អារ៉ាប៊ីសាអូឌីត៖ទណ្ឌកម្មអឺរ៉ុបលើប្រេងរុស្ស៊ី និងការកំណត់តម្លៃប្រេងរុស្ស៊ីរបស់ G៧ មិនទាន់មានលទ្ធផលជាក់ស្តែង
នៅក្នុងប្រទេសអារ៉ាប៊ីសាអូឌីត រដ្ឋមន្រ្តីក្រសួងថាមពលលោកអាប់ឌែលឡាហ្ស៊ី បេន សាលម៉ានបានថ្លែងក្នុងថ្ងៃអាទិត្យ ទី១១ ធ្នូថា ទណ្ឌកម្មរបស់អឺរ៉ុបប្រឆាំងប្រេងរុស្ស៊ី និងវិធានការកំណត់តម្លៃប្រេងរុស្ស៊ីរបស់ក្រុមប្រទេស G៧ មិនទាន់ហុចលទ្ធផលជាក់ស្តែងនៅឡើយទេ។ លើសពីនេះ និងបើតាមរដ្ឋមន្រ្តីអារ៉ាប៊ីសាអូឌីតរូបនេះដដែល ការអនុវត្តន៍លើវិធានការទាំងនេះក៏ស្ថិតក្នុងភាពស្រពិចស្រពិលនៅឡើយដែរ។
ចុះផ្សាយនៅថ្ងៃ៖
ស្តាប់ - ០១:៥៨
ថ្លែងនៅក្នុងវេទិកាមួយរៀបចំក្នុងទីក្រុងរីយ៉ាដ រដ្ឋមន្រ្តីថាមពលអារ៉ាប៊ីសាអូឌីតលោកអាប់ឌែលឡាហ្ស៊ី បេន សាលម៉ានបានថ្លែងច្បាស់ៗថា ទណ្ឌកម្មអឺរ៉ុប និងវិធានការរបស់ក្រុមប្រទេស G៧ លើប្រេងរុស្ស៊ីនៅមិនទាន់ហុចលទ្ធផលជាដុំកំភួននៅឡើយទេ។ លទ្ធផលដែលលោកអាប់ឌែលឡាហ្ស៊ី បេន សាលម៉ានចង់និយាយ គឺការជះឥទ្ធិពលនៅលើទីផ្សារប្រេងក្នុងលោក។ តែរដ្ឋមន្រ្តីថាមពលអារ៉ាប៊ីសាអូឌីតមិនភ្លេចបញ្ជាក់ថា ប្រតិកម្ម និងវិធានការដែលរុស្ស៊ីអាចវាយបកវិញក៏ជាកត្តាមួយជះឥទ្ធិពលដល់ស្ថានភាពទីផ្សារប្រេងក្នុងលោកដែរ។
គួរបញ្ជាក់ថា វិធានការកំណត់តម្លៃប្រេងរុស្ស៊ីដឹកតាមសមុទ្រត្រឹម ៦០ដុល្លារក្នុងមួយធុងបារីលរបស់ក្រុមប្រទេស G៧ បានចូលជាធរមានកាលពីថ្ងៃទី៥ ធ្នូ។ តាមរយៈវិធានការមួយនេះ G៧ សង្ឃឹមកាត់បន្ថយចំណូលរបស់រុស្ស៊ីក្នុងគោលដៅកម្រិតសមត្ថភាពចំណាយរបស់រុស្ស៊ីនៅក្នុងសង្រ្គាមអ៊ុយក្រែន។ តែរដ្ឋមន្រ្តីថាមពលអារ៉ាប៊ីសាអូឌីតលោកអាប់ឌែលឡាហ្ស៊ី បេន សាលម៉ានមើលឃើញថា វិធានការរបស់ G៧ របៀនេះមានគោលដៅនយោបាយ និងថា វាមិនច្បាស់ជាគោលដៅមួយដែល G៧ អាចសម្រេចបាន ឬអត់ទេ។
ក្រៅពីទណ្ឌកម្មអឺរ៉ុប និងវិធានការ G៧ លើប្រេងរុស្ស៊ី លោកអាប់ឌែលឡាហ្ស៊ី បេន សាលម៉ានក៏បានចាប់អារម្មណ៍លើនយោបាយគ្រប់គ្រងកូវីដ១៩ នៅចិនដែលអាចជះឥទ្ធិពលដល់ទីផ្សារប្រេងក្នុងលោក។ ដោយឡែក រដ្ឋមន្រ្តីថាមពលអារ៉ាប៊ីសាអូឌីតបានបញ្ជាក់ពីភាពត្រឹមត្រូវលើការសម្រេចចិត្តរបស់ក្រុមប្រទេសផលិតប្រេងហៅកាត់ Opep និងសម្ព័ន្ធមិត្តកាលពីថ្ងៃទី៥ តុលាក្នុងការកាត់បន្ថយការបូមប្រេងចំនួន ២លានធុងបារីលក្នុងមួយថ្ងៃ និងថា Opep និងសម្ព័ន្ធមិត្តនឹងបន្តផ្តោតការយកចិត្តទុកដាក់លើស្ថិរភាពទីផ្សារប្រេងក្នុងលោកនៅឆ្នាំ ២០២៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ