NGO៖ការប្រកាសរំលាយប៉ូលិសសីលធម៌នៅអ៊ីរ៉ង់មិនគ្រប់គ្រាន់ដើម្បីរំងាប់បាតុកម្មទេ
នៅក្នុងប្រទេសអ៊ីរ៉ង់ មានការអំពាវនាវឲ្យធ្វើកូដកម្មទូទៅនៅទូទាំងប្រទេសរយៈពេល ៣ថ្ងៃដោយចាប់ផ្តើមក្នុងថ្ងៃចន្ទ ទី៥ ធ្នូនេះ។ ក្រុមបាតុករដែលទាមទារឲ្យបិទបញ្ចប់របបដឹកនាំសព្វថ្ងៃហាក់មិនបានត្រៀមខ្លួនដើម្បីបញ្ឈប់បាតុកម្ម និងកូដកម្មនៅឡើយទេ។ គួររម្លឹកថា ព្រឹត្តិការណ៍បះបោរប្រឆាំងរដ្ឋាភិបាលបានចាប់ផ្តើមតាំងពីថ្ងៃទី១៦ កញ្ញា ពោលក្រោយមរណភាពរបស់នារីម៉ាសា អាមីនីដែលត្រូវបានប៉ូលិសសីលធម៌ចាប់ខ្លួនក្នុងថ្ងៃទី ១៣ កញ្ញាពីបទស្លៀកពាក់មិនត្រឹមត្រូវតាមច្បាប់សាសនាអ៊ីស្លាម។ គិតមកដល់ពេលនេះ បាតុកម្មបានបណ្តាលឲ្យមានមនុស្សស្លាប់ជាង ៤០០នាក់។ ដើម្បីរំងាប់ភាពបះបោរពេលនេះ រដ្ឋអាជ្ញាបានប្រកាសក្នុងថ្ងៃអាទិត្យ ទី៤ ធ្នូពីការរំលាយស្ថាប័នប៉ូលិសសីលធម៌។ ព័ត៌មាននេះនៅមិនទាន់បានបញ្ជាក់ពីក្រសួងមហាផ្ទៃនៅឡើយទេ។ តែលោកម៉ាម៉ូដ អាមីរី ម៉ូហាដាម ប្រធានអង្គការក្រៅរដ្ឋាភិបាលឈ្មោះ Iran Human Rights បានយល់ឃើញថា ការប្រកាសរំលាយស្ថាប័នប៉ូលិសសីលធម៌នៅមិនគ្រប់គ្រាន់ដើម្បីរំងាប់បាតុកម្មនៅឡើយទេ។
ចុះផ្សាយនៅថ្ងៃ៖
ស្តាប់ - ០១:២៨
« អ្វីដែលរដ្ឋអាជ្ញាបានប្រកាសគឺថា ស្ថាប័នប៉ូលិសសីលធម៌នឹងឈប់ដំណើរការ។ តែរដ្ឋអាជ្ញាមិនបានប្រកាសទេថា គេនឹងឈប់ធ្វើទុក្ខបុកម្នេញលើស្រ្តីភេទ គេនឹងផ្តល់សិទ្ធិឲ្យស្រ្តីភេទ។ សម្រាប់ប្រជាជននៅអ៊ីរ៉ង់ ការប្រកាសរបស់រដ្ឋអាជ្ញាមិនសូវមានសារៈសំខាន់ និងមានប្រយោជន៍ប៉ុន្មានទេ។ អ្វីដែលប្រជាជនអ៊ីរ៉ង់ចង់បាន គឺទទួលបានបានសិទ្ធិជាមូលដ្ឋាន។
អ្វីដែលប្រជាជនអ៊ីរ៉ង់ចង់បាន គឺលែងចង់បានសាធារណរដ្ឋអ៊ីស្លាមទៀតឡើយ។ ការដែលរដ្ឋអំណាចបានប្រកាសពីការរំលាយស្ថាប័នប៉ូលិសសីលធម៌ពេលនេះ គឺគ្រាន់តែដើម្បីរំងាប់ភាពតានតឹង រំងាប់ភាពបះបោររបស់ពលរដ្ឋ ធ្វើឲ្យពលរដ្ឋបោះបង់ចោលការធ្វើបាតុកម្ម និងដើម្បីហៅពួកគេឲ្យត្រឡប់ទៅផ្ទះវិញប៉ុណ្ណោះ។ តែអ្វីដែលច្បាស់ ក្បួនបាតុកម្មដែលបានអូសបន្លាយតាំងពីជាង ២ខែកន្លះនឹងបន្តមានទៅមុខទៀត។
ចំណែករដ្ឋអំណាចបានទទួលស្គាល់ថា ខ្លួនមិនអាចគ្រប់គ្រងស្ថានការណ៍បានទេ។ ប្រជាជនអ៊ីរ៉ង់ធ្វើបាតុកម្ម ទោះបីជាមានមនុស្សស្លាប់ចំនួន ៤៤៨នាក់ ក្នុងនោះមានក្មេង ៦០នាក់ក៏ដោយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ