ការវាយប្រហារបកវិញ របស់អ៊ីស្រាអែល បានសម្លាប់មនុស្សយ៉ាងតិច ២០នាក់ នៅតំបន់ហ្កាហ្សា
ការប៉ះទង្គិចគ្នា ដ៏ហិង្សារវាងទាហាន អ៊ីស្រាអែល និងប្រជាជនបាឡេស្ទីន នៅទីលានវិហារអ៊ីស្លាម ក្នុងទីក្រុងហ្សេរុយសាឡឹមខាងកើត កាលពីថ្ងៃម្សិលមិញ ដែលបានធ្វើឲ្យប្រជាជនប៉ាឡេស្ទីនរងរបួស ជាង ៥០០នាក់ បានរាលដាលទៅជាការវាយប្រហារគ្នា ផ្លោងគ្រាប់ដាក់គ្នា។ នៅថ្ងៃចន្ទម្សិលមិញ នៅប៉ុន្មានម៉ោងក្រោយ ព្រមានអ៊ីស្រាអែល ឲ្យឈប់ប្រើកម្លាំងហិង្សា បង្រ្កាបលើប្រជាជនប៉ាឡេស្ទីន នៅហ្សេរុយសាឡឹមខាងកើត ក្រុមហាម៉ាស ប៉ាឡេស្ទីន បានបាញ់ផ្លោងគ្រាប់រ៉ុកកែត ចូល ទឹកដីអ៊ីស្រាអែល ប៉ុន្តែ មិនបានសម្លាប់ប្រជាជនអ៊ីស្រាអែលម្នាក់នោះទេ។ អ៊ីស្រាអែលបានវាយបកវិញ ដោយបានបាញ់បំផ្លាញ ទីតាំងរបស់ក្រុមហាម៉ាស និងបានសម្លាប់មនុស្សយ៉ាងតិច២០នាក់។
ចុះផ្សាយនៅថ្ងៃ៖
ស្តាប់ - ០២:២០
នៅយប់ថ្ងៃចន្ទ គ្រាប់រ៉ុកកែតត្រូវបានបាញ់ ស្រុះគ្នា ចេញពីតំបន់ហ្កាហ្សា គ្រប់គ្រងដោយក្រុមហាម៉ាសប៉ាឡេស្ទីន នៅបន្ទាប់ពីក្រុមនេះបានព្រមានការផ្ទុះសង្រ្គាម បើសិន ទាហានអ៊ីស្រាអែល មិនព្រមឈប់បង្រ្កាបហិង្សា ទៅលើប្រជាជនប៉ាឡេស្ទីន នៅទីលាន វិហារអ៊ីស្លាមនៅហ្សេរុយសាឡឹមខាងកើត។
ការប៉ះទង្គិចគ្នាដ៏ហិង្សារវាងកងកម្លាំងអ៊ីស្រាអែល និងសាសនិកអ៊ីស្លាម ដែលភាគច្រើនជាប្រជាជនប៉ាឡេស្ទីន នៅហ្សេរុយសាឡឹមខាងកើត កាលពីថ្ងៃចន្ទ ម្សិលមិញ បានបណ្តាលឲ្យមានមនុស្សរងរបួស ៥២០នាក់ ក្នុងចំណោមប្រជាជនប៉ាឡេស្ទីន និង៣០នាក់ ជាប៉ូលិសអ៊ីស្រាអែល។
ឆ្លើយតបនឹងគ្រាប់រ៉ុកកែតរបស់ក្រុមហាម៉ាស អ៊ីស្រាអែលបានវាយបកវិញភ្លាម ដោយបានបើកប្រតិបត្តិការវាយប្រហារតាមផ្លូវអាកាសទៅលើទឹកដីហ្កាហ្សា។ នៅក្រោយការវាយប្រហាររបស់អ៊ីស្រាអែល ក្រុមហាម៉ាសប៉ាឡេស្ទីនបានរាប់ឃើញមានមនុស្សស្លាប់យ៉ាងតិច ២០នាក់ ដែលនៅក្នុងមាន៩នាក់ ជាកុមារ និង១នាក់ជាមេបញ្ជាការរបស់ក្រុមហាម៉ាស។ ក្រៅពីនោះ មានផងដែរ មនុស្សរងរបួស ជាង ១៦០នាក់ និងការខូចខាតផ្ទះសម្បែងដ៏ធ្ងន់ធ្ងរដោយសារការវាយប្រហាររបស់អ៊ីស្រាអែល។
តាមអ្នកនាំពាក្យរបស់កងទ័ពអ៊ីស្រាអែល ប្រតិបត្តិការវាយបក នៅយប់ថ្ងៃចន្ទ សំដៅ ទៅលើទីតាំង ចំនួន ១៣០ ដែលជាកម្មសិទ្ធិរបស់ក្រុមហាម៉ាស នៅតំបន់ហ្កាហ្សា។ ភាគីអ៊ីស្រាអែលមិនបាននិយាយពីគ្រោះថ្នាក់បាត់បង់ជីវិតរបស់ប្រជាជនស៊ីវិលប៉ាឡេស្ទីននោះទេ ប៉ុន្តែ បានអះអាងថា ក្នុងចំណោមអ្នកដែលស្លាប់ នៅថ្ងៃ ចន្ទ មាន ១៥នាក់ ជាទាហាន កុម្ម៉ង់ដូររបស់ហាម៉ាស និងក្រុមជីហាតអ៊ីស្លាម។
តាម កងទ័ពអ៊ីស្រាអែល រ៉ុកកែត ប្រមាណ ២០០ បានបាញ់ចេញពីតំបន់ហ្កាហ្សា សំដៅ ទឹកដីអ៊ីស្រាអែល ប៉ុន្តែ ៩០% ត្រូវបានបាញ់ទម្លាក់ ដោយប្រព័ន្ធខែលមីស៊ីលរបស់អ៊ីស្រាអែល ចំណែក នៅរ៉ុកកែតជាច្រើនទៀត បានធ្លាក់នៅក្នុងទឹកដីហ្កាហ្សាផ្ទាល់ និងនៅភូមិអ៊ីស្រាអែល ក្បែរព្រំប្រទល់តំបន់ហ្កាហ្សារបស់ប៉ាឡេស្ទីន។ អាជ្ញាធរ អ៊ីស្រាអែល បានរាប់ឃើញផងដែរ មានមនុស្សរងគ្រោះជាង៣០ នាក់ ដោយសារគ្រាប់រ៉ុកកែតរបស់ពួកហាម៉ាស។
នៅពេលគ្រាប់រ៉ុកកែត នៅបន្តបាញ់ចេញពីហ្កាហ្សា សំដៅ ទឹកដីអ៊ីស្រាអែល នៅព្រឹកថ្ងៃអង្គារនេះ មេដឹកនាំក្រុមហាម៉ាស លោក Ismaïl Haniyeh បានព្រមានសាជាថ្មី នឹងប្រែក្លាយភូមិអ៊ីស្រាអែលមួយ ក្បែរតំបន់ហ្កាហ្សា ឲ្យទៅជាឋាននរក បើសិន ការវាយប្រហាររបស់អ៊ីស្រាអែល ទៅលើតំបន់ហ្កាហ្សា សម្លាប់ប្រជាជនស៊ីវិលប៉ាឡេស្ទីន។
ភាពតានតឹង និងពុះកញ្ច្រោលខ្លាំងនៅហ្សេរុយសាឡឹម រួមទាំងការវាយប្រហារដាក់គ្នារវាងក្រុមហាម៉ាសប៉ាឡេស្ទីន និង កងទ័ពអ៊ីស្រាអែលបានទាក់ទាញឲ្យមានប្រតិកម្ម ពីសហគមន៍អន្តរជាតិ។ តាមប្រភពមន្រ្តីទូត ដែលសាកសួរដោយទីភ្នាក់ងារព័ត៌មានបារាំង AFP ក្រោមការសម្របសម្រួលរបស់កាតា និងអេហ្ស៊ីប អង្គការសហប្រជាជាតិកំពុងបញ្ចុះបញ្ចូល ភាគី ជម្លោះ ឲ្យឈប់ជាបន្ទាន់ ជម្លោះប្រដាប់អាវុធលើកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ