បើរដ្ឋាភិបាលស្នើឲ្យធ្វើអត្តសញ្ញាណបណ្ណប្រគេនព្រះសង្ឃ មហាសន្និបាតសង្ឃលើកទី២៥នឹងសម្រេច
នៅថ្ងៃពុធនេះ សមាជិកថេរសភាសង្ឃ និងមន្ត្រីសង្ឃជាន់ខ្ពស់ បានប្រាប់វិទ្យុបារាំង RFI ថា ប្រសិនបើជាមានការតម្រូវ ឬក៏ការស្នើសុំពីរដ្ឋាភិបាល, អនុសំវច្ចរៈមហាសន្និបាតលើកទី២៥ ដែលរៀបចំនៅចុងខែមករានេះ នឹងសម្រេចឲ្យព្រះសង្ឃធ្វើអត្តសញ្ញាណបណ្ណ។ ការឲ្យដឹងដូច្នេះ គឺបន្ទាប់ពីគណៈកម្មាការទី៧របស់រដ្ឋសភា ស្នើឲ្យពិចារណាពីការធ្វើអត្តសញ្ញាណបណ្ណប្រគេនព្រះសង្ឃ នៅក្នុងកិច្ចប្រជុំឆ្លើយបំភ្លឺរបស់រដ្ឋមន្ត្រីក្រសួងធម្មការ ពីម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
សមាជិកថេរសភាសង្ឃ គឺសម្តេចឧត្តមចរិយា ឆឹង ប៊ុនឈា ដែលជាអគ្គនាយករងពុទ្ធិកសិក្សាគណៈមហានិកាយ មានថេរដីកាប្រាប់វិទ្យុបារាំងថា បើមានការតម្រូវរបស់រដ្ឋសភា និងរបស់រដ្ឋាភិបាល ជាផ្លូវការ ឲ្យធ្វើអត្តសញ្ញាណបណ្ណសម្រាប់ព្រះសង្ឃទូទាំងប្រទេស គឺទ្រង់គ្មានមានការជំទាស់អ្វីនោះទេ។ ព្រះចៅអធិការវត្តស្រះចក ឆឹង ប៊ុនឈា យល់ឃើញទៀតថា បើធ្វើអត្តសញ្ញាណបណ្ណ ទទួលស្គាល់ភេទអ្នកបួស ថាបានកើតនៅលើទឹកដីនេះនិងមានសញ្ជាតិខ្មែរដែរនោះ គឺគ្មានការខុសឆ្គងទៅនឹងធម្មវិន័យអ្វីទេ។
ទន្ទឹមនេះ ព្រះញ្ញាណវង្ស ឃឹម សន ជាព្រះមេគណរាជធានីភ្នំពេញ ក៏បានយល់ស្របដូច្នេះដែរ។ មន្ត្រីសង្ឃជាន់ខ្ពស់អង្គនេះ មានសង្ឃដីកាបញ្ជាក់ថា បើមានការស្នើសុំដោយរដ្ឋយ៉ាងដូច្នេះ នោះគឺអនុសំវច្ចរៈមហាសន្និបាត លើកទី២៥ ប្រជុំមន្ត្រីសង្ឃទូទាំងប្រទេស ដែលនឹងរៀបចំធ្វើនៅថ្ងៃទី៣០ - ៣១ចុងខែមករានេះ នឹងសម្រេចទៅលើករណីនេះតែម្តង។
សូមបញ្ជាក់ថា សព្វថ្ងៃនេះ ព្រះសង្ឃនៅទូទាំងប្រទេសក្នុងស្រុកខ្មែរ មានចំនួនជាង៥ម៉ឺននាក់ តែគ្មានអត្តសញ្ញាណបណ្ណនោះទេ។ គឺមានតែបណ្ណសម្គាល់ភេទអ្នកបួស នោះគឺ ព្រះឆាយា សម្រាប់ព្រះភិក្ខុ ហើយសង្ឈដីកា សម្រាប់សមណេរ។
ចំណែកព្រះតេជគុណ ប៊ុត ប៊ុនតិញ អតីតស្ថាបនិកបណ្តាញព្រះសង្ឃឯករាជ្យ មានថេរដីកាថា ព្រះសង្ឃ ដែលកើតលើទឹកដីខ្មែរ ជាជនជាតិខ្មែរ ដូច្នេះព្រះសង្ឃក៏ត្រូវមានអត្តសញ្ញាណបណ្ណសញ្ជាតិខ្មែរដូចពលរដ្ឋខ្មែរទូទៅដែរ។
តាមការសង្កេតរបស់ព្រះអង្គ ប៊ុត ប៊ុនតិញ, ដោយសារតែព្រះសង្ឃគ្មានអត្ថសញ្ញាណបណ្ណ និងឯកសារសម្គាល់ខ្លួនត្រឹមត្រូវនោះហើយ ទើបលំបាក នៅក្នុងការចុះឈ្មោះបោះឆ្នោត។ ជាមួយគ្នានេះ អ្នកនាំពាក្យ គ.ជ.ប. បញ្ជាក់ថា ក្នុងចំណោមព្រះសង្ឃទាំង៥ម៉ឺនអង្គ គឺមានព្រះសង្ឃ តែជាង៨ ៨០០អង្គ តែប៉ុណ្ណោះ ដែលបានចុះឈ្មោះបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ