អ៊ីរ៉ង់ មួយខែនៃបាតុកម្មនិងការបង្ក្រាបមរណៈ
ថ្ងៃទី ១៣កញ្ញា២០២២ ប៉ូលិសសីលធម៌អ៊ីរ៉ង់ បានឃាត់ខ្លួននាង Mahsa Amini និស្សិត វ័យ២២ឆ្នាំ ពីបទរុំស្បៃមិនត្រឹមត្រូវ។ បីថ្ងៃក្រោយ នាងបានស្លាប់។ សេចក្តីប្រកាសមរណភាព បានក្លាយជាកម្លាំងចលករជំរុញឱ្យប្រជាពលរដ្ឋអ៊ីរ៉ង់នាំគ្នាងើបធ្វើបាតុកម្មប្រឆាំងនឹងរបបដឹកនាំអ៊ីស្លាម នៅទូទាំងប្រទេស។ តាំងពីពេលនោះមក ចលនាបាតុកម្ម ដែលរងការបង្ក្រាបយ៉ាងហិង្សានិងមរណៈ មិនបានថមថយទេ។
ចុះផ្សាយនៅថ្ងៃ៖
ស្តាប់ - ០១:៥៦
“ស្ត្រី ជីវិត សេរីភាព” បានក្លាយជាបុព្វហេតុបាតុកម្មតែមួយចងភ្ជាប់ប្រជាពលរដ្ឋអ៊ីរ៉ង់តាំងពីមួយខែមក ដើម្បីបរិហារថា ការបង្ក្រាបស្ត្រី គឺជាការបង្ក្រាបជីវិតមនុស្សគ្រប់រូប។ ផ្តើមដំបូងដោយក្រុមស្ត្រី បន្តដោយពលរដ្ឋទូទៅ ចលនាបាតុកម្មបានផុសផុលតាំងពីថ្ងៃទី ១៦កញ្ញា ថ្ងៃប្រកាសមរណភាពនិស្សិតស្រីវ័យ២២ឆ្នាំ ចាប់ខ្លួនពីបទពាក់ស្បៃអ៊ីស្លាមមិនត្រឹមត្រូវ។
បើតាមតុល្យការចុងក្រោយរបស់អង្គការក្រៅរដ្ឋាភិបាល Iran Human Right (IHR)គិតត្រឹមថ្ងៃ១២តុលា២០២២ មានពលរដ្ឋអ៊ីរ៉ង់ ១០៨នាក់ ក្នុងនោះយ៉ាងហោច២៨នាក់ជាកុមារ បានស្លាប់ ដោយការបង្ក្រាបបាតុកម្មយ៉ាងហិង្សា រយៈពេលមួយខែមកនេះ។ អាជ្ញាធរអ៊ីរ៉ង់បានប្រកាសចាប់ខ្លួនបាតុករបានជិត១២០០នាក់ នៅថ្ងៃទី២៥កញ្ញា ក្នុងនោះ ១២៥នាក់ត្រូវបានតុលាការធ្វើការចោទប្រកាន់ជាផ្លូវការ។
ប៉ុន្តែទោះមានការបង្ក្រាបយ៉ាងខ្លាំងក្លាយ៉ាងណាក៏ដោយ ក៏កំហឹងយុវវ័យមិនរលត់ដែរ។ ការប្រមូលផ្តុំនៅតាមសកលវិទ្យាល័យ និងបាតុកម្មតាមថ្នល់ នៅតែបន្តរៀបចំឡើង ក្នុងក្រុងជាច្រើន ទូទាំងប្រទេស។ កម្មករនៅរោងចក្រថាមពលផ្សេងៗក៏បានចូលរួមធ្វើកូដកម្មដែរ។ នៅថ្ងៃពុធទី១២តុលាម្សិលមិញ ពលរដ្ឋអ៊ីរ៉ង់ ស្រីប្រុស បាននាំគ្នាចុះថ្នល់ក្នុងក្រុងតេហេរ៉ង់។ សិស្សនិស្សិតភេទស្រី បានផ្គើនអាជ្ញាធរ ដោយគ្មានពាក់ស្បៃរុំក្បាលតាមបែបអ៊ីស្លាមទេ និងដោយនាំគ្នាស្រែកផ្តាសារមេដឹកនាំផ្តាច់ការ។ រាល់គ្រប់សម្រែករិះគន់របស់បាតុករត្រូវបានតបតវិញដោយសំឡេងកាំភ្លើងរបស់ប៉ូលិស។ នេះបើតាមរូបភាពវីដេអូ ផ្សព្វផ្សាយក្នុងបណ្តាញរបស់ក្រុមអង្គការសិទ្ធិមនុស្ស IHR។ នៅរដ្ឋធានីដដែល បើតាមAFP កងសន្តិសុខអ៊ីរ៉ង់ បានបាញ់ឧស្ម័នបង្ហូរទឹកភ្នែកបំបែកហ្វូងបាតុករដែលជាក្រុមមេធាវី។ មានយ៉ាងហោចមេធាវីបីនាក់ត្រូវចាប់ខ្លួន។
បើតាមសេចក្តីជូនដំណឹង ការប្រមូលផ្តុំចលនាបាតុកម្មប្រឆាំងតវ៉ា ទ្រង់ទ្រាយធំថ្មី នឹងប្រព្រឹត្តទៅនៅថ្ងៃចន្ទទី ១៧តុលា ទៀត។ នេះសបញ្ជាក់ឱ្យឃើញថា ចលនាបះបោរ ដែលពេលខ្លះត្រូវចំណាយដល់ជីវិត មិនងាយស្ងប់ស្ងាត់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ