ជំនួបកំពូលបាល់កង់ ដើម្បីរកច្រកចេញឲ្យវិបត្តិជនអន្តោប្រវេសន៍ នៅអឺរ៉ុប
កិច្ចប្រជុំកំពូលប្រទេសបាល់កង់ បើកធ្វើ នៅថ្ងៃព្រហស្បតិ៍ នៅទីក្រុងវីយ៉ែន ប្រទេសអូទ្រីស នឹងផ្តោតសំខាន់ទៅលើវិបត្តិជនអន្តោប្រវេសន៍។ នាយករដ្ឋមន្រ្តី អាល្លឺម៉ង់ លោកស្រី អង់គែឡា ម៉ែរហ្គែល និងប្រមុខការបរទេសអឺរ៉ុប នឹងចូលរួមក្នុងជំនួបប្រជុំជាមួយ ថ្នាក់ដឹកនាំរបស់ប្រទេសបាល់កង់ ដែលកំពុងក្លាយជាផ្លូវឆ្លងកាត់របស់ជនអន្តោប្រវេសន៍ ឬជនភៀសខ្លួន។ គោលដៅ គឺស្វែងរកដំណោះស្រាយ ជួយប្រទេសបាល់កង់ ដែលកំពុង ប្រឈមនឹងការហូរចូល ជន អន្តោប្រវេសន៍ ដែលមានប្រទេសអឺរ៉ុបខាងលិចជាគោលដៅចុងក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:០២
ជនអន្តោប្រវេសន៍ ជាង៣ពាន់ នាក់ នៅបន្តធ្វើដំណើរចេញពីប្រទេស ស៊ែប៊ី ចូលក្នុងទឹកដីហុងគ្រី នៅថ្ងៃព្រហស្បតិ៍ ថ្ងៃដែលជំនួបកំពូលបាល់កង់ បើករៀបចំក្នុងប្រទេសអូទ្រីស។ ជំនួបកំពូល ដែលត្រូវបានប្រកាសរៀបចំ តាំងពីឆ្នាំមុន មាន គោលដៅនិយាយពីការសហការក្នុងតំបន់ និងគម្រោងពង្រីកវិសាលភាព សហភាពអឺរ៉ុប ទៅលើបណ្តាប្រទេសបាល់កង់ ដែលមួយចំនួននៅមិនទាន់ក្លាយជាសមាជិករបស់សហភាពអឺរ៉ុប។
ក្នុងរយៈពេលតែ៦ខែដើមឆ្នាំនេះ ជនអន្តោប្រវេសន៍ជាង ១សែននាក់ បានប្រើផ្លូវ គោក ដែលគេហៅថា ផ្លូវបាល់កង់ ដើម្បីធ្វើដំណើរសំដៅ អឺរ៉ុបខាងលិច និងអឺរ៉ុបខាងជើង ដែលមានដូចជាអាល្លឺម៉ង់ អង់គ្លេស ឬស៊ុយអ៊ែត។ ផ្លូវបាល់កង់ ចាប់ផ្តើមពេញនិយម នៅមួយរយៈចុងក្រោយនេះ ព្រោះវាមិនសូវគ្រោះថ្នាក់ខ្លាំង ដល់ជីវិត ដូចការធ្វើដំណើតាមទូក ក្នុងសមុទ្រមេឌីរ៉ាណេ។
ជនអន្តោប្រវេសន៍ដែលភាគច្រើនជាជនភៀសខ្លួនពីសង្រ្គាម ក្នុងប្រទេសស៊ីរី អ៊ីរ៉ាក់ និងអាហ្វហ្កានីស្ថាន បានប្រើប្រាស់ទឹកដីតួកគី ដើម្បី ឆ្លងចូលទៅប្រទេសក្រិក។ ពួកគេចាកចេញពីក្រិក ចូលទៅ ប្រទេសម៉ាសេដ្វាន រួច មក គឺ ធ្វើដំណើរតាមឡាន និងរថភ្លើងដើម្បីឆ្លងកាត់ស៊ែប៊ីចូលបន្តទៅក្នុងទឹកដីហុងគ្រី និងអូទ្រីស។
អូទ្រីសប្រទេសម្ចាស់ផ្ទះ ជំនួបកំពូលបានប្រកាសត្រៀមប្រើទាហាន៥០០នាក់ដើម្បីដោះស្រាយលំហូរចូលជនអន្តោប្រវេសន៍។ ចំណែក ហុងគ្រី វិញ គឺធ្វើខ្លាំងតែម្តង ដោយបានសាងសង់របងលួស បន្លាដែក នៅតាមព្រំដែនភាគខាងត្បូង ជាង ១៧៥គីឡូម៉ែត្រ ជាប់ជាមួយប្រទេសស៊ែប៊ី។
ជនអន្តោប្រវេសន៍ធ្វើដំណើរដោយសេរី នៅម៉ាសេដ្វាន ស៊ែប៊ី
ស៊ែប៊ី ម៉ាសេដ្វាន ស្ថិតនៅក្នុងប្រទេសបាល់កង់មែន ប៉ុន្តែ មិនមែនជាសមាជិករបស់សហភាពអឺរ៉ុបទេ។ ជនអន្តោប្រវេសន៍ទាំងនោះ គ្មានចង់រស់នៅ តាំងទី ក្នុងស៊ែប៊ី ឬម៉ាសេដ្វាន ដូច្នេះ អាជ្ញាធររបស់ប្រទេសនេះ គ្មានអ្វីដែលត្រូវឈឺក្បាល ទប់ស្កាត់កុំឲ្យជនអន្តោប្រវេសន៍ ឆ្លងកាត់ទឹកដីរបស់ខ្លួនដែរ។ គេដឹងថា គោលដៅរបស់ជនអន្តោប្រវេសន៍ គឺទឹកដីអឺរ៉ុប ដែលចាប់ផ្តើមតាំងពីប្រទេសហុងគ្រី ដែលជាប្រទេស ព្រំដែនរបស់អឺរ៉ុប និងជាច្រកចូលថ្មី តាមផ្លូវគោក របស់ជនអន្តោប្រវេសន៍ ទៅក្នុងសហភាពអឺរ៉ុប។
ហុងគ្រី សាងសង់ជញ្ជាំង ដែក នៅព្រំដែនជាមួយប្រទេសស៊ែប៊ី ក៏ព្រោះតែប្រទេសនេះ លែងចង់ទទួលជនភៀសខ្លួន ដែលបានហូរចូលមកក្នុងទឹកដីរបស់ខ្លួនយ៉ាងគំហុក។ ត្រូវដឹងថា ទោះបីជាជនអន្តោប្រវេសន៍ ជនភៀសខ្លួនពីសង្រ្គាម នៅស៊ីរី អ៊ីរ៉ាក់ មាន គោលដៅ ចង់ទៅប្រទេសអឺរ៉ុបខាងជើងក្តី ប៉ុន្តែ ហុងគ្រីផ្ទាល់ បានទទួលពាក្យសុំជ្រកកោណ ដល់ទៅ១សែននាក់ គិតចាប់តាំងពីខែមករាកន្លង។ ចំនួននេះ វាច្រើនណាស់ ហើយហុងគ្រី ដែលមានសេដ្ឋកិច្ចមិនសូវរឹងមាំផងនោះ គឺមិនអាចទ្រាំទ្រ ទទួលជួយជនភៀសខ្លួនទាំងនោះទេ។
ដើម្បីជួយដល់ប្រទេសបាល់កង់ ឲ្យអាចប្រឈមនឹងវិបត្តិលំហូរជនអន្តោប្រវេសន៍ អាល្លឺម៉ង់ និងសហភាពអឺរ៉ុបបានប្រកាសផ្តល់ជំនួយ ២លាន៥សែនអឺរ៉ូ។ ប៉ុន្តែ ទឹកប្រាក់ដ៏ស្តួចស្តើងនេះ ទំនងមិនអាចដោះស្រាយអ្វីបានទេ ព្រោះ ថា ជារៀងរាល់ថ្ងៃ មានជនអន្តោប្រវេសន៍ ពី៣ ទៅ ៤ពាន់នាក់ទៅហើយ ដែលឆ្លងចូល ទៅក្នុងប្រទេសបាល់កង់។
អាល្លឺម៉ង់ជាប្រទេសអឺរ៉ុបដែលមានសមានចិត្ត ច្រើនជាងគេ ក្នុងរឿងទទួលជនភៀសខ្លួនស៊ីរី។ ប៉ុន្តែ អាល្លឺម៉ង់ ដែលប្រយ័ត្នប្រយែងខ្លាំង ក្នុងរឿងជនអន្តោប្រវេសន៍ ប្រើទឹកដីបាល់កង់ ឆ្លងចូលអឺរ៉ុប ក៏ព្រោះតែ អាល្លឺម៉ង់ ខ្លាច ក្រែងមានជនអន្តោប្រវេសន៍ សេដ្ឋកិច្ចមកពីប្រទេសកបាល់កង់ ក្រីក្រ ចូលទៅបន្លំខ្លួន ក្នុងចំណោមជនភៀសខ្លួន ដើម្បី ទៅរស់នៅ ធ្វើការក្នុងប្រទេសអាល្លឺម៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ