ពេញមួយឆ្នាំ២០១៧ ក្រសួងការងារ ដោះស្រាយវិវាទបុគ្គលជិត ៥០០ ករណី
ក្នុងឆ្នាំ២០១៧ ក្រសួងការងារសហការជាមួយក្រុមប្រឹក្សាអាជ្ញាកណ្តាល បានដោះស្រាយវិវាទបុគ្គលចំនួន ៤៧៦ករណី ដោយនៅក្នុងនោះ មានសះជា ២២៨ករណី មិនសះជាចំនួន ១៩១ករណី និងមោឃៈចំនួន ៥៧ករណី។ នេះបើតាមការលើកឡើងរបស់លោក អ៊ិត សំហេង រដ្ឋមន្រ្តីក្រសួងការងារ នៅក្នុងកិច្ចប្រជុំសម្រេចលើអនាគត និងដើម្បីបញ្ចៀសវិបត្តិហិរញ្ញវត្ថុនៃក្រុមប្រឹក្សាអាជ្ញាកណ្តាល កាលពីថ្ងៃម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ក្រៅពីបានដោះស្រាយវិវាទបុគ្គលបានចំនួនជិត ៥០០ ករណី នាយកដ្ឋានវិវាទការងារនៃក្រសួងការងាររួមនឹងក្រុមប្រឹក្សាអាជ្ញាកណ្តាល ក៏បានដោះស្រាយវិវាទការងាររួមចំនួន ១២៧ករណី សះជា ៥៦ករណី និងមិនសះជាចំនួន ៧០ករណី និងមោឃៈចំនួន ១ករណី។ នេះបើតាមលោក អ៊ិត សំហេង រដ្ឋមន្រ្តីក្រសួងការងារ។
បើតាមក្រសួងការងារ និងបណ្ដុះបណ្ដាលវិជ្ជាជីវៈ វិវាទការងារនៅកម្ពុជា ក្នុងឆមាសទី១ ឆ្នាំ២០១៨ មានការធ្លាក់ចុះគួរឱ្យកត់សម្គាល់។ ថយចុះ គឺបន្ទាប់ពីកម្ពុជា បានអនុវត្តច្បាប់ស្ដីពីសហជីព និងច្បាប់ស្ដីពីការងារបានយ៉ាងខ្ជាប់ខ្ជួនរួចមក។ ខណៈ ក្រសួងបានចេញប្រកាសចំនួន ៤បន្ថែម ទៅលើប្រកាសដែលមានស្រាប់ចំនួន៤ ពាក់ព័ន្ធនឹងការអនុវត្តច្បាប់ស្ដីពី សហជីពឱ្យមានលក្ខណៈកាន់តែប្រសើរ និងគ្រប់ជ្រុងជ្រាយ។
ជាការកត់សម្គាល់ ក្នុងរយៈពេល ១៥ ឆ្នាំ គិតត្រឹមឆ្នាំ២០១៦ ក្រុមប្រឹក្សាអាជ្ញាកណ្តាល បានទទួលសំណុំរឿងវិវាទជាង ២៦៥០ករណី ដែលពាក់ព័ន្ធផ្ទាល់ជាមួយកម្មករនិយោជិតជាង១លាននាក់។ ក្នុងចំណោមសំណុំរឿងវិវាទជាង២ពាន់នេះ ទទួលជោគជ័យបាន ៧៥ភាគរយ តាមរយៈការផ្សះផ្សា និងមជ្ឈត្តកម្ម ដោយចំណាយពេលជាមធ្យម ១៧ថ្ងៃ។ វិវាទការងារទាំងនោះ រួមមានវិវាទទៅលើលក្ខខណ្ឌការងារ ការរំលោភសិទ្ធិការងារលើកម្មករពីសំណាក់ថៅកែ ការចរចាប្រាក់ឈ្នួល និងវិវាទទៅលើប្រាក់ឧបត្ថម្ភជាដើម។
ពាក់ព័ន្ធនឹងបច្ចុប្បន្នភាពនៃការចរចាពីប្រាក់ឈ្នួលអប្បបរមាឆ្នាំ២០១៩ វិញ ភាគីតំណាងឲ្យរដ្ឋាភិបាលគឺក្រសួងការងារ និងបណ្ដុះបណ្ដាលវិជ្ជាជីវៈ ភាគីនិយោជកតំណាងឲ្យថៅកែ និងភាគីសហជីពតំណាងឲ្យកម្មករ-កម្មាការិនី នឹងចូលរួម កិច្ចប្រជុំត្រីភាគីស្ដីពីការកំណត់ប្រាក់ឈ្នួលអប្បរមាឆ្នាំ២០១៩ នៅថ្ងៃទី៥ខែកញ្ញា ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ