រញ្ជួយដីនៅតួកគី ជនរងគ្រោះស្លាប់ឡើងដល់ជាង៥ពាន់នាក់
ចំនួនជនរងគ្រោះដោយការរញ្ជួយដីនៅតួកគីបន្តកើនឡើងជាលំដាប់។ បើតាមតុល្យការផ្តល់ដោយអនុប្រធានាធិបតីតួកគី នៅព្រឹកថ្ងៃអង្គារទី ៧កុម្ភៈ ចំនួនអ្នកស្លាប់បានឡើងដល់ជាង៥ពាន់នាក់ ៖ ៣៤១៩នាក់នៅខាងតួកគី និង១៦០២នាក់ នៅខាងស៊ីរី។ ប្រតិបត្តិការសង្គ្រោះកំពុងបន្តរុករកជនរងគ្រោះនៅមានជីវិត ក្នុងលក្ខខណ្ឌអាកាសធាតុត្រជាក់ខ្លាំង ភ្លៀងផង ព្រិលផង និងគ្មានចរន្តអគ្គីសនីទៀត។ បើតាមការគូសបញ្ជាក់របស់វិទ្យាស្ថានតាមដានការរញ្ជួយដីរបស់អាមេរិក នេះជាការរញ្ជួយដីដ៏កំណាច និងខ្លាំងបំផុតមិនធ្លាប់ថតក្នុងកំណត់ត្រាពិភពលោកទេ គិតចាប់តាំងពីខែសីហាឆ្នាំ២០២១មក។
ចុះផ្សាយនៅថ្ងៃ៖
ស្តាប់ - ០១:៤៩
ពលរដ្ឋបារាំងដើមកំណើតគួដឌីស្ថានម្នាក់ បានធ្វើដំណើរទៅលេងក្រុមគ្រួសារនៅក្រុងប៉ាហ្សាស៊ីក Pazarcik ដែលជាចំណុចស្នូលនៃការរញ្ជួយដី។ នាង អូរីយ៉ាន វែរឌីយេរ បានរៀបរាប់ប្រាប់អ្នកឆ្លើយឆ្លងព័ត៌មានវិទ្យុបារាំង នូវហេតុការណ៍រញ្ជួយដីក៏កំណាចដែលនាងឃើញនិងជួបដោយផ្ទាល់ ៖
« ល្ងាចម្សិលមិញ យើងនៅក្នុងផ្ទះជុំគ្នា។ រហូតដល់ពេលមួយស្រាប់តែយើងឭសូរសំឡេងលាន់ឡើងយ៉ាងខ្លាំង ខ្លាំងមែនទែន។ បន្ទាប់មកដីចាប់ញ័ររង្គើ ជញ្ជាំងផ្ទះស្រាប់តែប្រេះរហែក។ យើងក៏នាំគ្នាស្ទុះរត់ចេញពីផ្ទះ ទៅក្រៅ ជួបនឹងអ្នកជិតខាងរស់នៅក្នុងប្លុកតែមួយដែលសុទ្ធតែតក់ស្លុតនិងស្លន់ស្លោដូចគ្នា។ ច្រកទ្វារធំនៃអគារគាំងបើកមិនរួច ព្រោះដាច់ភ្លើង។ គេនាំគ្នាវៃបំបែកកញ្ចក់មួយផ្ទាំង ទើបអាចចេញមកខាងក្រៅទាំងអស់គ្នាបាន។ យើងនាំគ្នារត់សំដៅទៅរកឡាន ចំពោះអ្នកមានឡាន ឯអ្នកខ្លះទៀតគ្មានឡាន ជើងទទេ មានអាវគេងយប់ នៅឈរស្លន់ស្លោ សំឡឹងរកកន្លែងណាវាល គ្មានសំណង់អាគារ។
ស្ថានភាពបែបនេះបានកើតឡើងនៅវេលាម៉ោងបួនទៀបភ្លឺ។ ជាងនេះទៅទៀត មេឃមិនអំណោយផល ទឹកភ្លៀងធ្លាក់ផង អាកាសធាតុត្រជាក់ខ្លាំងផង។ យើងឃើញអាគារ ស្រុតរលំបាក់ខ្ទេចទាំងស្រុងតែម្តង។
យើងបានបាត់បង់សមាជិកគ្រួសារម្នាក់ ពីព្រោះគាត់ឈឺ ពិការដេកនឹងកន្លែង។ យើងមិនអាចលើកគាត់រត់ចេញមកក្រៅជាមួយបាន ទើបគាត់ត្រូវអាគារបាក់កិនសង្កត់។ យើងឃើញតែដៃគាត់លៀនចេញពីបំណែកថ្ម នៅពេលនោះយើងគិតភ្លាមថាគាត់ពិតជាស្លាប់។ »
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ