ហេតុការណ៍ផ្ទុះនៅលីបង់ ប្រធានាធិបតីថាអាចមានការលូកដៃពីកម្លាំងខាងក្រៅ ដោយគ្រាប់បែក ឬមីស៊ីល
ហេតុការណ៍ផ្ទុះនៅកំពង់ផែបេរូត ស្លាប់មនុស្សប្រមាណ១៥០នាក់ និងរបួសជិត៥ពាន់នាក់ គឺអាចមកពី«ការធ្វេសប្រហែស» ឬអាចមានការលូកដៃពី«កម្លាំងភាគីខាងក្រៅ» ដោយបំផ្ទុះគ្រាប់បែក ឬបាញ់មីស៊ីល ទៅលើឃ្លាំងស្តុកសារធាតុគីមី។ នេះបើតាមការលើកឡើងរបស់ប្រធានាធិបតីលីបង់ ដែលបានចាក់ផ្សាយតាមកញ្ចក់ទូរទស្សន៍ ថ្ងៃសុក្រ។ នេះជាលើកទី១ហើយ ដែលប្រមុខរដ្ឋលីបង់ បានលើកឡើងពីលទ្ធភាព នៃ«ការលូកដៃធ្វើសកម្មភាពពីកម្លាំងខាងក្រៅ»។
ចុះផ្សាយនៅថ្ងៃ៖
ស្តាប់ - ០១:៣៣
ដើម្បីផ្ទៀងផ្ទាត់ថាអាចនឹងមានការបាញ់មីស៊ីល ឬក៏ ទម្លាក់គ្រាប់បែកពីលើយន្តហោះ ទៅលើកន្លែងស្តុកសារធាតុគីមី ឬយ៉ាងណា ប្រធានាធិបតីលីបង់ មីសែល អ៊ូន (Michel Aoun) ថាលោកស្នើសុំរូបភាពពីលើអាកាសពីបារាំង យកទៅពិនិត្យមើលឱ្យច្បាស់។ តែបើបារាំងមិនឱ្យរូបភាពពីលើអាកាសនៅថ្ងៃកើតហេតុទេ លោកថាចាំសុំប្រទេសផ្សេងទៀត ក៏បាន។ លោកប្រធានាធិបតីលីបង់ ថែមទាំងសង្កត់ធ្ងន់ថា ដើម្បីផ្ទៀងផ្ទាត់មើលខ្លួនឯង តែលោកច្រានចោលដាច់ខាត មិនចង់ឱ្យមានការស៊ើបអង្កេតពីភាគីអន្តរជាតិណាមួយនោះទេ ព្រោះលោកអះអាងថានាំឱ្យ«បន្ថយការពិត»ទៅវិញទេ។
ការលើកឡើងចុងក្រោយនេះ គឺខុសពីការចង់បានរបស់ប្រមុខរដ្ឋបារាំង ម៉ាក្រុង ដែលបានបោះដៃថាបារាំងចាំជួយជានិច្ច ដើម្បីឱ្យការស៊ើបអង្កេតរកការពិត ឱ្យមានតម្លាភាព។
ដំណើងការណ៍ស៊ើបអង្កេតរកមូលហេតុផ្ទុះនិងរកអ្នកទទួលខុសត្រូវ គឺកំពុងស្ថិតនៅក្នុងដៃរបស់សមត្ថកិច្ចនិងតុលាការលីបង់នៅឡើយ។ គិតត្រឹមថ្ងៃសុក្រ ក្រុមនគរបាលលីបង់ បានសួរចម្លើយមនុស្ស១៨នាក់ ហើយចៅក្រមស៊ើបសួរ Fadi Akiki ប្រកាសប្រាប់អ្នកកាសែតថា ប៉ូសិលបានសម្រេចចាប់ឃាត់ខ្លួនមនុស្ស១៦នាក់ ក្នុងចំណោមនោះ ក៏មានប្រធានគ្រប់គ្រងកំពង់ផែ ម្នាក់ផង។
ជាមួយគ្នានេះ រតនាគារជាតិលីបង់ បានសម្រេចចេញបញ្ជាក់ឱ្យបង្កកគណនីធនាគារ របស់ជនពាក់ព័ន្ធចំនួន ៧នាក់ ក្នុងនោះ គណនីធនាគារ របស់ប្រធានគ្រប់គ្រងកំពង់ផែ ហើយគណនីធនាគាររបស់ អគ្គនាយកសាខាគយប្រចាំកំពង់ផែបេរូត នេះ ក៏ត្រូវបង្កកដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ