ភាពប្រឈមតាមព្រំដែនអ៊ីស្រាអែល-លីបង់ អាចរាលដាលទៅជាសង្គ្រាមក្នុងតំបន់?
ក្រោយពីចលនាហាម៉ាសវាយឆ្មក់ទ្រង់ទ្រាយធំលើអ៊ីស្រាអែលនៅថ្ងៃទី ៧ តុលា២០២៣មក សមរភូមិប្រយុទ្ធអ៊ីស្រាអែលមិនមែនតម្រង់តែលើតំបន់ហ្កាហ្សាមួយទេ។ ក្តីព្រួយបារម្ភកំពុងរីកធំធាត់ខ្លាចមានការផ្ទុះសង្រ្គាមទូទៅរវាងអ៊ីស្រាអែលជាមួយបណ្តាប្រទេសជិតខាង។ ចំណុចព្រំដែនម្ខាងទៀតរវាងអ៊ីស្រាអែលនិងលីបង់ ក៏ជាសមរភូមិប្រយុទ្ធដ៏ក្តៅគគុកដែរ និងកាន់តែហិង្សាឡើងជាលំដាប់ពីមួយថ្ងៃទៅមួយថ្ងៃ បើទោះបីជាភាគីទាំងពីរប្រឹងចៀសមិនវាយប្រហារឱ្យចូលទឹកដីគូបក្សដិបក្សក៏ដោយ។
ចុះផ្សាយនៅថ្ងៃ៖
ស្តាប់ - ០២:២៨
នាថ្ងៃអាទិត្យទី ២២តុលាម្សិលមិញ ក្នុងដំណើរចុះត្រួតពលនៅតំបន់ភាគខាងជើងប្រទេស លោកនាយករដ្ឋមន្ត្រីអ៊ីស្រាអែលនេតាន់យ៉ាហូ បានព្រមានថាជាកំហុសដ៏ធ្ងន់ធ្ងរប្រសិនបើចលនាហេសបូឡាលីបង់ហ៊ានធ្វើសង្គ្រាមជាមួយអ៊ីស្រាអែល។ អ៊ីស្រាអែលនឹងវាយប្រហារដោយប្រើកម្លាំងដែលគ្មាននរណាអាចស្មានដល់និងដែលជាវិនាសកម្មសម្រាប់រដ្ឋលីបង់។
ក្លាយជាទម្លាប់តាំងពីថ្ងៃទី៧តុលាមក សំឡេងប្រយុទ្ធគ្នាលាន់រងំនៅបីចំណុចនៃព្រំដែនអ៊ីស្រាអែលលីបង់ គឺនៅប៉ែកខាងកើត កណ្តាលនិងខាងលិច។ យោធាអ៊ីស្រាអែលនិងចលនាប្រដាប់អាវុធហេសបូឡានៅលីបង់ តតាំងគ្នាដោយប្រើគ្រប់ទម្រង់នៃអាវុធយុទ្ធភ័ណ្ឌ៖ កាំភ្លើងធំធុនធ្ងន់ មីស៊ីលបញ្ជាពីចម្ងាយ រ៉ុកកែត និងដ្រូនប្រយុទ្ធ ព្រមទាំងការពង្រាយកងទ័ពអាកាសទៀតផងនៅខាងអ៊ីស្រាអែល។
ក្លាយជាទម្លាប់តាំងពីថ្ងៃទី៧តុលាមក សំឡេងប្រយុទ្ធគ្នាលាន់រងំនៅបីចំណុចនៃព្រំដែន គឺនៅប៉ែកខាងកើត កណ្តាលនិងខាងលិច។ ពួកហេសបូឡាមានយុទ្ធសាស្ត្របំបាក់យោធាអ៊ីស្រាអែល ឱ្យលែងឮនិងលែងឃើញ ដោយដៅវាយប្រហារជាស្វ័យប្រវត្តិប្រព័ន្ធស្តាប់សំឡេងនិងតាមដានអេឡិចត្រូនិកនៅតាមបណ្តោយព្រំដែន និងដៅវាយប្រហាររថក្រោះនិងរថពាសដែកទៀត។ ក្រុមប្រដាប់អាវុធលីបង់នេះបានថតប្រតិបត្តិការរបស់ខ្លួន ហើយបង្ហោះផ្សព្វផ្សាយ។ ទីតាំងនិងបន្ទាយយោធាអ៊ីស្រាអែល៥កន្លែងបានរងការបំផ្លាញពីសំណាក់ចលនាហេសបូឡាលីបង់ក្នុងមួយថ្ងៃអាទិត្យទី ២២តុលាម្សិលមិញដែលថែមទាំងប្រកាសថាមានជនរងគ្រោះនិងការខូចខាតយ៉ាងច្រើន ប៉ះពាល់ដល់ជនស៊ីវិលផងនិងយោធាផង។
ចំណែកខាងអ៊ីស្រាអែលវិញបានបាញ់គ្រាប់បែកត្បាល់ជាច្រើនចូលទៅដែនដីលីបង់ ក្នុងជម្រៅប្រមាណ៥គីឡូម៉ែត្រ។ កងទ័ពអាកាសក៏ធ្វើចេញសកម្មភាពដែរ ដោយបានកម្ទេចកងកម្មង់ដូបីនាក់និងចាប់បានដ្រូនមួយគ្រឿងហោះមកពីភាគខាងត្បូងលីបង់។
កងកម្លាំងមួកខៀវអង្គការសហប្រជាជាតិប្រចាំនៅលីបង់ កាកបាទក្រហម និងយោធាជាតិលីបង់បានសាកល្បងធ្វើអន្តរការីដើម្បីអាចអូសសាកសពយុទ្ធជនជាច្រើនដែលស្លាប់នៅជិតព្រំដែន ប៉ុន្មានថ្ងៃចុងក្រោយមកនេះ។ ជាសរុបមានយុទ្ធជនហេសបូឡាលីបង់២៥នាក់បានបាត់បង់ជីវិតក្នុងនោះ១០នាក់ក្នុងមួយថ្ងៃម្សិលមិញ។ ខាងអ៊ីស្រាអែល យោធាបានបង្កើនការជម្លៀសប្រជាពលរដ្ឋចេញពីភូមិឋានដែលស្ថិតនៅចម្ងាយបួនគីឡូម៉ែត្រពីព្រំដែនលីបង់។ ក្រៅអំពីបើកសមរភូមិប្រយុទ្ធដោយចំហជាយថាហេតុជាមួយលីបង់ អ៊ីស្រាអែលទំនងត្រូវបើកសមរភូមិប្រយុទ្ធមួយទៀតជាមួយស៊ីរី ដោយចាប់ផ្តើមវាយប្រហារដោយមីស៊ីលលើអាកាសយានដ្ឋានក្រុងដាម៉ាសនិងអាឡិបផង តែការវាយប្រហារបែបនេះអ៊ីស្រាអែលកម្រទទួលស្គាល់ថាជាទង្វើរបស់ខ្លួនណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ