អ៊ីស្រាអែល-ប៉ាឡេស្ទីន តឹងតែងដាក់គ្នាយ៉ាងខ្លាំងមិនធ្លាប់មាន របួសជាច្រើនរយនាក់
ក្រុងហ្សេរុយសាឡិមខាងកើតកំពុងបន្តស្ថិតក្នុងភាពតានតឹងនិងហិង្សាពេញមួយចុងសប្តាហ៍នេះ។ មានរងរបួសជាច្រើនរយនាក់ ភាគច្រើនជាជនប៉ាឡេស្ទីន នៅក្នុងការប៉ះទង្គិចរវាងប៉ូលិសអ៊ីស្រាអែលនិងបរិស័ទអ៊ីស្លាម ដែលមកជួបជុំគ្នាប្រារព្វពិធីតមអាហារនៅវិហារអ៊ីស្លាម នៅសង្កាត់សក្តិសិទ្ធិនៃក្រុងហ្សេរុយសាឡិម ក្រោមអាណានិគមអ៊ីស្រាអែល។
ចុះផ្សាយនៅថ្ងៃ៖
ស្តាប់ - ០២:០៧
ក្រុងសក្តិសិទ្ធមានវិហារអ៊ីស្លាមជាទីសក្ការៈទីបីរបស់សាសនាអ៊ីស្លាម ជាក្រុងបូជនីកិច្ចដ៏សក្តិសិទ្ធបំផុតរបស់ជនជាតិជ្វីហ្វ (អ៊ីស្រាអែល) ហ្សេរុយសាឡិមកំពុងស្ថិតក្នុងភាពហិង្សាមានការប៉ះទង្គិចគ្នាជារៀងរាល់ថ្ងៃ។ មានអ្នករងរបួសជាង២២០នាក់ កាលពីថ្ងៃសុក្រទី ៧ឧសភា។ មានអ្នករងរបួសជាងមួយនាក់ទៀត នៅថ្ងៃសៅរ៍ទី៨ ឧសភា។ នៅព្រឹកថ្ងៃអាទិត្យទី៩ឧសភា ទីលានវិហារសាសនាបានស្ងប់ស្ងាត់ តែនៅពេលរសៀលនិងពេលល្ងាចក្រោយចប់ម៉ោងតមអាហារ ភាពតានតឹងប្រឈមមុខដាក់គ្នារវាងប៉ូលិសអ៊ីស្រាអែលនិងសាសនិកជនអ៊ីស្លាម បានបន្តកើតឡើងនៅទីក្រុងចាស់ ម្តុំសង្កាត់ដែលគ្រួសារប៉ាឡេស្ទីនរងការបណ្តេញចេញ។
ជាសរុបមានមនុស្សជាច្រើនរយនាក់បានរងរបួស ដោយប៉ូលិសអ៊ីស្រាអែលបានបាញ់ទឹក ឬបាញ់គ្រាប់ជ័រ និងមានការចាប់ខ្លួនបាតុករប៉ាឡេស្ទីនជាច្រើននាក់ផ្សេងទៀតផង។ ហេតុការណ៍ប៉ះទង្គិចនៅវិហារអ៊ីស្លាមក្រុងហ្សេរុយសាឡិមខាងកើតនាថ្ងៃចុងសប្តាហ៍នេះ មានសភាពហិង្សាខ្លាំងមិនធ្លាប់មានទេ ខ្លាំងជាងព្រឹត្តការណ៍កាលពីឆ្នាំ២០១៧ ដែលបណ្តាលមកពីអ៊ីស្រាអែលចង់ដាក់ក្លោងទ្វារអេឡិចត្រូនិកត្រួតពិនិត្យសាសនិកជនឥស្លាមមុនឡើងចូលវិហារទៅទៀត។
ជាងនេះទៅទៀត ចលនាហាម៉ាសដែលគ្រប់គ្រងតំបន់ហ្កាហ្សា បានអំពាវនាវឱ្យបាតុករប៉ាឡេស្ទីនបន្តតាំងទីនៅទីលានវិហារឥស្លាមរហូតដល់ថ្ងៃព្រហស្បតិ៍ ថ្ងៃបិទបញ្ចប់ខែតមអាហារ និងគំរាមវាយប្រហារអ៊ីស្រាអែលប្រសិនបើថ្ងៃចន្ទទី ១០ឧសភានេះ តុលាការកំពូលសម្រេចបណ្តេញគ្រួសារប៉ាឡេស្ទីនចេញពីផ្ទះ ដើម្បីប្រគល់កម្មសិទ្ធិដីទៅឱ្យអ៊ីស្រាអែល។ ពលរដ្ឋនៅតំបន់ហ្កាហ្សាជាងពីរលាននាក់រស់ក្រោមការបិទខ្ទប់របស់អ៊ីស្រាអែល ក៏កំពុងនាំគ្នាធ្វើបាតុកម្មយ៉ាងសកម្មដែរ។
សម្តេចប៉ាបហ្វ្រង់ស័រ សហរដ្ឋអាមេរិក ក្រុមបណ្តាប្រទេសនៅតំបន់ឈូងសមុទ្ទពែក្យ អារ៉ាប៊ីសាអូឌីត ក៏ដូចជាអ៊ីរ៉ង់ តួកគី ប៉ាគីស្ថាន ហ្សកដានី ឬអេហ្ស៊ីប ម៉ារ៉ុក ក៏បានថ្កោលទោស នៅថ្ងៃអាទិត្យនេះ ចំពោះអំពើហិង្សានៅក្រុងហ្សេរុយសាឡិមខាងកើត និងសម្តែងព្រួយបារម្ភចំពោះការបណ្តេញគ្រួសារប៉ាឡេស្ទីន។ នៅអង្គការសហប្រជាជាតិ ប្រទេសទុយនីស៊ី បានស្នើបើកជំនួបប្រជុំក្រុមប្រឹក្សាសន្តិសុខអង្គការសហប្រជាជាតិស្តីពីស្ថានភាពប៉ាឡេស្ទីនក្នុងដែនដីក្រោមអាណានិគម នៅថ្ងៃចន្ទទី ១០ឧសភា។ ប្រឈមនឹងស្ថានភាពនេះ នាយករដ្ឋមន្ត្រីអ៊ីស្រាអែល លោកនេតាន់យ៉ាហ៊ូ បានព្រមានថាអ៊ីស្រាអែលនឹងបន្តរក្សាសេរីភាពសាសនា តែមិនអនុគ្រោះឱ្យមានអំពើហិង្សាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ