លិចទូក ស្លាប់ជនភៀសខ្លួនជិត៩០នាក់ នៅក្បែរឆ្នេរស៊ីរី
យ៉ាងហោចណាស់ មានជនភៀសខ្លួនចំនួន ៨៩នាក់ បានស្លាប់ក្នុងគ្រោះថ្នាក់លិចទូក នៅជិតឆ្នេរសមុទ្រប្រទេសស៊ីរី កាលពីថ្ងៃព្រហស្បតិ៍កន្លងទៅ។ ទូកដឹកជនភៀសខ្លួននេះ បានចាកចេញពីកំពង់ផែមួយមួយ នៅខាងជើងប្រទេសលីបង់ សំដៅឆ្ពោះទៅកាន់ប្រទេសអ៊ីតាលី។ គួរបញ្ជាក់ថា លីបង់ដែលកំពុងស្ថិតនៅក្នុងវិបត្តិសេដ្ឋកិច្ច ដ៏ធ្ងន់ធ្ងរបំផុតនោះ បានក្លាយជាទីតាំងមួយដ៏សំខាន់ ដែលជនភៀសខ្លួន បានចាប់ផ្តើមធ្វើដំណើរចាកចេញ ផ្សងគ្រោះថ្នាក់ ដើម្បីទៅសុំសិទ្ធិជ្រកកោននៅអឺរ៉ុប។ ការធ្វើដំណើរតាមទូកឆ្លងសមុទ្រ ដែលប្រឈមគ្រោះថ្នាក់ក្រៃលែង។
ចុះផ្សាយនៅថ្ងៃ៖
ស្តាប់ - ០៣:០៣
យោងតាមអាជ្ញាធរស៊ីរី គេបានស្រង់បានសាកសពចំនួន៨៩នាក់ និងជនរងគ្រោះ១៤នាក់ទៀត កំពុងទទួលបានការសង្គ្រោះបន្ទាន់នៅមន្ទីរពេទ្យ ក្នុងក្រុងកំពង់ផែ Tartous។ ក្នុងចំណោមសាកសពជនភៀសខ្លួន ដែលគេស្រង់បានពីទឹក មានភាគច្រើនជាជនជាតិលីបង់ ជន់ជាតិស៊ីរីខ្លះ និងជនប៉ាឡេស្ទីនខ្លះ។ អាជ្ញាធរស៊ីរីអះអាងថា ការរុករកកំពុងបន្ត ព្រោះនៅលើទូកពេលចេញដំណើរ មានមនុស្សជិះចំនួនយ៉ាងហោច១៥០នាក់។
ដោយឡែក អាជ្ញាធរលីបង់បានបញ្ជាក់ថា គេបានចាប់ឃាត់ខ្លួនជនម្នាក់ ដែលជននោះបានទទួលស្គាល់ថា ខ្លួនគឺជាឈ្មួញរៀបចំការដឹកជញ្ជូនជនភៀសខ្លួនតាមទូក ចេញពីលីបង់ឆ្ពោះទៅកាន់ប្រទេសអ៊ីតាលី មុននឹងទូកនោះបានលិចនៅក្បែរឆ្នេរប្រទេសស៊ីរី។ ប្រភពពីអង្គការយូនីសែហ្វ បានឲ្យដឹងផងដែរថា ក្នុងចំណោមជនរងគ្រោះដែលស្លាប់ ដោយការលិចទូកកាលពីថ្ងៃព្រហស្បតិ៍ គឺមានកុមារចំនួន១០នាក់។ សាកសពជនរងគ្រោះ ត្រូវបានអាជ្ញាធរស៊ីរី ប្រគល់មកឲ្យក្រុមគ្រួសាររៀបចំធ្វើបុណ្យ នៅឯច្រកព្រំដែន Arida ភាគខាងជើងលីបង់។
គួរបញ្ជាក់ថា មានទូកដឹកជនភៀសខ្លួនចេញពីលីបង់ ឆ្ពៅកាន់អឺរ៉ុបកាន់តែច្រើន។ ដោយសារតែវិបត្តិសេដ្ឋកិច្ច ជីវភាពប្រជាជនលីបង់ ជាពិសេសនៅតំបន់ជនបទភាគខាងជើង កាន់តែលំបាកក្រីក្រខ្លាំង ដែលបង្ខំឲ្យពួកគេផ្សងជីវិតធ្វើចំណាកស្រុក។ ទន្ទឹមគ្នានេះ លីបង់មានជនភៀសខ្លួនមកពីស៊ីរី និងមកពីប៉ាឡេស្ទីនជាច្រើន ដែលមិនអាចតស៊ូទ្រាំរស់ ក្នុងលក្ខខណ្ឌលំបាកនៅលីបង់តទៅទៀត។ យោងតាមលោកស្រី Adele Khodr តំណាងអង្គការយូនីសែហ្វ ប្រចាំតំបន់ដើមបូព៌ា គឺប្រជាជនលីបង់មួយចំនួនធំ កំពុងតែរស់នៅក្នុងលក្ខខណ្ឌជីវភាពយ៉ាងក្រីក្រតោកយ៉ាកបំផុត ដោយរាប់ទាំងជនភៀសខ្លួនបរទេសផងដែរ។
កាលពីខែមេសា ទូកដឹកជនភៀសខ្លួនច្រើនលើសចំណុះមួយ ត្រូវបានឆ្មាំសមុទ្រលីបង់បើកទូកដេញ ហើយបានលិច បណ្តាលឲ្យស្លាប់មនុស្សជាច្រើនសិបនាក់។ កាលពីថ្ងៃទី១៣កញ្ញា ឆ្មាំសមុទ្រតួកគី បានប្រកាសថាទូកដឹកជនភៀសខ្លួនចេញពីក្រុងទីប៉ូលីប្រទេសលីបង់ បានលិចបណ្តាលឲ្យស្លាប់ជនភៀសខ្លួន៦នាក់ ក្នុងនោះទារក២នាក់ ហើយគេសង្គ្រោះបាន៧៣នាក់។ យោងតាមអង្គការសហប្រជាជាតិ នៅរវាងខែមករា ដល់ខែវិច្ឆិកា ឆ្នាំ២០២១ មានទូកចំនួនយ៉ាងហោច៣៨ ដឹកជនភៀសខ្លួនចំនួនជាង១៥០០នាក់ បានព្យាយាមធ្វើដំណើរចាកចេញពីលីបង់ដោយខុសច្បាប់៕
ក្រោយដំណឹងលិចទូកចុងក្រោយ ស្លាប់ជនភៀសខ្លួនជិត៩០នាក់នេះ លោក Filipo Grandi ឧត្តមស្នងការទទួលបន្ទុកជនភៀសខ្លួន បានអំពាវនាវ ឲ្យសហគមន៍អន្តរជាតិត្រូវតែរួមគ្នា ជួយកែលម្អលក្ខខណ្ឌជីវភាព របស់ជនរងគ្រោះ ដែលត្រូវបង្ខំចិត្តភៀសខ្លួន ចាកចោលផ្ទះសម្បែងស្រុកកំណើត។ ដូចគ្នាដែរ លោក Philippe Lazzarini អគ្គស្នងការទទួលបន្ទុកជនភៀសខ្លួនប៉ាឡេស្ទីន បានអំពាវនាវ ថាត្រូវតែជួយប្រជាជនលីបង់ ក៏ដូចជាប្រជាជនក្នុងតំបន់នេះ ឲ្យមានសេចក្តីសង្ឃឹមក្នុងជីវិតឡើងវិញ ព្រោះការធ្វើដំណើរជិះទូកផ្សងជីវិត វាគឺជាការសម្រេចចិត្តដ៏សែនលំបាក និងដ៏អស់សង្ឃឹមបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ