អឺរ៉ុបរៀបយុទ្ធសាស្ត្រតបនឹងនយោបាយពាណិជ្ជកម្មជាតិនិយមរបស់លោកត្រាំ
ដើម្បីប្រឈមទប់ទល់នឹងការគំរាមកំហែងរបស់លោក ដូណាល់ ត្រាំ ដែលចង់ដំឡើងពន្ធលើការនាំចូលដែកថែប អាលុយមីញ៉ូម បរទេសមកសហរដ្ឋអាមេរិក គណៈកម្មការអឺរ៉ុប ក៏នឹងចាត់វិធានការដំឡើងពន្ធលើទំនិញអាមេរិកមួយចំនួននាំចូលមកអឺរ៉ុបវិញដែរ។ នៅថ្ងៃពុធនេះ គណៈកម្មការអឺរ៉ុប បានបង្ហាញយុទ្ធសាស្ត្រគោល សំដៅវាយប្រហារតបវិញលើផលិតផលអាមេរិកមួយចំនួនដូចជា ខោខូវបយ ប៊័រសណ្តែកដី ទឹកក្រូច ឬស្រា។
ចុះផ្សាយនៅថ្ងៃ៖
ស្តាប់ - ០២:០០
នៅក្នុងសង្គ្រាមពាណិជ្ជកម្មគ្មានទេអ្នកឈ្នះ ! នេះបើតាមប្រសាសន៍របស់លោកស្រីស្នងការទទួលបន្ទុកពាណិជ្ជកម្មអឺរ៉ុប Cécilia Malmström ដែលបន្តសង្ឃឹមជានិច្ចថាអឺរ៉ុប នឹងមិនជាប់ក្នុងវិធានការដំឡើងពន្ធនាំចូលដែកថែប និងអាលុយមីញ៉ូមរបស់់អាមេរិកទេ។
កាលពីសប្តាហ៍មុន លោកត្រាំ បានប្រកាសដំឡើងពន្ធនាំចូលដែកថែប ២៥% និងអាលុយមីញ៉ូម១០%។ លោកត្រាំបញ្ជាក់ជាថ្មីបំណងដំឡើងពន្ធលោហៈនេះ នៅថ្ងៃអង្គារទី ៦មីនា ដោយថែមទាំងបានបន្ទោសសហភាពអឺរ៉ុប ថាយកចំណេញលើអាមេរិកក្នុងវិស័យពាណិជ្ជកម្មទៀត។
វិធានការបែបជាតិនិយមរបស់លោកត្រាំនេះ បានបំផ្លាញទំនាក់ទំនងពាណិជ្ជកម្មអន្តរអាត្លង់ទិកខ្លាំងណាស់ ! និងអាចធ្វើឱ្យអឺរ៉ុបអាចរងការខាតបង់ដល់ទៅ២៨០០លានអឺរ៉ូ ! ព្រោះក្នុងមួយឆ្នាំៗ អឺរ៉ុបនាំចេញដែកថែបប្រមាណ ៥ពាន់លានអឺរ៉ូ និងអាលុយមីញ៉ូម ១ពាន់លានអឺរ៉ូ ទៅសហរដ្ឋអាមេរិក។ នេះបើតាមការគណនារបស់គណៈកម្មការអឺរ៉ុប។
ហេតុដូច្នេះហើយបានជាអឺរ៉ុបត្រូវរៀបយុទ្ធសាស្ត្រសម្រាប់ទប់ទល់។ វិធានការដំបូង គឺសំដៅស្វែងរកលំនឹងពាណិជ្ជកម្មមកបង្គ្រប់ការខាតបង់ ស្របតាមកិច្ចព្រមព្រៀងនិងច្បាប់របស់អង្គការពាណិជ្ជកម្មពិភពលោក OMC។ អឺរ៉ុបចង់ធ្វើអ្វីដែលជះផលអាក្រក់ខ្លាំងបំផុតដល់នយោបាយពាណិជ្ជកម្មជាតិនិយមរបស់អាមេរិក តែប៉ះពាល់តិចតួចដល់អ្នកប្រជាពលរដ្ឋអឺរ៉ុប ដោយសំដៅយកពន្ធខ្លាំងទៅលើផលិតផលអាមេរិកពិសេសៗណាមួយ ដើម្បីព្រមានលោកត្រាំ ដូចជាផលិតផលម៉ាក Harley Davidson Levi’s ព្រមទាំងប្រភេទផលិតផលស្រាខ្លាំង។
បញ្ជីឈ្មោះផលិតផលដែលនឹងជាប់ពន្ធសងសឹក នឹងត្រូវបង្ហាញជាសាធារណនៅក្នុងពេលឆាប់ៗ និងអាចចាប់មានឥទ្ធិពលនៅពេលបីខែ ពោលគឺនៅពេលណាដែលអាមេរិកប្រកាសអនុវត្តវិធានការគេជាផ្លូវការសិន។ ក្រៅអំពីចំណាត់ការតបត សហភាពអឺរ៉ុបក៏បានត្រៀមដាក់ឱ្យដំណើរវិធានការ “សង្គ្រោះ” មួយទៀត នៅពីរបីសប្តាហ៍ទៀត សម្រាប់ការពារឧស្សាហកម្មអឺរ៉ុប គឺកំរិតការនាំចូលផលិតផលធ្វើពីថែកដែកនិងអាលុយមីញ៉ូម។
ហើយបើចាំបាច់មែនទែន សហភាពអឺរ៉ុប អាចរួមដៃជាមួយប្រទេសពាក់ព័ន្ធផ្សេងទៀត រាប់ទាំងចិនផង ដាក់ពាក្យបណ្តឹងរួមប្រឆាំងសហរដ្ឋអាមេរិក នៅអង្គការពាណិជ្ជកម្មពិភពលោកតែម្តង។ ដំណើរការប្តឹងផ្តល់នេះអាចប្រើពេលពីរឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ