GMAC អំពាវនាវលើកកំពស់ផលិតភាពការងារ ខណៈសហជីពទាមទារឲ្យនិយោជកបង្កលក្ខណៈងាយស្រួលដល់កម្មករ
បន្ទាប់ពីប្រាក់ឈ្មួលគោលរបស់កម្មករក្នុងវិស័យកាត់ដេរ និងដេរស្បែកជើងត្រូវបានកំណត់ត្រឹម១៤០ដុល្លា សម្រាប់ឆ្នាំ២០១៦ហើយមក នៅថ្ងៃទី ២០ តុលានេះ សមាគមរោងចក្រកាត់ដេរនៅកម្ពុជាហៅកាត់ថា GMAC បានចេញសេចក្តីអំពាវនាវឲ្យមានការផ្តោតជាថ្មីលើការលើកកំពស់ផលិតភាពការងារ និងគាំទ្រចំពោះការអំពាវនាវឲ្យអ្នកបញ្ជាទិញប្រើប្រាស់វិធីសាស្រ្តបញ្ជាទិញដែលមាននិរន្តរភាពជាងមុន។ ប៉ុន្តែការអំពាវនាវនេះ ត្រូវបានតំណាងសហជីពកម្មករ លើកឡើងថា ដើម្បីបង្កើនផលិតភាពការងារ ខាងនិយោជកក៏គួរតែបង្កលក្ខណៈងាយស្រួលដល់កម្មករដើម្បីបំពេញការងារដែរ។
ចុះផ្សាយនៅថ្ងៃ៖
ស្តាប់ - ០២:៣៣
ជាលទ្ធផលនៃការចរចាឆ្នាំនេះ ប្រាក់ឈ្នួលអប្បបរមាសម្រាប់កម្មករក្នុងវិស័យកាត់ដេរ និងផលិតស្បែកជើង ត្រូវបានដំឡើងដល់១៤០ ដុល្លាក្នុងមួយខែ សម្រាប់ឆ្នាំ២០១៦។ អ្នកជំនាញក្នុងវិស័យកាត់ដេរនិយាយថា ដូច្នេះ យើងចាំបាច់ត្រូវផ្តោតលើការបង្កើនផលិតភាពការងារជារួម។ យោងតាមអង្គការអន្តរជាតិខាងការងារ ILO ផលិតភាពការងារក្នុងវិស័យកាត់ដេរកម្ពុជា ក្នុងរយៈពេលបីឆ្នាំចុងក្រោយនេះបាននិងកំពុងធ្លាក់ចុះ។ នេះគឺជាខ្លឹមសារនៅក្នុងសេចក្តីអំពាវនាវ របស់សមាគមរោងចក្រកាត់ដេរនៅកម្ពុជា ហៅកាត់ថាGMAC។
លោកខេន លូ អគ្គលេខាធិការរបស់GMAC បានបញ្ជាក់នៅក្នុងសេចក្តីអំពាវនាវថា ប្រាក់ឈ្នួលគឺជាការចំណាយប្រតិបត្តិការដ៏ធំមួយសម្រាប់រោងចក្រ។ លោកបានបន្តថា ឥឡូវនេះ យើងត្រូវមើលថាភាគីទាំងអស់ ទាំងអ្នកបញ្ជាទិញ ដែលផ្តោតលើការបង្កើនផលិតភាពការងារ ដើម្បីជួយទប់ទល់នឹងចំណាយដែលកើនឡើងទើបអាចរក្សារោងចក្រឲ្យនៅបន្តទៅមុខបាន។
លោកអាត់ ធន់ ប្រធានសហជីពប្រជាធិបតេយ្យកម្មករកាត់ដេរកម្ពុជា មិនជំទាស់និងសេចក្តីអំពាវនាវរបស់GMAC ដែលបានចេញផ្សាយនៅពេលនេះទេ ប៉ុន្តែលោកលើកឡើងថា ទន្ទឹមនឹងសេចក្តីអំពាវនេះ និយោជកផ្ទាល់ក៏គួរតែបង្កលក្ខណៈងាយស្រួលដល់កម្មករក្នុងការបំពេញការងារ ដើម្បីទទួលបានផលិតផលការងារខ្ពស់ផងដែរ។
លក្ខណៈងាយស្រួល ដែលលោកអាត់ ធន់បានលើកឡើងនោះមានដូចជាការផ្តល់អាហារថ្ងៃត្រង់ ឬក៏ផ្តល់ប្រាក់១ដុល្លា ក្នុងមួយថ្ងៃបន្ថែមទៀត សម្រាប់ការបរិភោគឲ្យបានសមរម្យ។ ការផ្តល់កន្លែងស្នាក់នៅ ឬក៏ថ្លៃធ្វើដំណើរ ក្នុងមួយខែ ១៥ដុល្លាបន្ថែមទៀត។ ការធ្វើកិច្ចសន្យាការងារឲ្យបានច្បាស់លាស់រវាងរោងចក្រនិងកម្មករ និងការផ្តល់សំភារៈទំនើបៗ ដើម្បីងាយស្រួលក្នុងការផលិតជាដើម។
លោកអាត់ ធន់បានបញ្ជាក់ថា ដើម្បីទទួលបានផលិតផលការងារខ្ពស់ និយោជកគឺជាអ្នកដែលទទួលខុសត្រូវស្ទើរតែ ៩០% ទៅហើយ ដូច្នេះខាងនិយោជកក៏ត្រូវតែពិចារណាពីចំណុចមួយចំនួនដែលបានលើកឡើងនេះផងដែរ។ សូមបញ្ជាក់ផងដែរ នៅល្ងាចថ្ងៃអង្គារ ទី២០ តុលានេះ តំណាងសហជីពការពារផលប្រយោជន៍របស់កម្មករបានប្រជុំគ្នាពីលទ្ធភាពនៃការធ្វើបាតុកម្មតវ៉ាទៅនឹងតំលៃប្រាក់ឈ្នួលរបស់កម្មករចំនួន ១៤០ដុល្លាក្នុងមួយខែ ដោយពួកគេមិនសូវជាពេញចិត្តនឹងតួលេខនេះទេ។
លោកអាត់ ធន់បានលើកឡើងថា ជាជំហានដំបូង តំណាងសហជីពនឹងលើកជាសំណើចំនួន១១ ចំណុចទៅកាន់តំណាងថៅកែរោងចក្រកាត់ដែរ និងក្រសួងការងារផ្ទាល់។ សំណើទាំង ១១ចំណុចនោះរួមមានការផ្តល់ថ្លៃបាយ មធ្យោបាយធ្វើដំណើរ និងការដកពាក្យបណ្តឹងចំពោះតំណាងសហជីពមួយចំនួន ដែលត្រូវបានចោទប្រកាន់នាពេលកន្លងមកជាដើម។ ប៉ុន្តែប្រសិនបើសំណើទាំងអស់នេះមិនត្រូវបានដោះស្រាយ លោកអាត់ ធន់បញ្ជាក់ថា ខាងសហជីពនឹងធ្វើការតវ៉ាជាសាធារណៈតាមរយៈការហែរក្បួនបាតុកម្មនៅតាមដងផ្លូវជាបន្តទៀត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ