុងរដ្ឋបាលអាមេរិកាំងម្នាក់បានដាក់ជើងជាន់ទីក្រុងហ៊ីរ៉ូស្ហ៊ីម៉ា។ ទីក្រុងហ៊ីរ៉ូស្ហ៊ីម៉ាដែលបានរងគ្រោះដោយគ្រាប់បែកបរមាណូអាមរិកាំងក្នុងថ្ងៃទី៦ សីហា ១៩៤៥បណ្តាលឲ្យមានមនុស្សស្លាប់ ១៤ម៉ឺននាក់ របួសជាច្រើនម៉ឺននាក់ និងដែលចំហាយធាតុវិទ្យុសកម្មបានធ្វើឲ្យប៉ះពាល់ដល់សុខភាពប្រជាជនជប៉ុនរស់ក្នុងទីក្រុងហ៊ីរ៉ូស្ហ៊ីម៉ាមកដល់សព្វថ្ងៃ។ នេះដោយមិនរាប់បញ្ចូលពីការប៉ះពាល់ដល់ផ្លូវចិត្ត និងផ្លូវអារម្មណ៍របស់ប្រជាជនជប៉ុនផង។
ជាង ៧០ឆ្នាំក្រោយការបិទបញ្ចប់សង្រ្គាមលោកលោកទី២ អតីតគូសត្រូវអាមេរិក និងជប៉ុនបានក្លាយជាសម្ព័ន្ធមិត្តចាក់ទឹកមិនលេចមែន តែស្នាមរបួសប្រវត្តិសាស្រ្តនៅបន្តមាន និងប្រហែលជាគ្មានថ្ងៃរលុបបាត់សូនឈឹងទេ។ ម្យ៉ាងទៀត ជាង ៧០ឆ្នាំក្រោយមក ក៏គេមិនដែលឃើញមានថ្នាក់ដឹកនាំជាន់ខ្ពស់ក្នុងរដ្ឋបាលអាមេរិកាំងណាម្នាក់ ទោះបីក្នុងជំនាន់រូបប្រធានាធិបតីណាក៏ដោយ បានដាក់ជើងជាន់ទីក្រុងហ៊ីរ៉ូស្ហ៊ីម៉ាដែរ។ ដូច្នេះវត្តមានរបស់លោកប្រមុខការទូតចន ឃ៊ែរីថ្ងៃនេះពិតជារឿងប្រវតិ្តសាស្រ្ត និងបង្កប់ដោយនិមិត្តរូបខ្ពស់ណាស់។ និមិត្តរូបកាន់តែខ្ពស់ថែមទៀត គឺនៅថ្ងៃចន្ទស្អែកដែលលោកចន ឃ៊ែរីនឹងទៅទស្សនាសារៈមន្ទីរដើម្បីសន្តិភាព និងចូលរួមគោរពវិញ្ញាណក្ខន្ទចំពោះជនរងគ្រោះជប៉ុនដោយគ្រាប់បែកបរិមាណូទាំង ១៤ម៉ឺននាក់។
លោកចន ឃ៊ែរីបានទាមទារឲ្យពិភពលោកគ្មានអាវុធនុយក្លេអ៊ែរ
ការទម្លាក់គ្រាប់បែកបរិមាណូអាមេរិកាំងលើជប៉ុនកាលពីជាង ៧០ឆ្នាំមុននៅបន្តជាសំណុំរឿងរសើបខ្លាំងណាស់រវាងទីក្រុងវ៉ាស៊ីតោន និងតូក្យូ។ នៅក្នុងន័យនេះ លោកប្រមុខការទូតចន ឃ៊ែរីមានការប្រយ័ត្នប្រយែងខ្លាំងណាស់នៅក្នុងពាក្យសម្តីរបស់លោក។ នៅក្នុងបទសម្ភាសន៍មួយជាមួយកាសែតក្នុងស្រុកមួយ លោកឃ៊ែរីមិនបាននិយាយអ្វីទាក់ទងនឹងរឿងហ៊ីរ៉ូស្ហ៊ីម៉ាទេ តែបានទាមទារឲ្យពិភពលោកមួយគ្មានអាវុធនុយក្លេអ៊ែរ។ លោកឃ៊ែរីបានសង្កត់ធ្ងន់ៗថា អាមេរិកបានសន្យាក្នុងការបំបាត់នុយក្លេអ៊ែរឲ្យអស់ពីភពផែនដី និងបានរម្លឹកជាថ្មីពីការប្រកាសរបស់លោកប្រធានាធិបតីអូបាម៉ាក្នុងផ្លូវនេះនៅក្នុងសុន្ទរកថាថ្លៃងកាលពីខែមេសា ឆ្នាំ ២០០៩ ក្នុងទីក្រុងប្រាក។
សារស្រដៀងគ្នារបស់លោកចន ឃ៊ែរីក៏ត្រូវបានលើកឡើងដោយសមភាគីជប៉ុនលោកគីស្ហ៊ីដាដែរ។ ថ្លែងនាឱកាសបើកកិច្ចប្រជុំ G៧ លោកគីស្ហ៊ីដាបានបញ្ជូនសារដើម្បីសន្តិភាព និងពិភពលោកគ្មានអាវុធនុយក្លេអ៊ែរ។ ចំណែកចៅក្រុងហ៊ីរ៉ូស្ហ៊ីម៉ាបានសម្តែងក្តីសង្ឃឹមថា ទស្សនកិច្ចរបស់លោកឃ៊ែរីនឹងអនុញ្ញាតឲ្យអាមេរិកយល់កាន់តែច្បាស់ពីការពិតនៃគ្រាប់បែកបរិមាណូ។ ពិតណាស់ថា អ្វីដែលប្រជាជនជប៉ុន ពិសេសអ្នកទីក្រុងហ៊ីរ៉ូស្ហ៊ីម៉ាចង់បានចម្លើយពីបបូរមាត់ថ្នាក់ដឹកនាំកំពូលអាមេរិកាំង គឺការសុំទោសជាផ្លូវការ ឬយ៉ាងហោចណាស់ ក៏សម្តែងការសោកស្តាយដែរ។
តែជាង ៧០ឆ្នាំក្រោយព្រឹត្តិការណ៍សោកសៅជាប្រវត្តិសាស្រ្តនោះមក អាមេរិកមិនដែលនិយាយពាក្យ « សុំទោស » ឬក៏ « សោកស្តាយ » ទេ។ ប្រជាជនជប៉ុនទូទៅ មានអ្នកខ្លះយល់ថា រឿងអាមេរិកសុំទោស ឬមិនសុំទោសវាមិនសំខាន់ទេ អ្វីដែលសំខាន់នោះ គឺសុំកុំឲ្យព្រឹត្តិការណ៍មួយនេះកើតមានជាថ្មីម្តងទៀត។ សម្រាប់អ្នកខ្លះទៀតយល់ថា វាសំខាន់ណាស់ដែលគេត្រូវដឹងពីរឿងអតីតកាលដើម្បីចៀសវាងកុំឲ្យរឿងច្រំដែលមួយនេះកើតឡើងវិញ។
ប្រធានបទអាទិភាពរបស់ G៧ គឺកម្ទេចអង្គការរដ្ឋអ៊ីស្លាម
កិច្ចប្រជុំថ្នាក់រដ្ឋមន្រ្តីនៃក្រុមប្រទេសមហាអំណាចឧស្សាហកម្មទាំង ៧ ហៅកាត់ G៧ ដែលរៀបចំរយៈ ២ថ្ងៃក្នុងទីក្រុងហ៊ីរ៉ូស្ហ៊ីម៉ា ប្រទេសជប៉ុនពេលនេះ គឺជាការត្រៀមរៀបចំជំនួបកំពូល G៧ ថ្នាក់ប្រមុខរដ្ឋ និងប្រមុខរដ្ឋាភិបាលនៅដំណាច់ខែឧសភាខាងមុខ។ ជំនួបកំពូលដែលគេសង្ឃឹមមានវត្តមានលោកប្រធានាធិបតីអាមេរិកអូបាម៉ាក្នុងទីក្រុងហ៊ីរ៉ូស្ហ៊ីម៉ា។ សំណុំរឿងសម្រាប់កិច្ចប្រជុំក្រុម G៧ ឆ្នាំ ២០១៦ នេះមានច្រើន ពិសេសសំណុំរឿងអន្តរជាតិដែលកំពុងបន្តមានយ៉ាងក្តៅគគុក។
សំណុំរឿងអន្តរជាតិក្តៅគគុកទាំងនោះរួមមាន យុទ្ធនាការប្រយុទ្ធប្រឆំាងនឹងភេរវនិយមអន្តរជាតិ ពិសេសអង្គការរដ្ឋអ៊ីស្លាមដែលកំពុងបន្តវាតទីនៅក្នុងទឹកដីស៊ីរី និងអ៊ីរ៉ាក់ វិបត្តិផ្ទៃក្នុងនៅស៊ីរី នៅយេម៉ែន នៅលីប៊ី និងការបន្តផ្គើនសហគមន៍អន្តរជាតិរបស់កូរ៉េខាងជើង តាមរយៈការសាកល្បងនុយក្លេអ៊ែរ និងការបាញ់គ្រាប់មីស៊ីលអន្តរទ្វីបជាបន្តបន្ទាប់ក្នុងពេលប៉ុន្មានខែកន្លងទៅ។ ទាំងនេះមិនភ្លេចនិយាយទេ ពីយុទ្ធនាការប្រឆំាងនឹងភាពក្រីក្រ ភាពអត់ឃ្លាន និងកង្វះអាហារជាដើម។
បច្ចុប្បន្ននេះនៅទូទំាងពិភពលោក មានអ្នកអត់ឃ្លាន ឬគ្មានខ្វះអាហារទទួលទានប្រមាណជា ២ ០០០លាននាក់ ហើយ G៧ ធ្លាប់បានប្តេជ្ញាចិត្តក្នុងឆ្នាំ ២០១៥ ពីការកាត់បន្ថយភាពអត់ឃ្លានឲ្យបាន ៥០០លាននាក់ពីពេលនេះដល់ឆ្នំា ២០៣០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ