ធនាគារពិភពលោកនឹងចែកចាយថ្នាំបង្ការកូវីដ១៩ នៅលីបង់នៅខែកុម្ភៈ
នេះគឺជាប្រតិបត្តិការដំបូងដែលផ្តល់ហិរញ្ញវត្ថុដោយធនាគារពិភពលោក ក្នុងការជួយចាក់ថ្នាំបង្ការប្រឆាំងជំងឺកូវីដ១៩ ក្នុងប្រទេសមួយ។ ឆ្លងកាត់វិបត្តិសេដ្ឋកិច្ចដ៏ធ្ងន់ធ្ងរហើយ លីបង់កំពុងប្រឈមនឹងការឆ្លងរាតត្បាតខ្លាំងគ្មានប្រៀបទៀត។ ចំនួនអ្នកឆ្លងនិងឈឺកូវីដ១៩បានកើនឡើងខ្ពស់ខ្លាំង។ រដ្ឋាភិបាលបានសម្រេចចិត្តនៅថ្ងៃព្រហស្បតិ៍ទី ២២មករា ២០២១ ពន្យារវិធានការបិទខ្ទប់ប្រទេសយ៉ាងតឹងតែងរយៈពេលពីរសប្តាហ៍បន្ថែមទៀត។
ចុះផ្សាយនៅថ្ងៃ៖
ស្តាប់ - ០២:១៦
ធនាគារពិភពលោកបានទម្លាយកញ្ចប់ថវិកា ៣៤លានដុល្លារ សម្រាប់ចំណាយចែកចាយថ្នាំបង្ការប្រឆាំងនឹងជំងឺកូវីដ១៩ ជូនប្រជាពលរដ្ឋលីបង់ចំនួនជាងពីរលាននាក់។ ហេតុអ្វីលីបង់ ? ព្រោះចំនួនអ្នកឆ្លងកូវីដ១៩ នៅលីបង់បានស្ទុះកើនឡើងគ្មានប្រៀប។
មានប្រជាជនសរុបជាង៦លាននាក់ តាំងពីដើមឆ្នាំ២០២១មក លីបង់រាប់ឃើញមានអ្នកឆ្លងថ្មីជាមធ្យមជាង៥៥០០នាក់ក្នុងមួយថ្ងៃៗ និងមានអ្នកស្លាប់សរុប២០៨៤នាក់។ បើតាមអង្គការសុខភាពពិភពលោក អត្រាវិជ្ជមានកូវីដ១៩ខ្ពស់បំផុត មានត្រឹមតែ៥%ប៉ុណ្ណោះ តែនៅលីបង់អត្រាវិជ្ជមានកូវីដ១៩ ពេលនេះបានឡើងដល់១៧%។ លីបង់បានបិទខ្ទប់ប្រទេសយ៉ាងតឹងតែង ក្នុងទម្រង់ជាបម្រាមគោចរ២៤ម៉ោងលើ២៤ម៉ោង និងបិទហាងទំនិញទាំងអស់ តាំងពីថ្ងៃទី ១៤មករាមក សម្រាប់រយៈពេល១១ថ្ងៃ។ ជាផ្លូវការ ប្រជាពលរដ្ឋគ្មានសិទ្ធិចេញក្រៅផ្ទះ សូម្បីតែដើម្បីទៅទិញម្ហូបអាហារ ឬចេញហាត់ប្រាណក៏មិនបាន។ ផ្សារម្ហូបអាចបើកលក់បានសម្រាប់តែដឹកឱ្យភ្ញៀវ។
ប៉ុន្តែទោះបីមានវិធានការដ៏តឹងរ៉ឹងខ្លាំងដូច្នេះក្តី ក៏ចំនួនអ្នកឆ្លងថ្មី និងចំនួនអ្នកស្លាប់ មិនបានធ្លាក់ចុះសោះ។ មន្ទីរពេទ្យចាល់និងមានអ្នកជំងឺចូលជិតពេញ៩៨%។ បើតាមអង្គការសុខភាពពិភពលោក លីបង់ឈានចូលដល់កំរិតអាសន្នខ្ពស់បំផុតហើយ។ ហេតុដូច្នេះហើយបានជារដ្ឋាភិបាលបានសម្រេចពន្យារពេលបិទខ្ទប់ប្រទេស ពីរសប្តាហ៍ទៀត។
វិបត្តិកូវីដ បានមកជាន់បន្ថែមលីបង់ ដែលរងវិបត្តិសេដ្ឋកិច្ច តាំងពីកញ្ញាឆ្នាំ២០១៩មក។ ជាលើកទីមួយ គិតចាប់តាំងពីជាច្រើនទសវត្សរ៍មក លីបង់បានលុងខ្លួនក្នុងវិបត្តិសេដ្ឋកិច្ចដើរថយក្រោយ យ៉ាងធ្ងន់ធ្ងរបំផុត។ នៅឆ្នាំ២០២០ ផលិតផលសរុបក្នុងស្រុកបានធ្លាក់ចុះ១៩,៥% និងមានវិបត្តិអតិផរណាជាង១៣៣% ហើយប្រជាពលរដ្ឋចំនួន៤៥% រស់ក្រោមបន្ទាត់នៃភាពក្រីក្រទុរគត៌ខ្លាំង។
ក្នុងបរិបទបែបនេះ ធនាគារពិភពលោកបានអនុម័តនៅថ្ងៃទី ១២មករា ២០២១ ជំនួយបន្ទាន់តម្លៃ២៤៦លានដុល្លារ ក្នុងទម្រង់ជាការផ្ទេរថវិកា ទៅជួយប្រជាជនលីបង់ដែលក្រីក្រខ្លាំងបំផុតដោយផ្ទាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ