វិបត្តិនយោបាយលីបង់៖ លោកមីស្ហ៊ែល អាអ៊ូន ចប់អាណត្តិប្រធានាធិបតី ដោយគ្មានមនុស្សថ្មីមកជំនួស
លោកមីស្ហ៊ែល អាអ៊ូន ប្រធានាធិបតីលីបង់ ត្រូវចប់អាណត្តិនៅថ្ងៃចន្ទទី៣១តុលានេះហើយ។ ក៏ប៉ុន្តែ គិតមកទល់ពេលនេះ គឺសភាលីបង់ នៅមិនទាន់ស្រុះស្រួលគ្នា បោះឆ្នោតរើសមនុស្សថ្មីណាម្នាក់ មកកាន់មុខតំណែងប្រមុខរដ្ឋនេះបាននៅឡើយទេ។ បញ្ហានេះ កំពុងតែធ្វើឲ្យមានការបារម្ភកាន់តែខ្លាំង អំពីវិបត្តិនយោបាយលីបង់ ដែលកាន់តែផុងជ្រៅ ខណៈសេដ្ឋកិច្ចលីបង់កំពុងតែដួលរលំសឹងទាំងស្រុង។
ចុះផ្សាយនៅថ្ងៃ៖
ស្តាប់ - ០២:៣៥
សកម្មជនលីបង់ អ្នកគាំទ្រលោកមីស្ហ៊ែល អាអ៊ូន ដែលពួកគេហៅដោយក្តីគោរពថា “លោកសេនាប្រមុខ” នោះ បាននាំគ្នាមកដេករងចាំនៅខាងមុខវិមានប្រធានាធិបតី ក្នុងទីក្រុងបេរូត ដើម្បីត្រៀមដង្ហែរក្បួន ជូនដំណើរលោក មីស្ហ៊ែល អាអ៊ូន ចាកចេញនៅថ្ងៃចន្ទទី៣១តុលា។
គួរបញ្ជាក់ថា អាណត្តិ៦ឆ្នាំរបស់លោក មីស្ហ៊ែល អាអ៊ូន ក្នុងនាមជាប្រធានាធិបតីលីបង់ ត្រូវចប់ហើយ។ ក៏ប៉ុន្តែ គ្មានដំណឹងណាមួយ អំពីមនុស្សថ្មី ដែលនឹងមកមកជំនួសលោកនោះទេ។ សភាលីបង់ បានបើកការប្រជុំបោះឆ្នោត៤ដងរួចមកហើយ ក្នុងរវាង១ខែមកនេះ តែនៅតែមិនអាចស្រុះស្រួលគ្នា។ ក្រុមហេសបូឡា ដែលជាក្រុមនយោបាយនិងប្រដាប់អាវុធដ៏មានឥទ្ធិពលនៅលីបង់ ព្រមទាំងក្រុមគណក្ស “ចរន្តស្នេហាជាតិសេរីលីបង់” សុទ្ធតែគ្មានសំឡេងភាគច្រើនគ្រប់គ្រាន់ ដើម្បីអាចស្នើសម្រេចយកបេក្ខជនណាម្នាក់ មកធ្វើជាប្រធានាធិបតីថ្មី។
ប្រការនេះ កំពុងតែធ្វើឲ្យមានការបារម្ភ អំពីការធ្លាក់ផុងជ្រៅទៅនៃវិបត្តិនយោបាយ ព្រមទាំងវិបត្តិសេដ្ឋកិច្ច ខណៈអ្នកនយោបាយលីបង់ គ្មានសមត្ថភាពក្នុងការស្រុះស្រួលគ្នា។ ដោយសារតែការបែកបាក់នយោបាយ លីបង់នៅមិនទាន់មានរដ្ឋាភិបាលផ្លូវការទេ ក្រោយការការបោះឆ្នោត កាលពីខែឧសភា។ បច្ចុប្បន្ននេះ លីបង់ត្រូវដឹកនាំដោយរដ្ឋាភិបាលបណ្តោះអាសន្ន ដែលមានតួនាទី អាចចាត់ចែងតែកិច្ចការបន្ទាន់ចាំបាច់ប្រចាំថ្ងៃតែបណ្ណោះ។
គួររំលឹកផងដែរថា លោក មីស្ហ៊ែល អាអ៊ូន បច្ចុប្បន្នអាយុ៨៧ឆ្នាំ គឺជាអតីតមេបញ្ជាការកងទ័ពលីបង់ និងជាអតីតមេដឹកនាំរដ្ឋាភិបាលយោធា មុននឹងត្រូវបានស៊ីរីបើកប្រតិបត្តិការយោធាទំលាក់ពីអំណាច នៅខែតុលាឆ្នាំ១៩៩០។ អាណត្តិ៦ឆ្នាំ របស់លោកមីស្ហ៊ែល អាអ៊ូន កន្លងមកនេះ លីបង់បានធ្លាក់ផុងជ្រៅក្នុងវិបត្តិ នយោបាយព្រមទាំង សេដ្ឋកិច្ច។ អំពីពុករលួយ បក្សពួកនិយម ដែលស៊ីចាក់រូងយ៉ាងជ្រៅ បានស្តែងឡើងឲ្យឃើញតាមរយៈ ករណីផ្ទុះឃ្លាំង ដ៏ធំហិមានៅកំពង់ផែលីបង់ បណ្តាលឲ្យស្លាប់មនុស្សជាង២០០នាក់។
ជានិច្ចជាកាល ការបោះឆ្នោតជ្រើសរើសប្រធានាធិបតីលីបង់ តែងតែមានដិតដាមដោយអំពើហិង្សាចលនាចល ព្រោះប្រព័ន្ធដឹកនាំរបស់ប្រទេសនេះ ដំណើរការដោយការបែងចែងអំណាច រវាងក្រុមបក្សពួកសហគមន៍សាសនាខុសៗគ្នា។ តំណែងប្រធានាធិបតី ជាទំលាប់ គឺត្រូវធ្លាក់ទៅក្នុងដៃរបស់ក្រុមអ្នកកាន់សាសនាគ្រិស្តនិកាយម៉ារូនីតហើយបច្ចុប្បន្ន នៅក្នុងក្រុមនេះ គឺមាន២បក្សប្រជែងគ្នា គឺក្រុម “ចរន្តជាតិនិយមសេរីលីបង់ CPL” និងក្រុមបក្ស “កម្លាំងលីបង់”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ