អតីតតំណាងរាស្ត្រ CNRP គ្រោងប្រមូលស្នាមមេដៃពីអតីតសមាជិកក្រុមប្រឹក្សាឃុំ សង្កាត់ថ្វាយព្រះមហាក្សត្រ
គិតមកដល់ពេលនេះ តុលាការកំពូលមិនទាន់មានសេចក្ដីសម្រេចបែបណានៅឡើយទេ ជុំវិញបណ្ដឹងសើរើជាលើកទី២ របស់អតីតតំណាងរាស្រ្តគណបក្សសង្គ្រោះជាតិ។ម្ចាស់បណ្ដឹងបានបង្ហើបពីលទ្ធភាពដែលធ្វើបន្ត គឺនឹងប្រមូលស្នាមមេដៃ ពីអតីតសមាជិកក្រុមប្រឹក្សា ឃុំ សង្កាត់ គណបក្សសង្គ្រោះជាតិ ដើម្បីសុំព្រះរាជអន្តរាគមន៍ពីព្រះមហាក្សត្រ។
ចុះផ្សាយនៅថ្ងៃ៖
ស្តាប់ - ០២:៥៦
ការប្រមូលស្នាមមេដៃ នឹងផ្ដើមអនុវត្តក្នុងករណីដែលតុលាការកំពូលបន្តបដិសេធ ចំពោះបណ្ដឹងសើរើជាលើកទី២ របស់អតីតគណបក្សសង្គ្រោះជាតិ កាលថ្ងៃទី២៨ខែធ្នូ ឆ្នាំ២០១៧។ ក្នុងនោះ គេនឹងប្រមូលយកស្នាមមេដៃរបស់អតីតសមាជិកក្រុមប្រឹក្សាឃុំសង្កាត់នៃអតីតគណបក្សសង្គ្រោះជាតិដាក់ពាក្យប្ដឹងជាលើកទី៣ ទៅកាន់តុលាការកំពូលក្នុងនាមជាជនរងគ្រោះ។ លទ្ធភាពចុងក្រោយ ប្រសិនបើតុលាការនៅតែបដិសេធ ស្នាមមេដៃរបស់អតីតសមាជិកក្រុមប្រឹក្សា ឃុំ សង្កាត់ អតីតគណបក្សសង្គ្រោះជាតិនឹងត្រូវដាក់ថ្វាយទៅព្រះមហាក្សត្រ ដើម្បីសុំព្រះរាជអន្តរាគមន៍។ នេះបើតាមការអះអាង អតីតតំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរ័ត្ន ដែលជាម្ចាស់ពាក្យបណ្ដឹង។
បើតាមគម្រោង សំណើសុំព្រះរាជអន្តរាគមន៍ទៅព្រះមហាក្សត្រ ធ្វើឡើងក្នុងគោលបំណងតែមួយដូចដាក់ជូនទៅតុលាការដែរគឺ ដើម្បីសុំសិទ្ធិការពារខ្លួនចំពោះអតីតសមាជិកក្រុមប្រឹក្សាឃុំសង្កាត់គណបក្សសង្គ្រោះជាតិ។
តែយ៉ាងណាក៏ដោយ ការអះអាងរបស់លោក អ៊ូ ច័ន្ទរ័ត្ន គឺស្ថិតនៅក្នុងគម្រោងនឹងអនុវត្តបន្តនាពេលខាងមុខតែប៉ុណ្ណោះ។ តែពេលនេះ លោក អ៊ូ ច័ន្ទរ័ត្ន រង់ចាំមើលការវិវត្តនៃពាក្យបណ្ដឹងសិនដោយបន្តលើកឡើងថា វាគឺជារឿងអយុត្តិធម៌សម្រាប់សង្គមកម្ពុជា ក្នុងករណីដែលតុលាការកំពូលមិនពិនិត្យលើពាក្យបណ្ដឹងសើរើជាលើកទី២ ព្រោះមានមនុស្សជាច្រើនបានរងគ្រោះក្រោយគណបក្សសង្គ្រោះជាតិត្រូវបានរំលាយ។
គួររម្លឹកឡើងវិញថា ខ្លឹមសារនៃបណ្ដឹងរបស់អតីតតំណាងរាស្ត្រគណបក្សសង្គ្រោះជាតិរួមមាន ស្នើឲ្យជំនុំជំរះជាថ្មីទាក់ទងនឹងការរំលាយគណបក្សសង្គ្រោះជាតិ ចេញដីការក្សាការពារលើ សមាជិកក្រុមប្រឹក្សា រាជធានីខេត្ត ស្រុកខណ្ឌ និងឃុំសង្កាត់ ទាមទារឲ្យមានការដោះលែង លោក កឹម សុខា។
ចុងក្រោយ ការផ្ដល់សិទ្ធិធ្វើនយោបាយដល់អតីតតំណាងរាស្ត្រ១១៨រូប ។ ទាក់ទងចំណុចនេះ អ្នកនាំពាក្យក្រសួងមហាផ្ទៃធ្លាប់ព្រមានអំពីការបិទសិទ្ធិធ្វើនយោបាយ៥ឆ្នាំទៀត បន្ទាប់ពីក្រសួងមហាផ្ទៃមើលឃើញថា អតីតតំណាងរាស្ត្រគណបក្សសង្គ្រោះជាតិនៅក្រៅប្រទេស ធ្វើសកម្មភាពល្មើសច្បាប់។ តែ លោក អ៊ូ ច័ន្ទរ័ត្ន ចាត់ទុកការព្រមាននេះថា គ្រាន់តែជារឿងចង់ឈ្នះគ្នាទៅវិញទៅមកតែប៉ុណ្ណោះ។ ហ៊ានថា ដូច្នេះលោកសំដៅដល់គម្រោងធ្វើវិសោធនកម្មរដ្ឋធម្មនុញ្ញ ដែលធ្វើឡើងដើម្បីដាក់សម្ពាធទៅអ្នកក្រៅប្រទេសដែលធ្វើសកម្មភាពប្រឆាំងរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ