អ៊ីរ៉ង់៖ប៉ូលិសព្រមានពីការប្រើកម្លាំងពេញទំហឹងដើម្បីបង្រ្កាបបាតុករ
នៅក្នុងប្រទេសអ៊ីរ៉ង់ ប៉ូលិសបានព្រមានក្នុងថ្ងៃពុធ ទី២៨ កញ្ញាពីការប្រើកម្លាំងពេញទំហឹងដើម្បីបង្រ្កាបបាតុករដែលកំពុងបន្តធ្វើបាតុកម្មតាំងពី ១១ថ្ងៃកន្លងមក។ ក្បួនបាតុកម្មបានចាប់ផ្តើមក្នុងថ្ងៃទី១៦ កញ្ញា និងបានឆ្លងរាលដាលនៅសឹងទូទាំងប្រទេស ក្រោយពីការស្លាប់នារីវ័យក្មេងម្នាក់ឈ្មោះម៉ាសា អាមីនី។ គួររម្លឹកថាមានអាយុ ២២ឆ្នាំ នារីម៉ាសា អាមីនីត្រូវបានប៉ូលិសសីលធម៌ចាប់ខ្លួនក្នុងថ្ងៃទី ១៣ កញ្ញាក្រោមបទចោទប្រកាន់ពីការស្លៀកពាក់មិនសមរម្យតាមច្បាប់សាសនាអ៊ីស្លាម។ តែនារីរូបនេះបានស្លាប់នៅ ៣ថ្ងៃក្រោយមកនៅក្នុងមន្ទីរពេទ្យ។ ទន្ទឹមនឹងបដិសេធមិនទទួលខុសត្រូវលើការស្លាប់នារីម៉ាសា អាមីនី រដ្ឋអំណាចអ៊ីរ៉ង់បានចាត់ទុកបាតុកម្មពេលនេះរៀបចំដោយក្រុមអ្នកទាមទារផ្តាច់ទឹកដីនិយម និងមានបរទេសនៅពីក្រោយ។ តាមតួលេខរដ្ឋាភិបាល មានមនុស្សស្លាប់ចំនួន ៦០នាក់នៅក្នុងក្បួនបាតុកម្ម។ តែអង្គការ Iran Human Rights បានបញ្ជាក់ពីមានស្លាប់យ៉ាងតិច ៧៦នាក់។ យ៉ាងណាក៏ដោយ គេពិបាកទទួលបានព័ត៌មានច្បាស់លាស់ ព្រោះប្រព័ន្ធអ៊ីធ័រនែត និងបណ្តាញសង្គមត្រូវបានរដ្ឋអំណាចផ្តាច់តាំងពីច្រើនថ្ងៃមកហើយ។ លោកអាមៀរ រ៉ាស្ហ៊ីឌី នាយកទទួលសន្តិសុខអ៊ីនធ័រនែតរបស់គ្រុប Miaan បានយល់ឃើញថា នេះជាព្រឹត្តិការណ៍មួយដែលមិនធ្លាប់មាននៅអ៊ីរ៉ង់ទេ។
ចុះផ្សាយនៅថ្ងៃ៖
ស្តាប់ - ០១:១៧
« អ្វីដែលអ៊ីរ៉ង់តែងបានធ្វើជាលក្ខណៈទូទៅ គឺកាត់ផ្តាច់ទិន្នន័យចល័តនៅនឹងកន្លែងដែលកំពុងមានបាតុកម្ម និងនៅទីកន្លែងមួយជាក់លាក់។ ប្រសិនបើចលនាបាតុកម្មរីកកាន់តែធំ ការកាត់ផ្តាច់ទិន្នន័យចល័តក៏មានកាន់តែខ្លាំងទៅតាមនឹងដែរ។ ហើយបើរដ្ឋអំណាចមិនអាចគ្រប់គ្រងលើចលនាប្រឆាំងបាន នៅពេលនោះ ទិន្នន័យចល័តនឹងត្រូវរដ្ឋអំណាចកាត់ផ្តាច់ទាំងស្រុងតែម្តង។
រដ្ឋអំណាចមិនដែលបានចាត់វិធានការខ្លាំងក្លារហូតដល់ការផ្តាច់នូវគ្រប់មធ្យោបាយទាក់ទងទេ។ ដូច្នេះ វិធានការដែលរដ្ឋអំណាចកំពុងអនុវត្តពេលនេះពិតមានលក្ខណៈខ្លាំងក្លា។ អ៊ីមែលត្រូវបានបិទខ្ទប់ គេហទំព័រស្វែងរកក៏ត្រូវបានបិទខ្ទប់ ហើយសូម្បីតែល្បែងអនឡាញក៏រដ្ឋអំណាចបានបិទខ្ទប់ដែរ។ នេះពិតជារឿងថ្មីស្រឡាងដែលមិនធ្លាប់មាននាពេលកន្លងមកទេ។ តាមពិតទៅ អ្នកដែលបានចូលទៅក្នុងល្បែងអនឡាញមិនមែនដើម្បីលេងទេ តែដើម្បីផ្ញើសារទៅវិញ ទៅមករវាងអ្នកលេងដូចគ្នា។
ការបិទគ្រប់កាណាល់ទូរគមនាគមន៍ជាកម្មវត្ថុចម្បងរបស់រដ្ឋអំណាចអ៊ីរ៉ង់ ហើយយើងមិនដែលបានឃើញចំណាត់ការខ្លាំងក្លារបៀបនេះទេរហូតមកដល់ពេលនេះ »
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ