ផ្ទុះនៅកំពង់ផែបេរូត៖ ក្រុមជួយសង្គ្រោះនៅបន្តរុករកអ្នកបាត់ខ្លួនជាង៦០នាក់
៤ថ្ងៃក្រោយ ហេតុការណ៍ផ្ទុះនៅកំពង់ផែបេរូត ដែលបានសម្លាប់មនុស្ស១៥៤នាក់ និងរបួស ជាង៥ពាន់ ប្រជាជនលីបង់ រាប់ពាន់នាក់ កំពុងត្រៀមខ្លួន ចូលរួមមហាបាតុកម្ម នៅល្ងាចថ្ងៃសៅរ៍នេះ ដើម្បីប្រឆាំងរដ្ឋាភិបាល ដែលពួកគេចោទប្រកាន់ថា ជាអ្នកទទួលខុសត្រូវ នៃហេតុការណ៍ផ្ទុះគ្រាប់ កាលពីថ្ងៃអង្គារ។ ជាបាតុកម្មដើម្បីសងសឹក និងស្វែងរកយុត្តិធម៌ឲ្យជនរងគ្រោះ។ ប្រធានាធិបតី លីបង់ លោក មីស្ហែល អ៊ូន បានបដិសេធ កាលពីថ្ងៃសុក្រ មិនឲ្យមានការស៊ើបអង្កេតអន្តរជាតិ ទៅតាមការអំពាវនាវរបស់ប្រធានាធិបតី បារាំង លោកអេម៉ានុយអែល ម៉ាក្រុង ដែលបានទៅធ្វើទស្សនកិច្ច ទីក្រុងបេរូត កាលពីថ្ងៃព្រហស្បតិ៍។
ចុះផ្សាយនៅថ្ងៃ៖
ស្តាប់ - ០២:១៨
នៅ៤ថ្ងៃក្រោយហេតុការណ៍ផ្ទុះ នៅកំពង់ផែបេរូត ក្រុមជួយសង្រ្គោះអន្តរជាតិ មកពីប្រទេសបារាំង រុស្ស៊ី អ៊ីតាលី អាល្លឺម៉ង់ និងបណ្តាប្រទេសជាច្រើន នៅបន្តរុករកជនរងគ្រោះ ដែលកំពុងបាត់ខ្លួន នៅក្រោមគំនរថ្មបាក់បែក។ តាមក្រសួងសុខាភិបាលលីបង់ មនុស្សច្រើនជាង៦០នាក់ កំពុងបាត់ខ្លួន នៅឡើយ។ ថ្ងៃសៅរ៍ នេះជាថ្ងៃចុងក្រោយ ដែលរាល់ជនរងគ្រោះ នៅ ជាប់ក្រោមគំនរថ្ម អាចនៅមានសង្ឃឹម នៅមានជីវិត។
ចាប់តាំងពីហេតុការណ៍ផ្ទុះ ដ៏ធំសម្បើម មិនធ្លាប់មាននៅកំពង់ផែបេរូត កាលពីថ្ងៃអង្គារ លីបង់បានទទួលជំនួយអន្តរជាតិជាបន្តបន្ទាប់។ ប៉ូលិសអាំងទែរប៉ូលបញ្ជូនអ្នកជំនាញខាងកំណត់អត្តសញ្ញាណជនរងគ្រោះ ទៅប្រទេសលីបង់ ចំណែក អង្គការស្បៀងអាហារពិភពលោកបានសន្យាផ្តល់ជំនួយដល់ក្រុមគ្រួសារដែលរងគ្រោះ និងបញ្ជូនម្សៅស្រូវសាលី ទៅជំនួសស្តុកក្នុងឃ្លាំង ដែលត្រូវបំផ្លាញ ខ្ទេច ដោយសារហេតុការណ៍ផ្ទុះ នៅកំពង់ផែ។ ទីភ្នាក់ងារជំនួយអាមេរិកាំងបានសន្យាផ្តល់ជំនួយស្បៀងអាហារ និងថ្នាំពេទ្យតម្លៃ១៥លានដុល្លារ សម្រាប់ជួយប្រជាជន លីបង់។ ចំណែក ប្រធានាធិបតីអាមេរិក លោកដូណាល់ ត្រាំ បានសន្យាចូលរួមជាមួយប្រធានាធិបតីបារាំង ក្នុងសន្និសីទស្វែងរកជំនួយសម្រាប់លីបង់ ដែលត្រូវរៀបចំនៅថ្ងៃអាទិត្យ ស្អែក ក្រោមការចាត់ចែងរបស់អង្គការសហប្រជាជាតិ។
រដ្ឋាភិបាលលីបង់ដែលធ្លាប់បានលើកឡើងពីការខូចខាតដែលមានតម្លៃ ជាង ៣ពាន់លានដុល្លារ ដោយសារហេតុការណ៍ផ្ទុះនៅកំពង់ផែ សង្ឃឹមទទួលបានជំនួយអន្តរជាតិ សម្រាប់ស្តារកសាងលីបង់ឡើងវិញ ក៏ដូចជាស្តារមុខមាត់របស់រដ្ឋាភិបាល នៅចំពោះមុខប្រជាជនដែលកំពុងមានកំហឹងក្រេវក្រោធ ដោយសារវិបត្តិមិនចេះចប់នៅលីបង់។ នៅថ្ងៃសុក្រ ទាំងប្រធានាធិបតី និងនាយករដ្ឋមន្រ្តីលីបង់បានលើកឡើងពីការធ្វេសប្រហែស ឬការវាយប្រហារមីស៊ីលពីខាងក្រៅ។ រដ្ឋាភិបាលលីបង់បានសន្យាការស៊ើបអង្កេត ថ្នាក់ ជាតិ ប៉ុន្តែ បដិសេធការស៊ើបការអង្កេតអន្តរជាតិ ដែលលោកប្រធានាធិបតី លីបង់ មីស្ហែល អ៊ូនវាយតម្លៃថា នឹងធ្វើឲ្យ”ការពិតមានចំនួនតិច”។
ការសន្យារបស់រដ្ឋាភិបាល និងការចាប់ឃាត់ខ្លួន មនុស្ស២១នាក់ នៅក្រោយហេតុការណ៍ផ្ទុះនៅកំពង់ផែ មិនបានធ្វើឲ្យប្រជាជនលីបង់ស្ងប់ចិត្តនោះទេ។ នៅថ្ងៃសៅរ៍នេះ ប្រជាជនលីបង់រាប់ពាន់នាក់ បានសន្យា ធ្វើមហាបាតុកម្មមួយ ដើម្បីពិន័យ ទាមទារឲ្យ ផ្លាស់ប្តូរ រដ្ឋាភិបាល ដែលពួកគេចោទប្រកាន់ថា ពុករលួយ គ្មានសមត្ថភាពដឹកនាំលីបង់ និងធ្វើឲ្យលីបង់កាន់តែធ្លាក់ជ្រៅ ទៅក្នុងវិបត្តិសេដ្ឋកិច្ច វិបត្តិប្រាក់បំណុល និងចុងក្រោយ គឺការផ្ទុះនៅកំពង់ផែ ដែលសម្លាប់មនុស្ស១៥៤នាក់ របួស ៥ពាន់នាក់ និងធ្វើឲ្យមនុស្ស៣សែននាក់បាត់បង់ជំរក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ