លោក ម៉ៅ មុនីវណ្ណ មិនទទួលស្គាល់ព្រំដែនកម្ពុជាវៀតណាមសព្វថ្ងៃ
ជួបជាមួយវិទ្យុបារាំងអន្ដរជាតិនៅថ្ងៃពុធនេះ តំណាងរាស្ត្រមកពីគណបក្សសង្គ្រោះជាតិ លោក ម៉ៅ មុនីវណ្ណ បានសម្ដែងភាពភ្ញាក់ផ្អើលចំពោះសេចក្ដីបំភ្លឺរបស់ក្រសួងការបរទេសដែលថា ពលរដ្ឋកម្ពុជាបានដាំដំណាំចូលដីវៀតណាម ទើបបណ្ដាលឲ្យវៀតណាមប្រតិកម្មបាញ់ថ្នាំពុលបំផ្លាញកសិផលរបស់ខ្មែរ។ ចំពោះលោកម៉ៅ មុនីវណ្ណ ខ្សែព្រំដែនកម្ពុជាវៀតណាមសព្វថ្ងៃ គឺមិនបម្រើផលប្រយោជន៍ខ្មែរទេ។ និងថា លោកមិនទទួលស្គាល់ខ្សែព្រំដែនកម្ពុជាវៀតណាមនេះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ប្រតិកម្មតបទៅនឹងលិខិតរបស់ប្រមុខការទូតខ្មែរ លោក ហោ ណាំហុង ផ្ញើជូន លោក ហេង សំរិន ប្រធានសភាកម្ពុជា តំណាងរាស្ត្រមណ្ឌលកំពង់ចាម លោក ម៉ៅ មុនីវណ្ណ បានសម្ដែងភាពភ្ញាក់ផ្អើល។ ភ្ញាក់ផ្អើលចំពោះការបំភ្លឺរបស់ក្រសួងការបរទេសដែលថា ពលរដ្ឋកម្ពុជាបានដាំដំណាំចូលដីវៀតណាម ទើបបណ្ដាលឲ្យវៀតណាមប្រតិកម្មបាញ់ថ្នាំពុលបំផ្លាញកសិផលរបស់ខ្មែរ។
បើតាមលោក ម៉ៅ មុនីវណ្ណ ប្រសិនបើផ្អែកតាមបច្ចេកទេសជាក់លាក់នៃផែនទីខ្នាត១លើ១រយពាន់ តែមួយ នោះឃើញថាមានភាពត្រឹមត្រូវច្បាស់លាស់ អំពីបន្ទាត់ព្រំដែននិងទឹកដីរបស់កម្ពុជា។ ប៉ុន្តែជាក់ស្ដែង ការបោះបង្គោលព្រំដែនកម្ពុជាវៀតណាម ត្រូវបានធ្វើឡើងដោយផ្អែកទៅលើសន្ធិសញ្ញាបំពេញបន្ថែមឆ្នាំ២០០៥ ដែលសន្ធិសញ្ញានេះ បានធ្វើឲ្យសន្ធិសញ្ញា ៨២-៨៣-៨៥ រស់ឡើងវិញ។ បើតាមលោក ម៉ៅ មុនីវណ្ណ ការរស់ឡើងវិញនៃសន្ធិសញ្ញា ៨២-៨៣-៨៥ ដែលធ្លាប់បានត្រូវលុបចោលដោយកិច្ចព្រមព្រៀងក្រុងប៉ារីសនោះ មិនបម្រើផលប្រយោជន៍កម្ពុជាទេ ព្រោះវាបានធ្វើឲ្យកម្ពុជាបាត់បង់ទឹកដីជាច្រើនគីឡូម៉ែត្រឲ្យប្រទេសវៀតណាម។ តំណាងរាស្ត្រមណ្ឌលខេត្តកំពង់ចាមមកពីគណបក្សប្រឆាំងរូបនេះ អះអាងថា លោកមិនទទួលស្គាល់ខ្សែព្រំដែនដែលកើតឡើងដោយសន្ធិសញ្ញា ៨២-៨៣-៨៥នេះទេ។
យ៉ាងណាក៏ដោយ លិខិតរបស់ក្រសួងការបរទេស មិនបានលើកឡើងសូម្បីតែបន្តិច អំពីសន្ធិសញ្ញាបំពេញបន្ថែមឆ្នាំ២០០៥ និងសន្ធិសញ្ញា ៨២-៨៣-៨៥។ បើតាមលិខិតដដែល ការសិក្សាស្រាវជ្រាវរវាងក្រសួងការបរទេស និងគណៈកម្មាធិការចម្រុះទទួលបន្ទុកកិច្ចការព្រំដែន និងអាជ្ញាធរស្រុក ឃុំ និងភូមិ ធ្វើឡើងដោយផ្អែកតាមផែនទីខ្នាត១លើ១រយពាន់ SGI និងអនុសារណៈនៃការយោគយល់គ្នាឆ្នាំ២០១១។ បើតាមទឡ្ហីករណ៍ទាំងពីរនេះ ក្រសួងការបរទេសបានបញ្ជាក់នៅក្នុងលិខិតរបស់ខ្លួនថា ក្នុងឆ្នាំ២០១៥នេះ ពលរដ្ឋខ្មែរបានដាំដំណាំចូលដីវៀតណាមចំនួន១៦,៦ហិចតា ដែលជាហេតុធ្វើឲ្យវៀតណាមប្រតិកម្ម បាញ់ថ្នាំពុលដាក់ដំណាំរបស់កសិករខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ